ഫോട്ടോകളും വീഡിയോകളും വാട്സാപ്പിലൂടെ ഷെയർ ചെയ്യുമ്പോൾ പ്രൈവസി ഒരു പ്രശ്നമാകുന്നുണ്ടോ? പേടിക്കേണ്ട, ഉപയോക്താക്കളുടെ സ്വകാര്യത മെച്ചപ്പെടുത്തുന്നതിനായി വാട്ട്സ്ആപ്പ് പുതിയ ഫീച്ചർ അവതരിപ്പിക്കുന്നു. ഇനിമുതൽ നിങ്ങൾ അയച്ച ഫോട്ടോകളും വീഡിയോകളും സ്വീകർത്താവിന്റെ ഫോണിൽ ഓട്ടോമാറ്റിക്കായി സേവ് ചെയ്യുന്നത് ഈ ഫീച്ചർ തടയും.
ഈ അപ്ഡേറ്റ് ഉപയോഗിച്ച് ഉപയോക്താക്കൾക്ക് സ്വീകർത്താവിന് കാണാൻ കഴിയുന്ന ഫോട്ടോകളോ വീഡിയോകളോ അയയ്ക്കാൻ കഴിയും. പക്ഷേ, അവ അവരുടെ ഫോണിന്റെ ഗാലറിയിലോ ഫയൽ മാനേജരിലോ സംരക്ഷിക്കാൻ കഴിയില്ല.
അയക്കുന്ന ചിത്രങ്ങളും ദൃശ്യങ്ങളും ചിത്രങ്ങളും സ്വീകർത്താവ് സേവ് ചെയ്യുന്നത് തടയാൻ ഉപയോക്താക്കളെ അനുവദിക്കുന്ന ഈ പുതിയ പ്രൈവസി ഫീച്ചർ ഏറെ ഉപകാരപ്രദമാവും എന്നാണ് കരുതുന്നത്.
ഫോട്ടോയോ വീഡിയോയോ അയയ്ക്കുന്നതിന് മുമ്പ് അത് യാന്ത്രികമായി സംരക്ഷിക്കണോ വേണ്ടയോ എന്ന് ഉപയോക്താക്കൾക്ക് തീരുമാനിക്കാൻ കഴിയും. ഡിസപ്പിയറിങ് മെസേജസ് സവിശേഷതയ്ക്ക് സമാനമായി ഓട്ടോ-സേവിനായി ഓൺ/ഓഫ് ടോഗിൾ രൂപത്തിൽ ഈ ക്രമീകരണം ലഭ്യമാകും. ഈ ഫീച്ചർ പരീക്ഷണ ഘട്ടത്തിലാണ്.
