തനിക്കുനേരെയുണ്ടായ ലൈംഗികാതിക്രമം ചെറുത്ത ആറു വയസ്സുകാരിയെ കൊലപ്പെടുത്തി കുറ്റിക്കാട്ടിൽ ഉപേക്ഷിച്ച കേസിൽ 55 വയസ്സുകാരനായ സ്കൂൾ പ്രിൻസിപ്പൽ അറസ്റ്റിൽ. ഗുജറാത്തിലെ ദഹോദ് ജില്ലയിൽ ആണ് സംഭവം. ഗോവിന്ദ് നാട്ട് എന്നയാൾ ആണ് അറസ്റ്റിലായത്. School principal arrested for killing six-year-old girl who resisted sexual assault

സംഭവത്തെക്കുറിച്ച് പൊലീസ് പറയുന്നത്:

വ്യാഴാഴ്ച വൈകിട്ട് പെൺകുഞ്ഞിന്റെ മൃതദേഹം കണ്ടെത്തിയതോടെ പ്രദേശത്ത് വലിയ ആശങ്ക പരന്നു. ശ്വാസംമുട്ടിയാണ് മരണമെന്ന് പോസ്റ്റ്മോർട്ടത്തിൽ വ്യക്തമായി. ഗോവിന്ദിനൊപ്പമാണ് കുട്ടി സ്ഥിരമായി സ്കൂളിലേക്ക് പോകുന്നതും വരുന്നതുമെന്ന പെൺകുഞ്ഞിന്റെ അമ്മയുടെ മൊഴി പൊലീസിൽ സംശയം ജനിപ്പിച്ചു.

എന്നാൽ, ഗോവിന്ദിനോട് സംസാരിച്ചപ്പോൾ കുട്ടിയെ നേരത്തെ സ്കൂളിൽ ഇറക്കിയ ശേഷം മറ്റു ജോലികൾക്കായി താൻ പുറത്തുപോയെന്നായിരുന്നു ഇയാളുടെ മറുപടി. പക്ഷെ ഗോവിന്ദിന്റെ ഫോൺ ലൊക്കേഷൻ പരിശോധിച്ചതിൽനിന്ന് ഇയാൾ സ്കൂളിൽ വൈകിയാണ് എത്തിയതെന്ന് മനസിലായി. തുടർന്ന് നടത്തിയ ചോദ്യം ചെയ്യലിൽ ഇയാൾ കുറ്റം ഏറ്റുപറയുകയായിരുന്നു.

സ്കൂളിലേക്ക് പോകുന്നതിനിടെ കുട്ടിയെ ലൈംഗികമായി ഉപദ്രവിക്കാൻ താൻ ശ്രമിച്ചെന്നും കുഞ്ഞ് നിലവിളിച്ച് ബഹളം വച്ചതോടെ മുഖം പൊത്തിയെന്നുമാണ് പ്രതി പൊലീസിനു നൽകിയ മൊഴി. ശ്വാസം മുട്ടി കുട്ടി മരിച്ചെന്ന് മനസിലായ ശേഷം മൃതദേഹം കാറിൽവച്ച് ലോക്ക് ചെയ്ത് ഇയാൾ സ്കൂളിലെത്തി.

പിന്നീട് വൈകിട്ട് 5 മണിയോടെ കുട്ടിയുടെ ശരീരം സ്കൂളിന് പിന്നിൽ ഉപേക്ഷിക്കുകയും സ്കൂൾ ബാഗും െചരിപ്പും ക്ലാസ്മുറിക്ക് പുറത്തു കൊണ്ടു വയ്ക്കുകയും ചെയ്തു. രാവിലെ 10.20നാണ് കുഞ്ഞിനെ കൂട്ടി ഗോവിന്ദ് പുറപ്പെട്ടതെന്ന് കുട്ടിയുടെ അമ്മ പറഞ്ഞു. എന്നാൽ കുട്ടി സ്കൂളിൽ എത്തിയിരുന്നില്ലെന്ന് അധ്യാപകരും സഹപാഠികളും സ്ഥിരീകരിച്ചിട്ടുണ്ട്. സംഭവത്തെപ്പറ്റി കൂടുതൽ അന്വേഷണം നടത്തുമെന്ന് പോലീസ് അറിയിച്ചു.