വിദ്യാർത്ഥി കണ്ടോൺമെന്റ് പൊലീസിൽ പരാതി നൽകി
തിരുവനന്തപുരം: യൂണിവേഴ്സിറ്റി കോളേജിൽ എസ്എഫ്ഐ വിദ്യാർത്ഥിയെ മർദിച്ചതായി പരാതി. ഒന്നാംവർഷ വിദ്യാർഥിയായ അബ്ദുല്ലയ്ക്കാണ് മർദനമേറ്റത്. നേരത്തെ ഭിന്നശേഷിയുളള വിദ്യാർത്ഥിയെ മർദ്ദിച്ച കേസിലെ പ്രതി മിഥുന്റെ നേതൃത്വത്തിലുള്ള സംഘം മർദിച്ചെന്നാണ് ആരോപണം.(SFI assaults student again in Thiruvananthapuram University College)
സംഭവത്തിൽ വിദ്യാർത്ഥി കണ്ടോൺമെന്റ് പൊലീസിൽ പരാതി നൽകി. അതേസമയം അബ്ദുള്ള അസഭ്യം പറഞ്ഞുവെന്ന് ആരോപിച്ച് കോളേജ് യൂണിയൻ ചെയർപേഴ്സണും പരാതി നൽകിയിട്ടുണ്ട്. ഭിന്നശേഷി വിദ്യാർത്ഥിയെ മർദ്ദിച്ചതിനെ തുടർന്ന് യൂണിവേഴ്സിറ്റി കോളേജ് എസ്എഫ്ഐ യൂണിറ്റ് പിരിച്ചുവിട്ടിരുന്നു. കേസിലെ പ്രതികളായ അമല്, മിഥുന്, അലന് വിധു എന്നിവരുടെ അറസ്റ്റ് തടഞ്ഞതിന് പിന്നാലെയായിരുന്നു നടപടി.
രണ്ടാം വര്ഷ ഇസ്ലാമിക് ഹിസ്റ്ററി വിദ്യാര്ത്ഥി മുഹമ്മദ് അനസിനായിരുന്നു കോളേജിലെ എസ്എഫ്ഐ പ്രവര്ത്തകരില് നിന്നും ക്രൂര മര്ദ്ദനമേറ്റത്. പാര്ട്ടി പരിപാടിയുടെ ഭാഗമായി തന്നോട് കൊടിയും തോരണങ്ങളും മറ്റും കെട്ടാന് എസ്എഫ്ഐ പ്രവര്ത്തകര് ആവശ്യപ്പെട്ടെന്നും എന്നാല് തനിക്ക് കാലിന് സ്വാധീന കുറവുണ്ടെന്ന് പറഞ്ഞപ്പോള് സംഘം മർദ്ദിച്ചുവെന്നായിരുന്നു അനസിന്റെ പരാതി.
