പൂചൂടാൻ നൽകണം പൊന്നുംവില; മധുര മുല്ലയ്ക്ക് വില കിലോഗ്രാമിന് 12,000 രൂപ
ചെന്നൈ: പൊങ്കൽ ആഘോഷങ്ങൾക്ക് ദിവസങ്ങൾ മാത്രം ബാക്കി നിൽക്കേ തമിഴ്നാട്ടിൽ മുല്ലപ്പൂവിന്റെ വില റെക്കോർഡ് ഉയരത്തിലെത്തി.
മധുര മുല്ലക്ക് കിലോഗ്രാമിന് 12,000 രൂപ വരെ വില ഉയർന്നതോടെ സാധാരണക്കാർക്ക് പൂക്കൾ വാങ്ങുക തന്നെ ബുദ്ധിമുട്ടായിരിക്കുകയാണ്.
മുല്ലപ്പൂവിന്റെ വരവ് ഗണ്യമായി കുറഞ്ഞതും ഉത്സവസീസണിൽ ആവശ്യകത കുത്തനെ ഉയർന്നതുമാണ് വില വർധനയ്ക്ക് കാരണം.
മധുരയിലെ പ്രധാന പുഷ്പ വിപണികളായ ഉസിലംപട്ടി, തിരുമംഗലം എന്നിവിടങ്ങളിലാണ് കിലോഗ്രാമിന് 12,000 രൂപ എന്ന നിരക്കിൽ വ്യാപാരം നടക്കുന്നത്.
കഴിഞ്ഞ ആഴ്ചവരെ കിലോഗ്രാമിന് 2,000 രൂപയായിരുന്ന മുല്ലപ്പൂവിന്റെ വിലയാണ് ഇത്രയും വേഗത്തിൽ കുതിച്ചത്.
മധുര മുല്ലപ്പൂവിന്റെ ഏകദേശം 70 ശതമാനവും ഉസിലംപട്ടിയിലും പരിസര പ്രദേശങ്ങളിലുമാണ് കൃഷി ചെയ്യുന്നത്.
തണുപ്പ് കൂടിയതോടെ ഉൽപാദനം കുറഞ്ഞതും മാർഗഴി മാസത്തിൽ പൂക്കൾക്ക് ആവശ്യകത വർധിച്ചതുമാണ് വില വർധനയ്ക്ക് പ്രധാന കാരണമായി വ്യാപാരികൾ ചൂണ്ടിക്കാട്ടുന്നത്.
തമിഴ്നാട്ടിൽ മാത്രമല്ല, കേരളത്തിലും മുല്ലപ്പൂവിന് പൊന്നുംവിലയാണ്. കൊച്ചിയിൽ കിലോഗ്രാമിന് 6,000 മുതൽ 7,000 രൂപ വരെയാണ് നിലവിലെ വില. മുല്ലപ്പൂ മാലകളുടെ വിലയും കുത്തനെ ഉയർന്നിട്ടുണ്ട്;
ഒരു ചെറിയ മാലയ്ക്ക് പോലും 100 രൂപയ്ക്ക് മുകളിലാണ് വില. ശനി, ഞായർ ദിവസങ്ങളിൽ ചില്ലറ വില ഇരട്ടിയാകുന്ന സാഹചര്യമാണുള്ളത്.
കോയമ്പത്തൂർ, മധുര, സത്യമംഗലം, മേട്ടുപ്പാളയം തുടങ്ങിയ കേന്ദ്രങ്ങളിൽ നിന്ന് പൂക്കളുടെ വരവ് പകുതിയിലധികം കുറഞ്ഞതായി മൊത്തവ്യാപാരികൾ പറയുന്നു.
വില 6,000 രൂപ കടന്നതോടെ വലിയൊരു വിഭാഗം കച്ചവടക്കാർ മുല്ലപ്പൂ വാങ്ങുന്നത് നിർത്തിയിരിക്കുകയാണ്.
ഉയർന്ന വില നൽകി വാങ്ങിയ പൂക്കൾ അന്നേ ദിവസം വിറ്റുപോയില്ലെങ്കിൽ വൻ നഷ്ടം സംഭവിക്കുമെന്ന ആശങ്കയും വ്യാപാരികൾ പങ്കുവയ്ക്കുന്നു.
ഭൗമസൂചികാ (GI) പദവിയുള്ള മധുര മല്ലിപ്പൂ, ശക്തവും ദീർഘനേരം നിലനിൽക്കുന്ന സുഗന്ധവും നക്ഷത്രാകൃതിയുമാണ് പ്രത്യേകത.
മുല്ലപ്പൂവിനൊപ്പം കനകാംബരം, പിച്ചി തുടങ്ങിയ മറ്റ് പൂവുകളുടെ വിലയും ഗണ്യമായി ഉയർന്നിട്ടുണ്ട്.
English Summary
Ahead of Pongal celebrations, the price of Madurai jasmine in Tamil Nadu has surged to a record ₹12,000 per kilogram. Reduced supply due to colder weather and a sharp rise in festive demand have pushed prices up. The impact is also felt in Kerala, where jasmine prices have crossed ₹6,000–₹7,000 per kg, with garland prices rising steeply.
madurai-jasmine-price-record-pongal
Madurai jasmine, mullapoo price, Pongal festival, flower price hike, Tamil Nadu news, Kerala market, GI tagged products, agriculture, festive season
