ശ്രീവില്ലിപ്പുത്തൂർ: ക്ഷേത്ര ശ്രീകോവിലിനുള്ളിൽ കയറിയ സംഗീത സംവിധായകൻ ഇളയരാജയെ തിരിച്ചിറക്കിയ വിഷയത്തിൽ പ്രതികരിച്ചിരിക്കുകയാണ് ഗാനരചിതാവ് രാജീവ് ആലുങ്കൽ. വാർത്തയ്ക്ക് താഴെ കമന്റ് ആയാണ് രാജീവ് ആലുങ്കലിന്റെ പ്രതികരണം.
”ശ്രീലകത്ത് നിന്നും ദൈവം പുറത്തിറങ്ങി, നാലകത്ത് സംഗീതം പെയ്തിറങ്ങി. നിയമങ്ങളെഴുതിയ ആചാര്യഹൃദയങ്ങൾ പിന്നെയും പ്രണവത്തെ മറന്നുറങ്ങി” എന്നാണ് രാജീവ് ആലുങ്കൽ കുറിച്ചിരിക്കുന്നത്. അതേസമയം, ജാതിപരമായ വിവേചനത്തിലൂടെ ഇളയരാജയെ അവഹേളിച്ചെന്നാണ് പ്രധാന ആക്ഷേപം.
ശ്രീവില്ലിപ്പുത്തൂർ ആണ്ടാൾ ക്ഷേത്രത്തിലെ ശ്രീകോവിലിനകത്താണ് ഇളയരാജ കയറിയത്. ക്ഷേത്ര ആചാര പ്രകാരം ഭക്തർക്ക് ശ്രീകോവിലിൽ പ്രവേശിക്കാൻ ആകില്ലെന്ന് ക്ഷേത്ര ഭാരവാഹികൾ പറഞ്ഞു. ഇതോടെ ഇദ്ദേഹം തിരിച്ച് ഇറങ്ങുകയായിരുന്നു. പക്ഷെ ഇളയരാജ ക്ഷേത്രത്തിലേക്ക് കയറുന്നതും തിരിച്ചിറങ്ങുന്നതുമായ വീഡിയോകൾ സമൂഹമാധ്യമങ്ങളിൽ വൈറലായി. പൊലീസ് സംരക്ഷണത്തിലാണ് ഇളയരാജ ക്ഷേത്രത്തിലെത്തിയത്.
ഇളയരാജയെ അനുകൂലിച്ചും എതിർത്തും ഒട്ടനവധി പേരാണ് വീഡിയോയ്ക്ക് കമന്റ് ഇടുന്നത്. അദ്ദേഹത്തിന് എന്തെങ്കിലും അബദ്ധം സംഭവിച്ചതാകാമെന്നും പൂജാരിമാരല്ലാതെ ആരും ശ്രീകോവിലിൽ സാധാരണയായി പ്രവേശിക്കില്ലെന്നും അഭിപ്രായപെടുന്നവരാണ് ഭൂരിഭാഗവും. എന്നാൽ സംഭവവുമായി ബന്ധപ്പെട്ട് ക്ഷേത്രഭാരവാഹികളോ ഇളയരാജയോ പ്രതികരിച്ചിട്ടില്ല. ആണ്ടാൾ ക്ഷേത്രത്തിലെ പൂജാരികളും ഭാരവാഹികളും മറ്റൊരു ചടങ്ങിൽ ഇളയരാജയെ ആദരിക്കുന്ന ചിത്രങ്ങളും ഇതോടൊപ്പം വൈറലായ കൂട്ടത്തിലുണ്ട്.
