അബുദാബി: വളര്‍ത്തു മൃഗങ്ങളെ ഉപേക്ഷിക്കുന്നവര്‍ക്ക് അബുദാബി മുന്‍സിപ്പാലിറ്റി ആന്റ് ട്രാന്‍സ്‌പോര്‍ട്ട് വകുപ്പ് മുന്നറിയിപ്പ് നല്‍കി. അബുദാബിയില്‍ തെരുവ് നായ്ക്കളുടെ എണ്ണം വര്‍ദ്ധിച്ച് വരുന്ന സാഹചര്യത്തിലാണ് പൊതു ജനങ്ങള്‍ക്കായി മുന്നറിയിപ്പ് പുറപ്പെടുവിച്ചിരിക്കുന്നത്. വളര്‍ത്തു നായകളെ ഉപേക്ഷിക്കുന്നതാണ് തെരുവ് നായകള്‍ കൂടാന്‍ കാരണമെന്ന വിലയിരുത്തലിന്റെ അടിസ്ഥാനത്തിലാണ് നടപടി.
വളര്‍ത്തു മൃഗങ്ങളുടെ ഉടമസ്ഥാവകാശം സംബന്ധിച്ച് പൊതു ജനങ്ങളെ ബോധവല്‍ക്കരിക്കുന്നതിനായി മുന്‍സിപ്പാലിറ്റി ആന്റ് ട്രാന്‍സ്‌പോര്‍ട്ട് വകുപ്പ് പ്രത്യേക കാമ്പയിനും ആരംഭിച്ചിട്ടുണ്ട്. വളര്‍ത്തുമൃഗങ്ങളെ ഉപേക്ഷിക്കുന്നതുമൂലമുണ്ടാകുന്ന പ്രശ്‌നങ്ങള്‍ ഉള്‍പ്പെടെ ചൂണ്ടികാണിച്ചുകൊണ്ടാണ് സാമൂഹ്യ മാധ്യമങ്ങളിലൂടെ കാമ്പയിന്‍ പുരോഗമിക്കുന്നത്.
ഉടമസ്ഥര്‍ വളര്‍ത്തു നായ്ക്കളെ മറ്റുള്ളവര്‍ക്ക് ബുദ്ധിമുട്ടുണ്ടാക്കാത്ത രീതിയില്‍ സംരക്ഷിക്കണമെന്നും തെരുവ് നായക്കളെ ആകര്‍ഷിക്കുന്ന തരത്തില്‍ ഭക്ഷണാവിശിഷ്ടങ്ങള്‍ വലിച്ചെറിയരുതെന്നും അധികൃതര്‍ പറഞ്ഞു. വര്‍ദ്ധിച്ചു വരുന്ന തെരുവുനായ ശല്യത്തിന് പരിഹാരമായി നായ്ക്കളെ വന്ധ്യംകരണത്തിന് വിധേയമാക്കണമെന്നും മുന്‍സിപ്പാലിറ്റി ആന്റ് ട്രാന്‍സ്‌പോര്‍ട്ട് വിഭാഗം നിര്‍ദേശം നല്‍കി.
