നൂറു കണക്കിന് അടി മുകളിൽ വച്ച് വിമാനം പറത്തുന്നതിനിടെ പൈലറ്റ് കുഴഞ്ഞുവീണാൽ എന്താവും അവസ്ഥ..? വിമാനം തകരാൻ വരെ സാധ്യത ഉണ്ട് അല്ലെ..? എന്നാൽ അത്തരമൊരു സംഭവത്തിൽ നിന്നും വിമാനവും യാത്രികരും രക്ഷപെട്ട സംഭവമാണ് ഇപ്പോൾ പുറത്തു വരുന്നത്.
കഴിഞ്ഞ വർഷം ഫെബ്രുവരി 17നു ആണ് സംഭവം നടന്നത്. 199 യാത്രക്കാരും 6 ജീവനക്കാരുമായി ജർമനിയിലെ ഫ്രാങ്ക്ഫർട്ടിൽനിന്നു സ്പെയിനിലെ സവിലിലേക്കു പറന്ന ലുഫ്താൻസ വിമാനത്തിലാണ് സംഭവം ഉണ്ടായത്.
യാത്രയ്ക്കിടെ പൈലറ്റ് ശുചിമുറിയിൽ പോയപ്പോൾ കോക്പിറ്റിലുള്ള സഹപൈലറ്റ് കുഴഞ്ഞുപോകുകയിരുന്നു. അബോധാവസ്ഥയിലേക്ക് പോകാനൊരുങ്ങിയ സഹപൈലറ്റ് പരിഭ്രാന്തിയിൽ പല നിയന്ത്രണസംവിധാനങ്ങളും പ്രവർത്തിപ്പിക്കാൻ ശ്രമിച്ചെങ്കിലും ഓട്ടോപൈലറ്റ് മോഡിൽ ആയിരുന്നതിനാൽ വിമാനം സുഗമമായി യാത്ര തുടർന്നു.
ശുചിമുറിയിൽനിന്നു തിരിച്ചെത്തിയ പൈലറ്റ് പതിവുപോലെ കോക്പിറ്റിൽ പ്രവേശിക്കാൻ ശ്രമിച്ചെങ്കിലും സഹപൈലറ്റിന്റെ ‘അനുമതി’ കിട്ടിയില്ല. തുടർന്ന് പൈലറ്റ് വാതിൽ തുറക്കാനുള്ള എമർജൻസി കോഡ് ടൈപ്പ് ചെയ്യാനൊരുങ്ങി.
ഇതിനിടയിൽ സഹപൈലറ്റ് എങ്ങനെയോ വാതിൽ തുറന്നുകൊടുത്തു. നിയന്ത്രണം ഏറ്റെടുത്ത പൈലറ്റ് വിമാനം മഡ്രിഡിൽ അടിയന്തരമായി ഇറക്കി സഹപൈലറ്റിനെ ആശുപത്രിയിലാക്കി. ജർമൻ വാർത്താ ഏജൻസി ഡിപിഎ ആണ് വിവരം പുറത്തുവിട്ടത്.
