കൊച്ചി: കാര് വര്ക്ക്ഷോപ്പില് വന്തീപ്പിടിത്തം. നിരവധി കാറുകള്ക്ക് കേടുപാടുകള് സംഭവിച്ചു. കൊച്ചി-ധനുഷ്കോടി ദേശീയ പാതയില് പുത്തന്കുരിശ് മാനന്തടത്ത് കാര് വര്ക്ക്ഷോപ്പിലാണ് തീപിടുത്തം ഉണ്ടായത്.
വെള്ളിയാഴ്ച പുലര്ച്ചെ മൂന്ന് മണിയോടെയാണ് സംഭവം. എസ്.എം. ഓട്ടോമൊബൈല്സ് എന്ന സ്ഥാപനത്തിലാണ് അപകടമുണ്ടായത്. വര്ക്ക്ഷോപ്പിന് അകത്തുണ്ടായിരുന്ന പന്ത്രണ്ടോളം കാറുകള് ഭാഗികമായി കത്തിയിട്ടുണ്ട്.
പത്തോളം കാറുകള് കേടുപാടുകള് കൂടാതെ പുറത്തെത്തിക്കാൻ കഴിഞ്ഞു. മൂന്നു മണിക്കൂറോളം നീണ്ട പ്രയത്നത്തിനൊടുവിലാണ് അഗ്നിരക്ഷാസേന തീ നിയന്ത്രണ വിധേയമാക്കിയത്.
പട്ടിമറ്റം, തൃപ്പൂണിത്തുറ, ഗാന്ധിനഗര് എന്നീ നിലയങ്ങളില് നിന്നായി അഞ്ച് യൂണിറ്റുകളും 30 സേനാംഗങ്ങളും എത്തിയാണ് തീയണച്ചത്. പട്ടിമറ്റം അഗ്നിരക്ഷാ നിലയം സ്റ്റേഷന് ഓഫീസര് എന്.എച്ച്. അസൈനാര്, സ്റ്റേഷന് ഓഫീസര് കെ.വി. മനോഹരന് എന്നിവര് നേതൃത്വം നല്കി.
