തൃശൂര്: പടിയൂരില് അമ്മയും മകളും കൊല്ലപ്പെട്ട സംഭവത്തിൽ പ്രതിയെന്ന് സംശയിക്കുന്നയാളുടെ ചിത്രം പൊലീസ് പുറത്തുവിട്ടു. കോട്ടയം കുറിച്ചി സ്വദേശി പ്രേംകുമാറിന്റെ ചിത്രമാണ് പുറത്തുവിട്ടത്. പ്രതിയെന്ന് സംശയിക്കുന്ന ഇയാള്ക്കായി പൊലീസ് ലുക്കൗട്ട് നോട്ടീസും പുറപ്പെടുവിച്ചിട്ടുണ്ട്.
ഇയാളെക്കുറിച്ച് വിവരം ലഭിക്കുന്നവര് ഉടന് അറിയിക്കണമെന്ന് തൃശൂര് ജില്ലാ പൊലീസ് മേധാവി നിർദേശം നൽകി. ബുധനാഴ്ച ഉച്ചയോടെയാണ് പടിയൂര് പഞ്ചായത്ത് ഓഫീസിന്റെ അടുത്ത് വാടകയ്ക്ക് താമസിക്കുന്ന കാറളം വെള്ളാനി കൈതവളപ്പില് മണി (74), മകള് രേഖ ( 43) എന്നിവരെ മരിച്ച നിലയില് കണ്ടെത്തിയത്.
ഭാര്യയും പുരുഷ സുഹൃത്തുക്കളും തമ്മിലുള്ള ചിത്രങ്ങൾ വസ്ത്രത്തിൽ ഒട്ടിച്ച നിലയിൽ കണ്ടെത്തിയിട്ടുണ്ട്. ഭാര്യയുടെ സ്വഭാവത്തെ വിമർശിച്ചും കുറിപ്പ് കണ്ടെത്തിയിട്ടുണ്ട്.
മരിച്ച രേഖയുടെ ഭര്ത്താവാണ് പ്രതിയെന്ന് സംശയിക്കുന്ന പ്രേംകുമാര്. ഇയാള് ആദ്യ ഭാര്യയെ കൊലപ്പെടുത്തിയ കേസിലെ പ്രതിയാണെന്ന് പൊലീസ് അറിയിച്ചു.
2019 ല് ആദ്യ ഭാര്യയായ വിദ്യയെ കൊലപ്പെടുത്തിയ കേസില് (ഉദയംപേരൂര് വിദ്യ കൊലപാതക കേസ്) പ്രേംകുമാര് (45) പ്രതിയാണ്. ഇയാള് ഇപ്പോള് ഒളിവിലാണ് എന്ന് പോലീസ് വ്യക്തമാക്കി.
പ്രേംകുമാറിനെ കുറിച്ച് എന്തെങ്കിലും വിവരം ലഭിക്കുകയാണെങ്കില് താഴെ പറയുന്ന നമ്പറുകളില് ബന്ധപെടേണ്ടതാണെന്ന് പൊലീസ് നിര്ദേശിച്ചു.
ഇന്സ്പെക്ടര്, കാട്ടൂര് പൊലീസ് സ്റ്റേഷന് – 9497947203
ഡിവൈഎസ്പി ഇരിങ്ങാലക്കുട – 94979 90088
ജില്ലാ പൊലീസ് മേധാവി തൃശ്ശൂര് റൂറല്- 9497996978
