ന്യൂഡല്ഹി: രാജ്യത്ത് കോവിഡിന്റെ പുതിയ വകഭേദമായ എക്സ്എഫ്ജി പടരുന്നു. നിലവിൽ രാജ്യത്തെ 163 പേർക്കാണ് എക്സ്എഫ്ജി ബാധിച്ചത്.
കാനഡയിലാണ് ആദ്യം എക്സ്എഫ്ജി റിപ്പോര്ട്ട് ചെയ്തത്. 2021 അവസാനം മുതൽ ആഗോളതലത്തിൽ വ്യാപിച്ച കോവിഡ് വകഭേദമായ ഒമൈക്രോൺ കുടുംബത്തിലാണ് എക്സ്എഫ്ജിയെ ഉൾപ്പെടുത്തിയിരിക്കുന്നത്.
മഹാരാഷ്ട്രയിലാണ് ഏറ്റവും കൂടുതൽ എക്സ്എഫ്ജി കേസുകൾ (89) റിപ്പോർട്ട് ചെയ്തിരിക്കുന്നത്, തമിഴ്നാടാണ് തൊട്ടുപിന്നില്. 16 കേസുകളാണ് തമിഴ്നാട്ടില് റിപ്പോര്ട്ട് ചെയ്തത്.
കേരളം (15), ഗുജറാത്ത് (11), ആന്ധ്രാപ്രദേശ്, മധ്യപ്രദേശ്, പശ്ചിമ ബംഗാൾ എന്നിവടങ്ങളില് ആറ് കേസുകള് വീതവും റിപ്പോര്ട്ട് ചെയ്തിട്ടുണ്ട്. ഇതില് 159 കേസുകള് മേയ് മാസത്തിലും ഏപ്രിൽ, ജൂൺ മാസങ്ങളിൽ രണ്ട് വീതം കേസുകളുമാണ് റിപ്പോർട്ട് ചെയ്തത്.
അതേസമയം, നിലവിൽ, എക്സ്എഫ്ജി കൂടുതൽ ഗുരുതരമായ രോഗത്തിനോ ആശുപത്രിയിൽ പ്രവേശിപ്പിക്കലിനോ കാരണമാകില്ലെന്നു ഡോക്ടര്മാര് പറയുന്നു.
രാജ്യത്തെ കോവിഡ് രോഗികളുടെ എണ്ണം 7000 ത്തിലേക്ക് കടക്കുകയാണ്. ഏറ്റവും കൂടുതൽ രോഗബാധിതരുള്ള സംസ്ഥാനം കേരളമാണ്. കഴിഞ്ഞ 24 മണിക്കൂറിനുള്ളിൽ ഏകദേശം 1,957 സജീവ കേസുകളും ഏഴ് പുതിയ കേസുകളുമാണ് കേരളത്തില് റിപ്പോർട്ട് ചെയ്തിട്ടുള്ളത്. ഗുജറാത്ത്, കര്ണാടക, ബംഗാള്, ഡല്ഹി എന്നിവിടങ്ങളിലും രോഗികളുടെ എണ്ണം കൂടുതലാണ്.
