‘മതേതരത്വം’ ‘സോഷ്യലിസം’ ഔട്ട്. ഭരണഘടനയുടെ ആമുഖത്തിലെ തെറ്റ് മനപൂർവ്വമോ.

ന്യൂഡൽഹി: 1950 ജനുവരി 26ന് ഭരണഘടന നിലവിൽ വന്നത് മുതൽ ഔദ്യോ​ഗികമായി ഇന്ത്യൻ പാർലമെന്റായി മാറിയ കെട്ടിടത്തോട് ചൊവ്വാഴ്ച്ച എം.പിമാർ വിട പറഞ്ഞത് പുത്തൻ വിവാദത്തോടെ. പുതിയ പാർലമെന്റിലേക്കു മാറുന്നതിന്റെ ഭാഗമായി അംഗങ്ങൾക്ക് വിതരണം ചെയ്ത ഭരണഘടനയുടെ പതിപ്പിൽ തിരുത്തലുകൾ വരുത്തിയതായി ആരോപണം. 1976ൽ ഭേദ​ഗതിയിലൂടെ ഭരണഘടനയിൽ ഉൾപ്പെടുത്തിയ ‘മതേതരത്വം’ ‘സോഷ്യലിസം’ എന്നീ വാക്കുകൾ കാണാനില്ല. കോൺ​ഗ്രസിന്റെ ലോക്സഭ കക്ഷി നേതാവ് അധിർ രഞ്ജൻ ചൗധരിയാണ് ഇക്കാര്യം അറിയിച്ചത്. വാർത്താ ഏജൻസിയായ എഎൻഐയ്ക്ക് ദില്ലിയിൽ നൽകിയ അഭിമുഖത്തിലാണ് ​ഗുരുതരമായ ആരോപണം ഉന്നയിച്ചത്. ഭരണഘടനയുടെ ആമുഖത്തിലെ ‘സോഷ്യലിസ്റ്റ് സെക്കുലർ’ എന്ന ഭാഗമാണ് എടുത്തുമാറ്റിയത്. അദേഹത്തിന്റെ വാക്കുകൾ :
‘‘ഞങ്ങൾക്ക് വിതരണം ചെയ്ത ഭരണഘടനയുടെ പുതിയ പതിപ്പിൽ, അതായത് പുതിയ പാർലമെന്റ് മന്ദിരത്തിലേക്കു പ്രവേശിക്കുമ്പോൾ ഞങ്ങളുടെ കൈവശം ഉണ്ടായിരുന്ന ഭരണഘടനയുടെ ആമുഖ(പ്രീയാമ്പിൾ)ത്തിൽ ‘സോഷ്യലിസ്റ്റ് സെക്യുലർ’ എന്ന വാക്കുകൾ ഉൾപ്പെടുത്തിയിട്ടില്ല. 1976ലെ ഭേദഗതിക്കുശേഷമാണ് ഈ വാക്കുകൾ ഭരണഘടനയിൽ ഉൾപ്പെടുത്തിയതെന്നു ഞങ്ങൾക്കറിയാം, പക്ഷേ ഇപ്പോൾ ഞങ്ങൾക്ക് ആരെങ്കിലും ഭരണഘടന കൈമാറുമ്പോൾ ആ വാക്കുകൾ ഉൾപ്പെടുന്നില്ല എന്നത് ആശങ്കാവഹമായ കാര്യമാണ്. ‌
അവരുടെ ഉദ്ദേശ്യശുദ്ധി സംശയിക്കേണ്ടതാണ്. വളരെ കൗശലപൂർവമാണ് അവരത് ചെയ്തിരിക്കുന്നത്. ഇതെനിക്ക് വളരെയധികം ആശങ്കയുളവാക്കുന്ന കാര്യമാണ്. ഈ വിഷയം ഞാൻ ഉന്നയിക്കാൻ ശ്രമിച്ചിരുന്നു, എന്നാൽ എനിക്ക് അതിനുള്ള അവസരം ലഭിച്ചില്ല’’– ചൗധരി പറഞ്ഞു.
അതേ സമയം മനപൂർവ്വം സംഭവിച്ചതല്ലെന്ന് കേന്ദ്ര സർക്കാർ വൃത്തങ്ങൾ പറയുന്നു. 1950ൽ പാസാക്കിയ ആദ്യ ഭരണഘടനയുടെ പതിപ്പാണ് അം​ഗങ്ങൾക്ക് നൽകിയത്. 1976ൽ വരുത്തിയ മാറ്റമടങ്ങിയതിന്റെ പതിപ്പ് അബദ്ധത്തിൽ വിട്ട് പോയതാണ്. എന്നാൽ ഔദ്യോ​ഗിക വിശദീകരണം ഇത് വരെ പാർലമെന്ററി കാര്യ വകുപ്പിൽ നിന്നും വന്നിട്ടില്ല.
ഭരണഘടനയുടെ ആമുഖത്തിൽ ‘മതേതരത്വം’ എന്ന വാക്ക് ഉൾക്കൊള്ളിച്ചതിനെ ശക്തമായി എതിർക്കുന്നവരാണ് സംഘപരിവാർ സംഘടനകൾ. ലോക്സഭയിലും രാജ്യസഭയിലും ഒരു പോലെ ഭൂരിപക്ഷം ലഭിച്ചാൽ ഭേദ​ഗതി പാസാക്കി ‘മതേതരത്വം’ എന്ന വാക്ക് ഒഴിവാക്കുമെന്ന അഭ്യൂഹങ്ങളും ശക്തമാണ്. അത് കൊണ്ട് തന്നെ പുതിയ പാർലമെന്റിലേയ്ക്ക് കടക്കുമ്പോൾ എം.പിമാർക്ക് നൽകിയ പതിപ്പിൽ മാറ്റങ്ങൾ വന്നത് മനപൂർവ്വെന്ന് സാമൂഹികമാധ്യമങ്ങളിലും വിമർശനം സജീവം.

പുതിയ പാർലമെന്റിൽ ആദ്യം അവതരിപ്പിച്ചത് വനിതാ ബിൽ