തിരുവിതാംകൂർ ദേവസ്വം ബോർഡിന്റെ കലണ്ടറിൽ നിന്നും ‘തിരുവാഭരണം’ കാണാതായി
തിരുവനന്തപുരം: ശബരിമലയിൽ നിന്ന് സ്വർണ്ണപ്പാളി കടത്തിയ സംഭവത്തിന് പിന്നാലെ, തിരുവിതാംകൂർ ദേവസ്വം ബോർഡിന്റെ 2026ലെ കലണ്ടറിൽ നിന്ന് ശബരിമലയുമായി ബന്ധപ്പെട്ട പ്രധാന ആചാരാനുഷ്ഠാനങ്ങൾ ഒഴിവായത് വിവാദമാകുന്നു.
തിരുവാഭരണ ഘോഷയാത്രയും എരുമേലി പേട്ടതുള്ളലും കലണ്ടറിൽ ഉൾപ്പെടുത്തിയിട്ടില്ലെന്നാണ് കണ്ടെത്തൽ.
ശബരിമല തീർത്ഥാടനത്തിലെ ഏറ്റവും പ്രധാനപ്പെട്ട ചടങ്ങുകളിലൊന്നായ എരുമേലി പേട്ടതുള്ളൽ ഈ വർഷം മകരസംക്രമോത്സവത്തോടനുബന്ധിച്ച് ജനുവരി 11നാണ് നടക്കുന്നത്.
ഇതിന് പിന്നാലെ ജനുവരി 12നാണ് പ്രസിദ്ധമായ തിരുവാഭരണ ഘോഷയാത്ര ആരംഭിക്കുന്നത്. എന്നാൽ ഈ രണ്ട് ചടങ്ങുകളും ദേവസ്വം ബോർഡ് പുറത്തിറക്കിയ 2026ലെ കലണ്ടറിൽ രേഖപ്പെടുത്തിയിട്ടില്ല.
ശബരിമല ക്ഷേത്രത്തിലെ ആചാരാനുഷ്ഠാനങ്ങളുടെ തീയതികളും സമയക്രമവും ഭക്തജനങ്ങളെ അറിയിക്കുന്നതിനായാണ് ദേവസ്വം കലണ്ടർ പുറത്തിറക്കുന്നത്.
അത്തരമൊരു കലണ്ടറിൽ ശബരിമലയിലെ ഏറ്റവും പ്രാധാന്യമുള്ള ചടങ്ങുകൾ തന്നെ ഒഴിവായത് ഗുരുതരമായ വിഷയമാണെന്നാണ് വിശ്വാസികളുടെ പ്രതികരണം.
ഇത് അബദ്ധവശാൽ സംഭവിച്ചതായി കരുതാനാകില്ലെന്നും, ആസൂത്രിതമായ നീക്കമാണിതെന്നുമാണ് ഭക്തജനങ്ങളുടെ ആരോപണം.
ശബരിമല ക്ഷേത്രത്തോടും വിശ്വാസികളോടുമുള്ള ദേവസ്വം ബോർഡിന്റെയും സർക്കാരിന്റെയും സമീപനമാണ് ഇതിലൂടെ വെളിപ്പെടുന്നതെന്ന് അവർ ചൂണ്ടിക്കാട്ടുന്നു.
അബദ്ധമാണെന്ന വിശദീകരണം ഉയർന്നാലും, അതും ഭരണകൂടത്തിന്റെ മനോഭാവം വ്യക്തമാക്കുന്നതാണെന്നും വിശ്വാസികൾ അഭിപ്രായപ്പെടുന്നു.
English Summary
The Travancore Devaswom Board has come under criticism after omitting key Sabarimala rituals, including the Thiruvabharanam procession and Erumeli Pettathullal, from its 2026 calendar. Devotees allege the omission is deliberate and reflects an indifferent attitude toward Sabarimala traditions and religious sentiments.
sabarimala-rituals-missing-devaswom-calendar-controversy
Sabarimala, Travancore Devaswom Board, Thiruvabharanam, Erumeli Pettathullal, Devaswom Calendar, Kerala Temple News
