പേടിച്ചു പോയെന്ന് പറഞ്ഞേക്ക്; ഒരു ഒറിജിനൽ കാർഡ് വരാനുണ്ടെന്നതിന് മറുപടിയുമായി നികേഷ് കുമാർ
പ്രതിപക്ഷ നേതാവ് വി.ഡി. സതീശൻ നടത്തിയ “ഒരു ഒറിജിനൽ കാർഡ് വരാനുണ്ട്” എന്ന മുന്നറിയിപ്പിന് പരിഹാസ പ്രതികരണവുമായി മുൻ മാധ്യമപ്രവർത്തകനും സിപിഎം നവമാധ്യമ വിഭാഗം മേധാവിയുമായ എം.വി. നികേഷ് കുമാർ.
“പേടിച്ചു പോയെന്ന് പറഞ്ഞേക്ക്” എന്നായിരുന്നു ഫെയ്സ്ബുക്കിലൂടെ നികേഷ് കുമാറിന്റെ മറുപടി.
എകെജി സെന്ററിൽ ഇരുന്ന് ഒരാൾ തനിക്കെതിരെ ദിവസേന പത്ത് വ്യാജ പ്രചാരണ കാർഡുകൾ അടിച്ചിറക്കുകയാണെന്നായിരുന്നു എം.വി. നികേഷ് കുമാറിനെ പരോക്ഷമായി ലക്ഷ്യമിട്ട് വി.ഡി. സതീശൻ ഉന്നയിച്ച ആരോപണം.
“എല്ലാം കഴിയുമ്പോൾ അയാളോട് പറഞ്ഞേക്ക്, അയാളുടെ പേരിൽ ഒരു ഒറിജിനൽ കാർഡ് വരാനുണ്ട്” എന്നായിരുന്നു സതീശന്റെ മുന്നറിയിപ്പ്.
ഇതിന് മറുപടിയായാണ് സതീശന്റെ പ്രസംഗ വീഡിയോ പങ്കുവെച്ചുകൊണ്ട് നികേഷ് കുമാർ പരിഹാസ പോസ്റ്റ് നടത്തിയത്. സതീശന്റെ മുന്നറിയിപ്പിനെ രാഷ്ട്രീയ പരിഹാസത്തിലൂടെയാണ് നികേഷ് കുമാർ നേരിട്ടത്.
സംഭവത്തിന് പിന്നാലെ ഇരുവരുടെയും വാക്കുകൾ സാമൂഹ്യമാധ്യമങ്ങളിൽ വലിയ രാഷ്ട്രീയ ചർച്ചകൾക്ക് വഴിതുറന്നിട്ടുണ്ട്.
ഇതിനിടെ, ശബരിമല സ്വർണക്കടത്ത് കേസിൽ ദേവസ്വം ബോർഡ് മുൻ പ്രസിഡന്റ് പത്മകുമാറിനെതിരെ എന്തുകൊണ്ട് നടപടി എടുക്കുന്നില്ലെന്ന ചോദ്യവും വി.ഡി. സതീശൻ ഉയർത്തി.
പത്മകുമാറിനെതിരെ എസ്ഐടി ഹൈക്കോടതിയിൽ നൽകിയിരിക്കുന്നത് ഗുരുതര ആരോപണങ്ങളാണെന്നും സിപിഎം നേതാക്കളെ സർക്കാർ സംരക്ഷിക്കുകയാണെന്നും അദ്ദേഹം കുറ്റപ്പെടുത്തി.
“അയ്യപ്പന്റെ സ്വർണം കവർന്നവർക്കാണ് സർക്കാർ കുടപിടിക്കുന്നത്” എന്നായിരുന്നു സതീശന്റെ വിമർശനം.
അതേസമയം, ചൂരൽമല ദുരന്തവുമായി ബന്ധപ്പെട്ട് കോൺഗ്രസ് പ്രഖ്യാപിച്ച വീടുകൾ ഉടൻ യാഥാർഥ്യമാകുമെന്നും സതീശൻ പറഞ്ഞു.
കോൺഗ്രസ് പ്രഖ്യാപിച്ച പല പദ്ധതികളും ഇതിനകം നടപ്പാക്കിയതായും, കർണാടക സർക്കാരിന്റെ സഹായം കൈമാറിയതായും, മുസ്ലിം ലീഗ് പ്രഖ്യാപിച്ച വീടുകളുടെ നിർമ്മാണം പൂർത്തിയായതായും അദ്ദേഹം വ്യക്തമാക്കി.
യുഡിഎഫുമായി ബന്ധപ്പെട്ട ഏകദേശം 300 വീടുകൾ ഉടൻ പൂർത്തിയാകുമെന്നും, യൂത്ത് കോൺഗ്രസ് പ്രഖ്യാപിച്ച വീടുകളുടെ തുടർനടപടികളും ആരംഭിക്കുമെന്നും സതീശൻ അറിയിച്ചു.
English Summary
CPM social media head and former journalist M.V. Nikesh Kumar has responded sarcastically to Opposition Leader V.D. Satheesan’s warning that an “original card” would be released against him. Sharing Satheesan’s speech video on Facebook, Nikesh Kumar remarked, “Tell him I got scared.” Satheesan had accused CPM’s media machinery at the AKG Centre of circulating fake propaganda cards against him.
mv-nikesh-kumar-sarcastic-reply-vd-satheesan-original-card-row
VD Satheesan, MV Nikesh Kumar, CPM, Congress, Kerala politics, political controversy, social media reaction, AKG Centre, Sabarimala gold case
