രാഹുൽ ഗാന്ധി ഇന്ന് കൊച്ചിയിൽ; മഹാ പഞ്ചായത്തിന് സജ്ജമായി നഗരം
കൊച്ചി: രാഹുൽ ഗാന്ധി പങ്കെടുക്കുന്ന കോൺഗ്രസ് മഹാ പഞ്ചായത്തിന് കൊച്ചി നഗരം പൂർണ സജ്ജമായി. തദ്ദേശസ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പിൽ ഉജ്ജ്വല വിജയം നേടിയ 15,000ത്തിലധികം കോൺഗ്രസ് ജനപ്രതിനിധികളാണ് കെ.പി.സി.സി സംഘടിപ്പിക്കുന്ന മഹാ പഞ്ചായത്തിൽ പങ്കെടുക്കുന്നത്.
മറൈൻ ഡ്രൈവിൽ ഒരുക്കിയിരിക്കുന്ന കൂറ്റൻ പന്തലിലും വേദിയിലും നടക്കുന്ന ഒരുക്കങ്ങൾ കെ.പി.സി.സി പ്രസിഡന്റ് സണ്ണി ജോസഫ് എം.എൽ.എയും കേരളത്തിന്റെ ചുമതലയുള്ള എ.ഐ.സി.സി ജനറൽ സെക്രട്ടറി ദീപാ ദാസ് മുൻഷിയും നേരിട്ട് വിലയിരുത്തി.
രാവിലെ 11 മണിയോടെ തന്നെ വിവിധ ജില്ലകളിൽ നിന്നുള്ള ജനപ്രതിനിധികൾ സമ്മേളന നഗരിയിലേക്ക് എത്തിച്ചേരും.
വടക്കൻ ജില്ലകളിൽ നിന്നെത്തുന്ന വാഹനങ്ങൾ കളമശ്ശേരിയിൽ നിന്ന് കണ്ടെയ്നർ റോഡ് വഴി എത്തി ബോൾഗാട്ടി പാലസ് ഗ്രൗണ്ട്, ആൽഫ ഹൊറൈസൺ കൺവെൻഷൻ സെന്റർ, വല്ലാർപാടം പള്ളി ഗ്രൗണ്ട് എന്നിവിടങ്ങളിൽ പാർക്ക് ചെയ്യും.
ഇടുക്കി, പത്തനംതിട്ട, കോട്ടയം ജില്ലകളിൽ നിന്നുള്ള വാഹനങ്ങൾ കലൂർ ജവഹർലാൽ നെഹ്റു സ്റ്റേഡിയത്തിന് സമീപവും, ആലപ്പുഴ, കൊല്ലം, തിരുവനന്തപുരം ഉൾപ്പെടെയുള്ള തെക്കൻ ജില്ലകളിൽ നിന്നുള്ള വാഹനങ്ങൾ വില്ലിംഗ്ടൺ ഐലൻഡിലും ബി.ഒ.ടി പാലത്തിന് സമീപവുമാണ് പാർക്കിംഗ് ക്രമീകരിച്ചിരിക്കുന്നത്.
ഉച്ചയ്ക്ക് 12.45 ന് നെടുമ്പാശ്ശേരി വിമാനത്താവളത്തിൽ എത്തുന്ന രാഹുൽ ഗാന്ധി ആദ്യം പ്രൊഫ. എം. ലീലാവതി ടീച്ചറുടെ വസതി സന്ദർശിക്കും. തുടർന്ന് ഉച്ചയ്ക്ക് രണ്ട് മണിയോടെ മഹാ പഞ്ചായത്ത് നടക്കുന്ന സമ്മേളന നഗരിയിലെത്തും.
പ്രതിപക്ഷ നേതാവ് വി.ഡി. സതീശൻ, എ.ഐ.സി.സി ജനറൽ സെക്രട്ടറി കെ.സി. വേണുഗോപാൽ എം.പി, സച്ചിൻ പൈലറ്റ്, പ്രവർത്തക സമിതി അംഗം രമേശ് ചെന്നിത്തല, കനയ്യ കുമാർ, കർണാടക ഊർജ മന്ത്രി കെ.ജെ. ജോർജ് എന്നിവരടക്കം പ്രമുഖ നേതാക്കൾ സമ്മേളനത്തിൽ പങ്കെടുക്കും.
ഡി.സി.സി പ്രസിഡന്റ് മുഹമ്മദ് ഷിയാസ്, എം.പിമാരായ ഹൈബി ഈഡൻ, ഷാഫി പറമ്പിൽ, എം.എൽ.എമാരായ എ.പി. അനിൽകുമാർ, ടി.ജെ. വിനോദ്, ഉമ തോമസ്, കെ.പി.സി.സി ഭാരവാഹികളായ വി.പി. സജീന്ദ്രൻ, ബി.എ. അബ്ദുൾ മുത്തലിബ്, ഐ.കെ. രാജു, എം.ആർ. അഭിലാഷ്, ദീപ്തി മേരി വർഗീസ്, പി.എ. സലീം, നെയ്യാറ്റിൻകര സനൽ എന്നിവരും മറൈൻ ഡ്രൈവിൽ സന്നിഹിതരായിരുന്നു.
മെട്രോ ഉപയോഗിക്കാൻ നിർദേശം
മലബാർ മേഖലയിൽ നിന്ന് ചെറുവാഹനങ്ങളിലെത്തുന്നവർ ആലുവയിൽ നിന്നും, കോട്ടയം, ഇടുക്കി, പത്തനംതിട്ട ജില്ലകളിൽ നിന്നെത്തുന്നവർ തൃപ്പൂണിത്തുറയിൽ നിന്നും മെട്രോയിൽ കയറി എം.ജി. റോഡ് സ്റ്റേഷനിൽ ഇറങ്ങി മറൈൻ ഡ്രൈവിലെ സമ്മേളന നഗരിയിലെത്തണമെന്ന് ഡി.സി.സി പ്രസിഡന്റ് മുഹമ്മദ് ഷിയാസ് അഭ്യർത്ഥിച്ചു.
English Summary
Kochi is all set to host the Congress Maha Panchayat with Rahul Gandhi arriving today.
rahul-gandhi-kochi-maha-panchayat-congress-meet
Rahul Gandhi, Kochi News, Maha Panchayat, Congress Party, KPCC, Kerala Politics, Marine Drive Event
