കൊച്ചി: ആമസോണ് ഇ- കൊമേഴ്സിന്റെ ഗോഡൗണില് ബിഐഎസ് നടത്തിയ പരിശോധനയിൽ വ്യാജ ഐഎസ്ഐ മാര്ക്ക് ഒട്ടിച്ച ഉത്പന്നങ്ങള് പിടികൂടി. കളമശേരിയിലെ ഗോഡൗണിലാണ് പരിശോധന നടത്തിയത്.
പരിശോധനയില് ഇന്ത്യയിലും വിദേശത്തുമുള്ള ബ്രാന്ഡുകളുടെ പേരില് നിര്മിച്ച ഗാര്ഹിക ഇലക്ട്രോണിക് ഇലക്ട്രിക്കല് ഉപകരണങ്ങള്, അടുക്കള ഉപകരണങ്ങള്, കളിപ്പാട്ടങ്ങള്, പാദരക്ഷകള് തുടങ്ങിയവ പിടികൂടിയിട്ടുണ്ട്. ഐഎസ്ഐ മാര്ക്ക് വ്യാജമായി ഒട്ടിച്ചതും നിയമപ്രകാരമുള്ള ലേബലുകള് ഒട്ടിക്കാത്തതുമായ ഉല്പന്നങ്ങള് അടക്കം പിടികൂടിയവയിൽ ഉൾപ്പെടുന്നു.
ഗുണനിലവാരം കുറഞ്ഞ ഉത്പന്നങ്ങള് വന്തോതില് ശേഖരിച്ചതായുള്ള രഹസ്യ വിവരത്തെ തുടര്ന്നായിരുന്നു പരിശോധന നടത്തിയത്. ബിഐഎസ് സര്ട്ടിഫിക്കേഷന് മാര്ക്ക് വ്യാപകമായി ദുരുപയോഗിച്ചതായും പരിശോധനയില് കണ്ടെത്തി. ഉത്പന്നങ്ങളില് ഒട്ടിച്ച ലേബലുകള് എളുപ്പം പൊളിഞ്ഞുപോകുന്നതും മുദ്രകള് ശരിയായി പതിയാത്ത നിലയിലുമായിരുന്നു.
സംഭവത്തിൽ കുറ്റക്കാര്ക്കെതിരെ പ്രോസിക്യൂഷന് നടപടികള് ആരംഭിക്കും. 2 വര്ഷം വരെ തടവും നിലവാരമില്ലാത്ത ഉല്പന്നങ്ങളുടെ വില്പനയിലൂടെ നേടിയ തുകയുടെ 10 മടങ്ങ് പിഴയും ഇടാക്കാവുന്ന കുറ്റമാണു പ്രതികള്ക്കെതിരെ ചുമത്തുക.
