ദില്ലി : സർപ്രൈസ് സ്ഥാനാർത്ഥിയായി പാലക്കാട് എംഎൽഎ ഷാഫി പറമ്പിൽ പട്ടികയിലിടം പിടിച്ചപ്പോൾ കെ മുരളീധരനെ വടകരയിൽ നിന്നും തൃശൂരിലേക്ക് മാറ്റി. അവസാന നിമിഷത്തെ വെട്ടിത്തിരുത്തലുകൾക്കും ഒടുവിൽ ലോക്സഭാ തിരഞ്ഞെടുപ്പിനുള്ള കോൺഗ്രസിന്റെ സ്ഥാനാർഥി പട്ടിക പുറത്ത്. കേരളത്തിൽ കോൺഗ്രസ് മത്സരിക്കുന്ന 16 സീറ്റുകളിലെ സ്ഥാനാർഥികളെയും പ്രഖ്യാപിച്ചു. രാഹുൽ ഗാന്ധി, എഐസിസി ജനറൽ സെക്രട്ടറി കെ.സി. വേണുഗോപാൽ, കെപിസിസി പ്രസിഡന്റ് കെ. സുധാകരൻ എന്നിവർ മുതൽ അവസാന നിമിഷം ചിത്രത്തിലേക്കു വന്ന പാലക്കാട് എംഎൽഎ ഷാഫി പറമ്പിൽ വരെയുള്ളവർ പട്ടികയിൽ ഇടംപിടിച്ചു. രാഹുൽ ഗാന്ധി ഇത്തവണയും വയനാട്ടിൽനിന്ന് ജനവിധി തേടും. എഐസിസി ജനറൽ സെക്രട്ടറി കെ.സി. വേണുഗോപാലാണ് സ്ഥാനാർഥികളെ പ്രഖ്യാപിച്ചത്. വയനാട്ടിൽ രാഹുൽ ഗാന്ധി തന്നെ സ്ഥാനാർത്ഥിയാകും. ആലപ്പുഴയിൽ കെ.സി വേണുഗോപാലും മത്സരിക്കും. കണ്ണൂരിൽ സുധാകരൻ മാറിനിൽക്കുമെന്ന അഭ്യൂഹങ്ങളുണ്ടായിരുന്നുവെങ്കിലും സിറ്റിംഗ് സീറ്റിൽ മാറ്റം വേണ്ടെന്ന് തീരുമാനിക്കുകയായിരുന്നു. തൃശൂർ എംപിയായിരുന്ന ടിഎൻ പ്രതാപനാണ് മുരളീധരന്റെ തൃശ്ശൂരിലെ തെരഞ്ഞെടുപ്പ് ചുമതല. മറ്റു സീറ്റുകളിൽ സിറ്റിംഗ് എംപിമാർ തന്നെ മത്സരിക്കും.
തിരുവനന്തപുരം ശശി തരൂർ
ആറ്റിങ്ങൽ അടൂർ പ്രകാശ്
മാവേലിക്കര കൊടിക്കുന്നിൽ സുരേഷ്
പത്തനംതിട്ട ആന്റോ ആന്റണി
ആലപ്പുഴ കെ.സി വേണുഗോപാൽ
എറണാകുളം ഹൈബി ഈഡൻ
ഇടുക്കി ഡീൻ കുര്യാക്കോസ്
ചാലക്കുടി ബെന്നി ബഹ്നാൻ
തൃശൂർ കെ.മുരളീധരൻ
പാലക്കാട് വി. കെ ശ്രീകണ്ഠൻ
ആലത്തൂർ രമ്യ ഹരിദാസ്
കോഴിക്കോട് എം കെ രാഘവൻ
വടകര ഷാഫി പറമ്പിൽ
കണ്ണൂർ കെ.സുധാകരൻ
വയനാട് രാഹുൽ ഗാന്ധി
കാസർകോട് രാജ് മോഹൻ ഉണ്ണിത്താൻ
