തിരുവനന്തപുരം: സംസ്ഥാനത്തെ സർക്കാർ ജീവനക്കാരുടെ പെൻഷൻ പ്രായം ഉയർത്തേണ്ടെന്ന് മന്ത്രി സഭാ യോഗം തീരുമാനിച്ചു. നാലാം ഭരണപരിഷ്ക്കാര കമ്മീഷന്റെ ശുപാര്ശകള് പരിശോധിക്കാന് നിയോഗിച്ച ചീഫ് സെക്രട്ടറി അധ്യക്ഷയായ സെക്രട്ടറിതല സമിതിയുടെ ശുപാര്ശകള് ഭേദഗതികളോടെ മന്ത്രിസഭായോഗം അംഗീകരിച്ചു. ഇന്ന് ചേർന്ന യോഗത്തിലാണ് പെന്ഷന് പ്രായം 60 ആയി ഉയര്ത്തണമെന്ന ശുപാര്ശ അംഗീകരിക്കേണ്ടതില്ലെന്ന് തീരുമാനിച്ചത്.(Pension age will not be increased to 60)
വിവിധ സര്വീസ് ചട്ടങ്ങള് സംയോജിപ്പിച്ച് കേരള സിവില് സര്വ്വീസ് കോഡ് രൂപീകരിക്കും. ഇതിനായി ഉദ്യോഗസ്ഥ ഭരണപരിഷ്ക്കാര വകുപ്പിനെ ചുമതലപ്പെടുത്തി. സബോഡിനേറ്റ് സര്വ്വീസിലും സ്റ്റേറ്റ് സര്വ്വീസിലും പ്രൊബേഷന് ഒരു തവണ മാത്രമാകും. എല്ലാ വകുപ്പുകളും രണ്ട് വര്ഷത്തിനകം വിശേഷാല് ചട്ടങ്ങള് രൂപീകരിക്കുന്നതിന് നിര്ദ്ദേശം നല്കും. പ്രത്യേക ലക്ഷ്യത്തോടുകൂടി സൃഷ്ടിക്കപ്പെടുന്ന തസ്തികകള് ലക്ഷ്യം പൂര്ത്തിയായാല് അവസാനിപ്പിക്കും. ഈ വകുപ്പിലെ ജീവനക്കാരെ ആവശ്യമായ മറ്റ് വകുപ്പുകളിലേക്ക് പുനര്വിന്യസിക്കാനും യോഗം തീരുമാനിച്ചു.
സ്ഥലം മാറ്റം സംബന്ധിച്ച തര്ക്കം പരിഹരിക്കുന്നതിനായി സര്വ്വീസ് സംഘടനാ പ്രതിനിധികളെ ഉള്പ്പെടുത്തി സംയുക്ത സമിതി രൂപീകരിക്കാനും ഇന്ന് ചേര്ന്ന യോഗത്തില് തീരുമാനിച്ചിട്ടുണ്ട്. ഏതെങ്കിലും തസ്തികയിലേക്ക് സ്ഥാനക്കയറ്റം ലഭിക്കാന് പ്രത്യേകമായ പരിജ്ഞാനം ആവശ്യമാണെങ്കില് അത് ആര്ജിക്കാന് അര്ഹതാപരീക്ഷ നടത്തുന്നതിനുള്ള ശുപാര്ശ തത്വത്തില് അംഗീകാരം നൽകി.
