റമദാനില് കൈവരിച്ച ആത്മവിശുദ്ധിയുടെ കരുത്തുമായി നമസ്ക്കാരത്തിനായി ഈദ് ഗാഹുകളും മസ്ജിദുകളും ഒരുങ്ങിക്കഴിഞ്ഞു. ആഘോഷത്തിനായി ഒരു ജനതയും. സംസ്ഥാനത്ത് ഇന്ന് ചെറിയ പെരുന്നാള്. സംസ്ഥാനത്ത് 29 ദിവസത്തെ വ്രതാനുഷ്ഠാനം പൂര്ത്തിയാക്കിയാണ് ഇസ്ലാം മത വിശ്വാസികള് ചെറിയ പെരുന്നാള് ആഘോഷിക്കുന്നത്.
പൊന്നാനി കടപ്പുറത്ത് ഇന്നലെ മാസപ്പിറ കണ്ടതിനെ തുടര്ന്ന് വിവിധ ഖാസിമാര് ഇക്കാര്യം സ്ഥിരീകരിച്ചു. പ്രഖ്യാപനം വന്നതോടെ പള്ളികളില് നിന്നും തഖ്ബീര് ധ്വനികള് മുഴങ്ങി. ഇതോടെ ചെറിയ പെരുന്നാളിന്റെ ആഘോഷങ്ങളിലേക്ക്വിശ്വാസികൾ കടന്നു. ഒരുമിച്ച് കൂടിയും പരസ്പരം സ്നേഹം പങ്കുവെച്ചുമാണ് ഇന്ന് കുടുംബങ്ങള് ഒത്തുകൂടുന്നത്. പെരുന്നാളിനെ വരവേല്ക്കാന് പള്ളികളും ഈദ്ഗാഹുകളും തയ്യാറായി. അതേസമയം ഉത്തരേന്ത്യയിലും ദില്ലിയിലും നാളെയാണ് ചെറിയ പെരുന്നാൾ ആഘോഷിക്കുന്നത്.
ഗവർണറും മുഖ്യമന്ത്രിയും വിശ്വാസികൾക്ക് പെരുന്നാൾ ആശംസകൾ നേർന്നു. ചെറിയ പെരുന്നാള് ആഘോഷങ്ങള് ഉന്നതമായ സാഹോദര്യത്തിന്റെ പ്രതിഫലനമാകട്ടെയെന്ന് മുഖ്യമന്ത്രി ആശംസിച്ചു. സമൂഹത്തിൽ വർഗീയ വിഷം ചീറ്റി ഐക്യത്തിൽ വിള്ളലുണ്ടാക്കാൻ ശ്രമിക്കുന്ന പിന്തിരിപ്പൻ ശക്തികളെ കരുതിയിരിക്കണമെന്നും മുഖ്യമന്ത്രി ഫേസ്ബുക്കിലൂടെ ആശംസിച്ചു.
