ശബരിമല: അയ്യപ്പഭക്തരുടെ പ്രവാഹത്തിനൊപ്പം ശബരിമലയിൽ ഇത്തവണ റെക്കോർഡ് വരുമാനം.
മണ്ഡലകാലത്തെ 40 ദിവസങ്ങൾ പിന്നിടുമ്പോൾ 332.77 കോടി രൂപയാണ് പമ്പയിലും സന്നിധാനത്തുമായി ലഭിച്ച ആകെ വരുമാനം.
കഴിഞ്ഞ വർഷത്തെ ആകെ വരുമാനമായ 297.06 കോടി രൂപയെ മറികടന്നാണ് ഈ ചരിത്ര നേട്ടം.
കണക്കുകൾ ഇങ്ങനെ:
വെള്ളിയാഴ്ച വരെയുള്ള കണക്കുകൾ പ്രകാരം 332,77,05,132 രൂപയാണ് ദേവസ്വം ബോർഡ് ശേഖരിച്ചത്. ഇതിൽ കാണിക്കയായി മാത്രം ലഭിച്ചത് 83.17 കോടി രൂപയാണ്.
ശ്രദ്ധേയമായ കാര്യം, കഴിഞ്ഞ വർഷത്തെ അപേക്ഷിച്ച് ഭക്തരുടെ എണ്ണത്തിൽ നേരിയ കുറവുണ്ടായിട്ടും വരുമാനത്തിൽ വലിയ വർധനവ് രേഖപ്പെടുത്തി എന്നതാണ്.
കഴിഞ്ഞ സീസണിൽ 32,49,756 പേർ ദർശനം നടത്തിയപ്പോൾ ഇത്തവണ അത് 30 ലക്ഷത്തിന് മുകളിലാണ്.
ഭക്തർക്ക് സുഖദർശനം, പരാതികളില്ലാതെ അന്നദാനം
തിരക്കേറിയ ദിവസങ്ങളിൽ പോലും അയ്യപ്പന്മാർക്ക് മികച്ച രീതിയിൽ ദർശനം ഉറപ്പാക്കാൻ സാധിച്ചതായി തിരുവിതാംകൂർ ദേവസ്വം ബോർഡ് പ്രസിഡന്റ് കെ. ജയകുമാർ അറിയിച്ചു.
ആദ്യദിനങ്ങളിലെ ചില ആശയക്കുഴപ്പങ്ങൾ ഒഴിച്ചുനിർത്തിയാൽ പോലീസും ദേവസ്വം ജീവനക്കാരും ഒത്തൊരുമയോടെ പ്രവർത്തിച്ചതാണ് തീർത്ഥാടനം സുഗമമാക്കിയത്.
അന്നദാനത്തിൽ സദ്യ ഉൾപ്പെടുത്തിയ മാറ്റം ഭക്തർക്കിടയിൽ വലിയ സ്വീകാര്യത നേടി.
അരവണ പ്രതിസന്ധിക്ക് പരിഹാരം
അരവണ വിതരണത്തിൽ ഭക്തർക്കുണ്ടായ പ്രയാസം പരിഹരിക്കാൻ നടപടി തുടങ്ങിയതായി ബോർഡ് വ്യക്തമാക്കി.
നിലവിൽ പത്ത് ടിൻ എന്ന നിയന്ത്രണം തുടരുന്നുണ്ടെങ്കിലും, ജനുവരി 20ന് ശേഷം കൂടുതൽ അരവണ ആവശ്യമുള്ളവർക്ക് തപാൽ മാർഗം എത്തിക്കാനുള്ള സംവിധാനം ഒരുക്കും.
മകരവിളക്ക് ദർശനത്തിനായി നട തുറക്കുമ്പോൾ 12 ലക്ഷം ടിൻ അരവണ കരുതൽ ശേഖരമായി ഉണ്ടാകുമെന്നും അദ്ദേഹം കൂട്ടിച്ചേർത്തു.
മകരവിളക്ക് ഒരുക്കങ്ങൾ വിലയിരുത്താൻ ദേവസ്വം മന്ത്രി വി.എൻ. വാസവന്റെ നേതൃത്വത്തിൽ പമ്പയിൽ യോഗം ചേർന്നു.
പുല്ലുമേട്, കാനനപാത എന്നിവയുമായി ബന്ധപ്പെട്ട പ്രശ്നങ്ങൾ വനംവകുപ്പുമായി ചർച്ച ചെയ്ത് ഉടൻ പരിഹരിക്കും.
English Summary
The Travancore Devaswom Board has announced a record revenue of ₹332.77 crores during the first 40 days of the Mandala season at Sabarimala, which is significantly higher than last year’s total of ₹297.06 crores. Although there was a slight dip in the number of devotees (over 30 lakhs compared to last year’s 32.49 lakhs), the offerings (Kanikka) alone reached ₹83.17 crores.
