മഹീന്ദ്രയുടെ പുതിയമോഡലുകൾക്കെല്ലാം സുരക്ഷയിലും ഫീച്ചറുകളിലും ഫുൾ മാർക്കാണ്. ഇടിപ്പരീക്ഷയിലും മഹീന്ദ്ര ഥാർ റോക്സിന് ഫൈവ് സ്റ്റാർ സുരക്ഷാ റേറ്റിങ്ങ് ലഭിച്ചതോടെ ഇപ്പോൾ മൊത്തത്തിൽ പക്കാ ഫാമിലി എസ്യുവിയായി മാറി. ഭാരത് എൻസിഎപിയുടെ ക്രാഷ് ടെസ്റ്റിൽ ഫൈവ് സ്റ്റാർ നേടിയിരിക്കുകയാണ് മഹീന്ദ്ര ഥാർ റോക്സ്.
മുതിർന്നവരുടെ സംരക്ഷണത്തിന് 32-ൽ 31.09 പോയിന്റും കുട്ടികളുടെ സേഫ്റ്റിക്ക് 49-ൽ 45 പോയിന്റും സ്കോർ ചെയ്താണ് മഹീന്ദ്ര ഥാർ റോക്സ് 5-സ്റ്റാർ സേഫ്റ്റി റേറ്റിംഗ് നേടിയെടുത്തത്. ഭാരത് NCAP-ൽ ഥാർ റോക്സിൻ്റെ AX5L, MX3 വേരിയന്റുകളാണ് പരീക്ഷണത്തിന് ഇറക്കിയത്.
മുതിർന്ന യാത്രക്കാരുടെ ഫ്രണ്ടൽ ഓഫ്സെറ്റ് ഡിഫോർമബിൾ ബാരിയർ ടെസ്റ്റിൽ ഥാർ റോക്സ് 16-ൽ 15.09 സ്കോർ ചെയ്തു. സൈഡ് മൂവബിൾ ഡിഫോർമബിൾ ബാരിയർ ടെസ്റ്റിൽ 16-ൽ 16 പോയിന്റും നേടിയെടുക്കാനായി എന്നതും ശ്രദ്ധേയം.
ഡ്രൈവറുടെ നെഞ്ചിനും താഴത്തെ കാലിനും മതിയായ സംരക്ഷണം നൽകിയതിന് പുറമെ എല്ലാ ശരീര ഭാഗങ്ങൾക്കും അപകട സമയത്ത് വാഹനം നല്ല സംരക്ഷണം നൽകുമെന്നും ക്രാഷ് ടെസ്റ്റിൽ തെളിഞ്ഞിട്ടുണ്ട്.
അടുത്തിടെയാണ് മഹീന്ദ്ര ഥാർ റോക്സ് വിപണിയിലെത്തിയത്. ഓഗസ്റ്റ് 15-ന് അവതരിപ്പിച്ച ഈ വാഹനത്തിന്റെ ബുക്കിങ്ങ് ഒക്ടോബർ മൂന്നിനാണ് ആരംഭിച്ചത്. ബുക്കിങ്ങ് തുറന്ന് ആദ്യമണിക്കൂറിൽ തന്നെ 1.76 ലക്ഷം ആളുകളാണ് ഈ വാഹനം സ്വന്തമാക്കാൻ എത്തിയത്.
നിലവിലെ ബുക്കിങ് രണ്ടുലക്ഷം കടന്നിട്ടുണ്ടാകാനാണ് സാധ്യത. ഥാർ റോക്സ് സ്വന്തമാക്കാൻ ആളുകൾ മത്സരിച്ച് എത്തിയതോടെ കാത്തിരിപ്പ് കാലാവധിയും കുത്തനെ ഉയർന്നിരിക്കുകയാണെന്നാണ് റിപ്പോർട്ട്.
ടൂ വീൽ ഡ്രൈവ്, ഫോർ വീൽ ഡ്രൈവ് എന്നീ രണ്ട് ഡ്രൈവിങ് മോഡലുകളിൽ ലഭിക്കുന്ന വാഹനമാണ് ഥാർ റോക്സ്. ഈ വാഹനത്തിന്റെ 4ഃ2 മോഡലുകൾക്ക് 12.99 ലക്ഷം രൂപ മുതൽ 20.49 ലക്ഷം രൂപ വരെയാണ് ഈ വാഹനത്തിന്റെ എക്സ്ഷോറൂം വില.
അതേസമയം, ഈ വാഹനത്തിന്റെ 4ഃ4 മോഡലുകളുടെ മാനുവൽ പതിപ്പുകൾക്ക് 18.79 ലക്ഷം രൂപ മുതൽ 20.99 ലക്ഷം രൂപ വരെയും ഓട്ടോമാറ്റിക് മോഡലുകൾക്ക് 20.99 ലക്ഷം രൂപ മുതൽ 22.49 ലക്ഷം രൂപ വരെയുമാണ് എക്സ്ഷോറൂം വില.
ഥാർ ലൈനപ്പിൽ പെട്രോൾ-ഡീസൽ എൻജിനുകൾ ഉണ്ടെങ്കിലും ഡീസൽ എൻജിന്റെ കരുത്തിൽ മാത്രമാണ് 4ഃ4 പതിപ്പ് പുറത്തിറക്കിയിരിക്കുന്നത്. ഡി22 എന്നാണ് ഥാറിലെ ഡീസൽ എൻജിനെ വിശേഷിപ്പിക്കുന്നത്.
2.2 ലിറ്റർ എംഹോക്ക് ഡീസൽ എൻജിൻ 175 പി.എസ്. പവറും 370 എൻ.എം. ടോർക്കും ഉത്പാദിപ്പിക്കും. ആറ് സ്പീഡ് മാനുവൽ, ആറ് സ്പീഡ് ടോർക്ക് കൺവർട്ടർ ഓട്ടോമാറ്റിക് എന്നിവയാണ് ഈ വാഹനത്തിൽ ട്രാൻസ്മിഷൻ ഒരുക്കിയിരിക്കുന്നത്. 2.0 ലിറ്റർ ശേഷിയുള്ള പെട്രോൾ എൻജിൻ 177 പി.എസ്. പവറും 375 എൻ.എം. ടോർക്കുമാണ് ഉത്പാദിപ്പിക്കുന്നത്.
