സോളാർ ഉപഭോക്താക്കൾക്ക് പുതിയ ഭാരം? ആനുകൂല്യങ്ങൾക്ക് നിയന്ത്രണം കൊണ്ടുവരാൻ കേന്ദ്ര നീക്കം

സോളാർ ഉപഭോക്താക്കൾക്ക് പുതിയ ഭാരം? ആനുകൂല്യങ്ങൾക്ക് നിയന്ത്രണം കൊണ്ടുവരാൻ കേന്ദ്ര നീക്കം

തിരുവനന്തപുരം: സോളാർ വൈദ്യുതിനിലയങ്ങളുമായി ബന്ധപ്പെട്ട ആനുകൂല്യങ്ങളിൽ നിയന്ത്രണം കൊണ്ടുവരാൻ കേന്ദ്രം നീക്കം തുടങ്ങി. അഞ്ചുകിലോവാട്ടിന് മുകളിലുള്ള സ്ഥാപിത ശേഷിയുള്ള സോളാർ ഉപഭോക്താക്കൾക്ക് നെറ്റ് മീറ്ററിങ് സംവിധാനത്തിൽ തുടരാൻ പ്രത്യേക ചാർജ് നൽകേണ്ടിവരുമെന്നാണ് കേന്ദ്ര ഊർജമന്ത്രാലയം പുറത്തിറക്കിയ ഉപഭോക്തൃ അവകാശങ്ങളുമായി ബന്ധപ്പെട്ട കരടുചട്ടത്തിൽ വ്യക്തമാക്കുന്നത്.

ഇതനുസരിച്ച്, 500 കിലോവാട്ടിന് മുകളിലുള്ള നിലയങ്ങൾക്ക് ബാറ്ററി സ്റ്റോറേജ് നിർബന്ധമാക്കാനും കേന്ദ്രം നിർദേശിക്കുന്നു. സംസ്ഥാനങ്ങൾക്ക് സ്വന്തം നിയന്ത്രണങ്ങൾ കൊണ്ടുവരാനുള്ള അധികാരവും നിലനിൽക്കുമെന്ന് കരടിൽ പറയുന്നു.

കേരളത്തിൽ ഇതിനകം തന്നെ 10 കിലോവാട്ടിന് മുകളിലുള്ള സോളാർ നിലയങ്ങൾക്ക് നിയന്ത്രണങ്ങൾ ഏർപ്പെടുത്തിയിട്ടുണ്ട്. വീടുകളിൽ 10 കിലോവാട്ട് വരെ നെറ്റ് മീറ്ററിങ് തുടരാമെങ്കിലും അതിനുമുകളിൽ ബാറ്ററി സ്റ്റോറേജ് നിർബന്ധമാക്കിയിട്ടുണ്ട്. എന്നാൽ ഈ ചട്ടം ശക്തമായ എതിർപ്പിനെ തുടർന്ന് ഹൈക്കോടതി സ്റ്റേ ചെയ്തിരിക്കുകയാണ്.

കേന്ദ്രചട്ടം നടപ്പിലായാൽ 5 കിലോവാട്ടിന് മുകളിലുള്ള ഗാർഹിക സോളാർ ഉപഭോക്താക്കൾക്കും അധിക സാമ്പത്തിക ഭാരം വരാനിടയുണ്ട്. സ്റ്റോറേജ് സംവിധാനങ്ങൾക്കും ഗ്രിഡ് ഉപയോഗത്തിനുമുള്ള ചെലവുകൾ കണക്കിലെടുത്താണ് പുതിയ ചാർജുകൾ നിശ്ചയിക്കാൻ നിർദ്ദേശം നൽകിയിരിക്കുന്നത്.

നെറ്റ് മീറ്ററിങ് സംവിധാനത്തിൽ, സോളാർ ഉത്പാദന സമയത്ത് അധിക വൈദ്യുതി ഗ്രിഡിലേക്ക് നൽകുകയും പിന്നീട് ഉപയോഗ സമയത്ത് അത് തിരിച്ചെടുക്കുകയും ചെയ്യുന്നതാണ്. എന്നാൽ ഇതിന്റെ ചെലവ് മറ്റു ഉപഭോക്താക്കൾക്ക് ബാധകമാകുന്നുവെന്നതാണ് കേന്ദ്രത്തിന്റെ വിലയിരുത്തൽ.

അതേസമയം, വ്യാവസായിക-വാണിജ്യ മേഖലകളിൽ ടൈം ഓഫ് ദ ഡേ (TOD) മീറ്ററിംഗ് വ്യാപകമാക്കാനും കേന്ദ്രം നിർദേശിക്കുന്നു. പകൽ വൈദ്യുതി നിരക്ക് കൂടുതൽ കുറയ്ക്കുന്നത് ഈ വിഭാഗങ്ങൾക്ക് നേട്ടമാകുമെന്നാണ് വിലയിരുത്തൽ.

കരടുചട്ടങ്ങളിലെ വ്യവസ്ഥകളെക്കുറിച്ച് സംസ്ഥാനങ്ങൾ ഏപ്രിൽ 11നകം അഭിപ്രായം അറിയിക്കണം. ഇതിന് ശേഷം അന്തിമ തീരുമാനമുണ്ടാകും.

English Summary
The central government is planning to introduce new restrictions on solar power benefits, especially for systems above 5 kW. Consumers may need to pay additional charges to continue under net metering. The draft rules also propose mandatory battery storage for larger systems. If implemented, this could increase costs for residential solar users, while aiming to balance grid usage and reduce cross-subsidy burdens.

solar-net-metering-rules-5kw-impact-kerala

Solar Power, Net Metering, Kerala Solar, Renewable Energy, Electricity Rules, 5kW Solar, Energy Policy, Kerala News