ജോലി കഴിഞ്ഞ് മടങ്ങുകയായിരുന്ന യുവ വനിതാഡോക്ടറെ പീഡിപ്പിച്ച യുവാവ് അറസ്റ്റിൽ.
ബെംഗളൂരു: ജോലി കഴിഞ്ഞ് പിജിയിലേക്കു മടങ്ങുകയായിരുന്ന യുവതി ഡോക്ടറെ പീഡിപ്പിച്ച കേസിൽ യുവാവ് അറസ്റ്റിൽ. സോലദേവനഹള്ളി പൊലീസ് രാകേഷ് (21) എന്ന യുവാവിനെയാണ് പിടികൂടിയത്.
കഴിഞ്ഞ 16-ാം തീയതി രാത്രി നടന്ന സംഭവമാണ് നഗരത്തിൽ വലിയ ആശങ്കയും പ്രതിഷേധവും സൃഷ്ടിച്ചത്.
രാത്രി ഡ്യൂട്ടി പൂർത്തിയാക്കി സ്കൂട്ടറിൽ പിജിയിലേക്കു മടങ്ങുന്നതിനിടെയാണ് യുവതി ആക്രമിക്കപ്പെട്ടത്. അതേ വഴിയിലൂടെ സ്കൂട്ടറിലെത്തിയ പ്രതി യുവതിയെ തടഞ്ഞുനിർത്തി അക്രമിക്കാൻ ശ്രമിക്കുകയായിരുന്നു.
യുവതി പ്രതിരോധിക്കാൻ ശ്രമിച്ചെങ്കിലും ആളൊഴിഞ്ഞ പ്രദേശത്തേക്കു ബലമായി കൊണ്ടുപോയി പീഡിപ്പിച്ചുവെന്നാണ് പൊലീസ് പറയുന്നത്.
സംഭവത്തിന് ശേഷം ഗുരുതര മാനസികാഘാതം അനുഭവിച്ച യുവതി ഉടൻ തന്നെ പൊലീസിൽ പരാതി നൽകി. പരാതി ലഭിച്ച ഉടൻ തന്നെ സോലദേവനഹള്ളി പൊലീസ് പ്രത്യേക അന്വേഷണ സംഘം രൂപീകരിക്കുകയും ചെയ്തു.
ജോലി കഴിഞ്ഞ് മടങ്ങുകയായിരുന്ന യുവ വനിതാഡോക്ടറെ പീഡിപ്പിച്ച യുവാവ് അറസ്റ്റിൽ.
സംഭവസ്ഥലത്തെയും സമീപ പ്രദേശങ്ങളിലെയും സിസിടിവി ദൃശ്യങ്ങൾ വിശദമായി പരിശോധിച്ചതോടെയാണ് പ്രതിയെ തിരിച്ചറിഞ്ഞത്.
സിസിടിവി ദൃശ്യങ്ങളിൽ പ്രതിയുടെ സ്കൂട്ടറും നീക്കങ്ങളും വ്യക്തമായിരുന്നു. ഇതിന്റെ അടിസ്ഥാനത്തിൽ നടത്തിയ വ്യാപക പരിശോധനയിൽ പ്രതിയെ പൊലീസ് കസ്റ്റഡിയിൽ എടുക്കുകയായിരുന്നു.
ചോദ്യം ചെയ്യലിൽ പ്രതി കുറ്റം സമ്മതിച്ചതായും പൊലീസ് അറിയിച്ചു. പ്രതിക്കെതിരെ ലൈംഗികാതിക്രമം, ബലപ്രയോഗം, സ്ത്രീകളെ അപമാനിക്കൽ തുടങ്ങിയ കുറ്റങ്ങൾ ചുമത്തിയിട്ടുണ്ട്.
നഗരത്തിൽ സ്ത്രീസുരക്ഷയെ കുറിച്ചുള്ള ആശങ്കകൾ വീണ്ടും ശക്തമായിരിക്കുകയാണ്. പ്രത്യേകിച്ച് രാത്രികാലങ്ങളിൽ ജോലി ചെയ്യുന്ന വനിതകൾക്ക് സുരക്ഷ ഉറപ്പാക്കണമെന്ന് ആവശ്യപ്പെട്ട് വിവിധ സംഘടനകളും രംഗത്തെത്തി.
സംഭവത്തിൽ ശക്തമായ നടപടികൾ സ്വീകരിക്കുമെന്നും കുറ്റവാളികൾക്കെതിരെ കർശനമായ നിയമനടപടികൾ ഉണ്ടാകുമെന്നും പൊലീസ് വ്യക്തമാക്കി.
ഈ സംഭവം നഗരത്തിലെ സുരക്ഷാ സംവിധാനങ്ങളുടെ കാര്യക്ഷമതയെ കുറിച്ചും ചർച്ചകൾക്ക് വഴിവച്ചിട്ടുണ്ട്. സിസിടിവി നിരീക്ഷണവും പൊലീസ് പട്രോളിംഗും കൂടുതൽ ശക്തമാക്കുമെന്ന് അധികൃതർ അറിയിച്ചു.
യുവതി നിലവിൽ സുരക്ഷിതയാണെന്നും ആവശ്യമായ സഹായങ്ങളും കൗൺസലിംഗും നൽകുന്നുണ്ടെന്നും പൊലീസ് അറിയിച്ചു.
