രാജ്യത്തെ ഏറ്റവും ജനപ്രിയമായ UPI പേയ്‌മെന്റ് ആപ്പുകളിൽ ഒന്നാണ് ഗൂഗിൾ പേ. ഇന്ത്യയിലെ വിപണി വിഹിതത്തിന്റെ അടിസ്ഥാനത്തിൽ ഏറ്റവും കൂടുതൽ ഉപയോഗിക്കുന്ന 5 UPI ആപ്പുകളിൽ ഒന്നാണ് ആപ്പ്. എന്നാൽ, ഇതിലൂടെ ഒരുപാട് തട്ടിപ്പുകളും ഇപ്പോൾ നടക്കുന്നുണ്ട്. ഗൂഗിൾ പേ ഉപയോക്താക്കൾ ഒരിക്കലും ചെയ്യാൻ പാടില്ലാത്ത ചില പ്രധാനപ്പെട്ട കാര്യങ്ങൾ ഗൂഗിൾ ഇപ്പോൾ വെബ്‌സൈറ്റിലൂടെ അറിയിച്ചിരിക്കുകയാണ്.

”ഏറ്റവും മികച്ച ആർട്ടിഫിഷ്യൽ ഇന്റലിജൻസ് ടെക്നോളജിയും തട്ടിപ്പുകൾ തടയാനുള്ള സാങ്കേതിക വിദ്യകളുമാണ് ഞങ്ങൾ ഉപയോഗിക്കുന്നത്. എങ്കിലും നിങ്ങൾ ചെയ്യേണ്ട ചില കാര്യങ്ങൾ കൂടിയുണ്ട്. എങ്കിൽ മാത്രമേ തട്ടിപ്പുകളിൽ നിന്നും പൂർണ്ണമായും ഒഴിവാക്കാൻ നിങ്ങൾക്ക് സാധിക്കൂ” ഗൂഗിൾ മുന്നറിയിപ്പ് നൽകുന്നു.

ഗൂഗിൾ നൽകുന്ന ഏറ്റവും പ്രധാന മുന്നറിയിപ്പ് , ഗൂഗിൾ പേ ഉപയോഗിക്കുന്ന ഫോണുകളിൽ ഒരു കാരണവശാലും മറ്റ് സ്ക്രീൻ ഷെയറിങ് ആപ്പുകൾ ഉപയോഗിക്കരുത് എന്നാണ്. നിങ്ങൾ ഫോണോ ടാബ്‌ലെറ്റോ കമ്പ്യൂട്ടറോ ഉപയോഗിക്കുന്നുണ്ടെങ്കിലും നിങ്ങളുടെ ഉപകരണത്തിന്റെ സ്‌ക്രീനിൽ എന്താണ് ഉള്ളതെന്ന് കാണാൻ മറ്റുള്ളവരെ അനുവദിക്കുന്നവയാണ് സ്‌ക്രീൻ പങ്കിടൽ ആപ്പുകൾ. നിങ്ങളുടെ ഫോണിന്റെ/ഉപകരണത്തിന്റെ പൂർണ്ണമായ ആക്സസും നിയന്ത്രണവും മറ്റുള്ള ഡിവൈസ് ഏറ്റെടുക്കുന്ന പ്രക്രിയയാണ് ഈ ആപ്പിലൂടെ ചെയ്യുന്നത്. സ്‌ക്രീൻ ഷെയർ, AnyDesk, TeamViewer എന്നീ ആപ്പുകൾ ഒരിക്കലും ഗൂഗിൾ പേ ഉള്ള ഫോണിൽ ഉപയോഗിക്കരുത് എന്ന് ഗൂഗിൾ മുന്നറിയിപ്പ് തരുന്നു. ഗൂഗിള്‍ പേ തുറക്കുകയോ ഇടപാടുകള്‍ നടത്തുകയോ ചെയ്യുന്നതിന് മുമ്പ് ഫോണില്‍ സ്ക്രീന്‍ ഷെയറിങ് ആപ്ലിക്കേഷനുകള്‍ പ്രവര്‍ത്തിക്കുന്നില്ലെന്ന് ഉറപ്പുവരുത്തണം.

ഗൂഗിൾ പേ ഉപയോക്താക്കൾ സ്‌ക്രീൻ പങ്കിടൽ ആപ്പുകൾ ഉപയോഗിക്കരുത് എന്നതിന്റെ കാരണം തട്ടിപ്പുകാർക്ക് ഈ ആപ്പുകൾ ഉപയോഗിക്കാം എന്നതാണ്. ഇതുവഴി നിങ്ങളുടെ പേരിൽ ഇടപാടുകൾ നടത്താൻ നിങ്ങളുടെ ഫോൺ നിയന്ത്രിക്കാൻ അവർക്കു സാധിക്കും. അതുപോലെ, നിങ്ങളുടെ ഫോണിലേക്ക് അയച്ച OTP മറ്റൊരാൾ കാണാനും നിങ്ങളുടെ അക്കൗണ്ടിൽ നിന്ന് പണം ട്രാൻസ്ഫർ ചെയ്യാൻ ഉപയോഗിക്കാനും ഈ ആപ്പ് വഴിയൊരുക്കും.

ഒരു തേർഡ് പാർട്ടി ആപ്പ് ഡൗൺലോഡ് ചെയ്യാനോ ഇൻസ്‌റ്റാൾ ചെയ്യാനോ ഗൂഗിൾ പേ ഒരിക്കലും ആവശ്യപ്പെടുന്നില്ലെന്ന് ശ്രദ്ധിക്കണമെന്ന് ഗൂഗിൾ ഉപയോക്താക്കൾക്ക് മുന്നറിയിപ്പ് നൽകുന്നു. ഈ ആപ്പുകൾ ഡൗൺലോഡ് ചെയ്‌തിട്ടുണ്ടെങ്കിൽ, Google Pay ഉപയോഗിക്കുന്നതിന് മുമ്പ്, അവ പൂർണ്ണമായും ക്ലോസ് ചെയ്തു എന്നുറപ്പാക്കണം. ആരെങ്കിലും Google Pay പ്രതിനിധിയായി എത്തി ഈ ആപ്പുകൾ ഡൗൺലോഡ് ചെയ്യാൻ നിർദ്ദേശം നൽകിയാൽ ഉടൻ തന്നെ അവ അൺഇൻസ്‌റ്റാൾ ചെയ്‌ത് ഇല്ലാതാക്കുക.