ആരോഗ്യമുള്ളതും തിളക്കമുള്ളതുമായ ചർമ്മസ്ഥിതി സ്വന്തമായി ലഭിക്കാൻ ആഗ്രഹിക്കാത്തവരായി ആരാണുള്ളത് ?എന്നാൽ നിങ്ങൾക്ക് എണ്ണമയമുള്ള ചർമ്മമാണ് ഉള്ളതെങ്കിൽ ചർമ്മസ്ഥിതിയെ പരിപാലിക്കാനായി കുറച്ചധികം കാര്യങ്ങൾ ശ്രദ്ധയോടെ ചെയ്യേണ്ടതുണ്ട്. മുഖക്കുരു, വൈറ്റ്ഹെഡ്സ്, ബ്ലാക്ക്ഹെഡ്സ് തുടങ്ങിയ ചർമ്മ സംബന്ധമായ പ്രശ്നങ്ങൾ ഉണ്ടാകാൻ ഏറ്റവും കൂടുതൽ സാധ്യതയുള്ളത് എണ്ണമയമുള്ള ചർമ്മമുള്ളവരുടെ കാര്യത്തിലാണ്.ചർമ്മത്തിലെ സുഷിരങ്ങളിൽ അഴുക്കടിഞ്ഞു കൂടുന്നതുകൊണ്ടാണ് പ്രധാനമായും ബ്ലാക്ക്ഹെഡ്സ് രൂപപ്പെടുന്നത്. മൂക്ക്, കവിൾ, താടി തുടങ്ങിയ ഭാഗങ്ങളിലാണ് പ്രധാനമായും ബ്ലാക്ക്ഹെഡ്സ് കാണുന്നത്. ബ്ലാക്ക്ഹെഡ്സ് അകറ്റാൻ വീട്ടിൽ പരീക്ഷിക്കാവുന്ന ചില പൊടിക്കൈകൾ എന്തൊക്കെയാണെന്ന് നോക്കാം…
പഞ്ചസാര
ബ്ലാക്ക്ഹെഡ്സ് അകറ്റാൻ വെളിച്ചെണ്ണയും പഞ്ചസാരയും ഉപയോഗിച്ച് സ്ക്രബ് ചെയ്യുന്നത് നല്ലതാണ്. ഇതിനായി ഒരു ടേബിൾസ്പൂൺ വെളിച്ചെണ്ണയിൽ കുറച്ച് പഞ്ചസാര വിതറി ബ്ലാക്ക്ഹെഡ്‌സുള്ള ഭാഗത്ത് സ്ക്രബ് ചെയ്യാം. ആഴ്ചയിൽ നാല് ദിവസം വരെ ഇങ്ങനെ ചെയ്യാവുന്നതാണ്.
ഉപ്പ്
ഉപ്പും ബ്ലാക്ക്ഹെഡ്സ് അകറ്റാൻ നല്ലതാണ്. ഉപ്പിലെ ബ്ലീച്ചിംഗ് ഇഫക്ട് ആണ് ബ്ലാക്ക്ഹെഡ്സ് നീക്കാൻ സഹായിക്കുന്നത്. ഉപ്പിനൊപ്പം തേൻ ചേർത്തു പുരട്ടുന്നതും ബ്ലാക്ക്ഹെഡ്സ് മാറാൻ സഹായിക്കും. ഇതിനായി ഉപ്പും തേനും സമം ചേർത്ത് മിശ്രിതമാക്കുക. ഇതിലേയ്ക്ക് വേണമെങ്കിൽ നാരങ്ങാനീര് കൂടി ചേർക്കാം. ശേഷം ഈ മിശ്രിതം ബ്ലാക്ക്ഹെഡ്സ് ഉള്ള ഭാഗങ്ങളിൽ പുരട്ടാം. കുറച്ച് കഴിഞ്ഞ് തണുത്തവെള്ളത്തിൽ കഴുകാം.
ഓട്സ്
ഓട്‌സും ബ്ലാക്ക്ഹെഡ്സ് മാറാൻ സഹായിക്കും. ഇതിനായി ആദ്യം ഓട്സ് നന്നായി പൊടിച്ച് പൗഡർ രൂപത്തിലാക്കുക. ഇനി ഇതിലേയ്ക്ക് കട്ടത്തൈരും ഒലീവ് ഓയിലും ചേർത്ത് പേസ്റ്റ് രൂപത്തിലാക്കി എടുക്കുക. ശേഷം മുഖത്ത് പുരട്ടാം. 20 മിനിറ്റിന് ശേഷം തണുത്ത വെള്ളത്തിൽ കഴുകി കളയുക. ആഴ്ചയിൽ രണ്ടോ മൂന്നോ തവണ ഇത് ചെയ്യാവുന്നതാണ്.
ചെറുനാരങ്ങ
ഒരു സ്പൂൺ ചെറുനാരങ്ങാനീരും ഒരു കഷ്ണം കറുകപ്പട്ടയും ചേർത്ത് മിശ്രിതമാക്കുക. ഈ മിശ്രിതം ബ്ലാക്ക് ഹെഡ്‌സിന്റെ മുകളിൽ പുരട്ടുക.15 മിനിറ്റിനു ശേഷം തണുത്ത വെള്ളം ഉപയോഗിച്ച് കഴുകിക്കളയാം.
പാൽ
കുറച്ച് പാലിൽ തേൻ ചേർത്ത് ചൂടാക്കുക. തണുക്കുമ്പോൾ ബ്ലാക്ക്ഹെഡ്‌സുള്ള ഭാഗത്ത് പുരട്ടാം. ശേഷം ഒരു കോട്ടൺ തുണി വച്ച് മൂടാം. 15 മിനിറ്റിന് ശേഷം തൂണി നീക്കാം.
കറ്റാർവാഴ
ഒരു ടീസ്പൂൺ കറ്റാർവാഴ ജെല്ലും തേനും ചേർത്ത് മുഖത്തിടുന്നത് മുഖത്തെ കറുപ്പ് കുറയ്ക്കാൻ സഹായിക്കും. ആഴ്ചയിൽ രണ്ടോ മൂന്നോ തവണ ഈ മിശ്രിതം ഉപയോഗിക്കാവുന്നതാണ്.
Read Also ;പല്ലിലെ കറ മൂലം ചിരി മറയ്‌ക്കേണ്ട; ഈ വഴികൾ പരീക്ഷിക്കാം
