കൊച്ചി: കലൂർ അന്താരാഷ്ട്ര സ്റ്റേഡിയത്തിലെ സൗകര്യങ്ങളുടെ കുറവ് കേരള ബ്ലാസ്റ്റേഴ്സിന് തിരിച്ചടിയാകുന്നു. കേരളാ ബ്ലാസ്റ്റേഴ്സിന് പ്രീമിയർ 1 ക്ലബ് ലൈസൻസ് അഖിലേന്ത്യ ഫുട്‌ബോൾ ഫെഡറേഷൻ പുതുക്കി നൽകിയില്ല.കേരളാ ബ്ലാസ്റ്റേഴ്സിന് പുറമെ ജംഷദ്പൂർ എഫ്സി, ഒഡീഷ എഫ്സി, ഹൈദരാബാദ് എഫ്സി എന്നീ ടീമുകൾക്കാണ് പ്രീമിയർ 1 ക്ലബ് ലൈസൻസ് നഷ്ടമായത്. പ്രീമിയർ 1 ക്ലബ്ബ് ലൈസൻസ് ഉണ്ടെങ്കിൽ മാത്രമേ ക്ലബ്ബുകൾക്ക് എഎഫ്‌സി ടൂർണമെന്റുകളിലും ഐഎസ്എല്ലിലും പങ്കെടുക്കാൻ സാധിക്കൂ.
2024-25 സീസണിലേക്ക് നേരിട്ട് ലൈസൻസ് ലഭിച്ച ഏക ക്ലബ്ബാണ് പഞ്ചാബ് എഫ്.സി. മോഹൻ ബഗാൻ സൂപ്പർ ജയന്റ്‌സ്, മുംബൈ സിറ്റി എഫ്സി, ഈസ്റ്റ് ബംഗാൾ, എഫ്സി ഗോവ, ബെംഗളൂരു എഫ്സി, ചെന്നൈയിൻ എഫ്സി, നോർത്ത് ഈസ്റ്റ് യുണൈറ്റഡ് എഫ്സി എന്നിവർക്കാണ് ഉപാധികളോടെ ലൈസൻസ് അനുവദിച്ചത്. ഐ-ലീഗ് ചാമ്പ്യന്മാരായതിന് ശേഷം ഐഎസ്എല്ലിലേക്ക് സ്ഥാനക്കയറ്റം ലഭിച്ച മുഹമ്മദൻ സ്പോർട്ടിംഗ് ക്ലബ്ബിനും ഉപാധികളോടെ അഖിലേന്ത്യ ഫുട്‌ബോൾ ഫെഡറേഷൻ ലൈസൻസ് അനുവദിച്ചിട്ടുണ്ട്. ലൈസൻസ് ലഭിക്കാത്ത ടീമുകൾ അപാകതകൾ പരിഹരിച്ച് വീണ്ടും അപേക്ഷിക്കേണ്ടി വരുമെന്നാണ് വിവരം. വീണ്ടും ഐഐഎഫ്എഫ് അപേക്ഷ നിരസിച്ചാൽ ടൂർണമെന്റിൽ നിന്ന് പുറത്താകും.
ക്ലബ്ബിന്റെ അടിസ്ഥാന സൗകര്യങ്ങൾ, പ്രൊഫഷണലിസം എന്നിവ മാനദണ്ഡമാക്കിയാണ് എഐഎഫ്എഫ് പ്രീമിയർ 1 ലൈസൻസ് നൽകുന്നത്. എന്നാൽ കൊച്ചി സ്റ്റേഡിയത്തിലെ അടിസ്ഥാന സൗകര്യങ്ങളിലെ പ്രശ്നമാണ് ബ്ലാസ്റ്റേഴ്സിന് പ്രീമിയർ 1 ലൈസൻസ് ലഭിക്കാതിരിക്കാൻ കാരണമായതെന്നാണ് ഐഎഫ്ടി ന്യൂസ് റിപ്പോർട്ട് ചെയ്യുന്നത്.
