തിരുവനന്തപുരം: പാറശാലയില് ഷാരോണ് രാജിനെ കൊലപ്പെടുത്തിയ കേസില് ശിക്ഷാ വിധി ഇന്നില്ല. ഇന്നു ശിക്ഷാവിധിയില് വാദം നടക്കും. തുടർന്ന് ശിക്ഷ പിന്നീട് വിധിക്കും. കേസില് ഗ്രീഷ്മയും മൂന്നാം പ്രതി അമ്മാവന് നിര്മല കുമാരന് നായരും കുറ്റക്കാരെന്നു നെയ്യാറ്റിന്കര അഡീഷനല് സെഷന്സ് കോടതി ഇന്നലെ കണ്ടെത്തിയിരുന്നു.(Sharon Raj murder case: verdict reserved)
അതേസമയം തെളിവില്ലാത്തതിനാല് രണ്ടാം പ്രതിയും ഗ്രീഷ്മയുടെ അമ്മയുമായ സിന്ധുവിനെ കോടതി കുറ്റവിമുക്തയാക്കി. കൊലപാതകം, വിഷം നല്കല്, തട്ടിക്കൊണ്ടുപോകല്, പൊലീസിനെ തെറ്റിദ്ധരിപ്പിക്കല് തുടങ്ങി ഗ്രീഷ്മയ്ക്കെതിരെ ചുമത്തിയ കുറ്റങ്ങള് തെളിഞ്ഞതായി കോടതി കണ്ടെത്തിയെന്ന് പ്രോസിക്യൂട്ടര് അറിയിച്ചു. തെളിവു നശിപ്പിക്കാന് സഹായിച്ചത് ഗ്രീഷ്മയുടെ അമ്മാവന് ആണെന്നും കോടതി കോടതി കണ്ടെത്തി.
നെയ്യാറ്റിന്കര അഡീഷണല് സെഷന്സ് കോടതി ജഡ്ജി എ എം ബഷീര് ആണ് വിധി പ്രസ്താവിച്ചത്. 2022 ഒക്ടോബര് 14ന് ആണ് കേസിനാസ്പദമായ സംഭവം നടന്നത്. മറ്റൊരാളെ വിവാഹം കഴിക്കാനായി, കാമുകിയായ ഗ്രീഷ്മ കഷായത്തില് വിഷം കലര്ത്തി സുഹൃത്തായ ഷാരോണിനെ കൊലപ്പെടുത്തിയെന്നാണ് കേസ്.
