മുംബൈ: റിയൽ എസ്റ്റേറ്റ് മേഖലയിൽ പുത്തൻ റെക്കോർഡ് കുറിച്ച് ഫാർമസ്യൂട്ടിക്കൽസ് സ്ഥാപനമായ യുഎസ്‌വിയുടെ ചെയർപേഴ്‌സൺ ലീന ഗാന്ധി തിവാരി. 639 കോടി രൂപയ്ക്ക് മുംബൈയിൽ രണ്ട് ആഡംബര ഡ്യൂപ്ലക്സ് അപ്പാർട്ട്മെന്റുകളാണ് ലീന ഗാന്ധി സ്വന്തമാക്കിയത്. ഇന്ത്യയിലെ എല്ലാ റെസിഡൻഷ്യൽ റിയൽ എസ്റ്റേറ്റ് വിപണികളിലെയും ഏറ്റവും ഉയർന്ന നിരക്കാണ് ഇത്.
മുംബൈയിലെ വർളിയിൽ കടലിന് അഭിമുഖമായി സ്ഥിതി ചെയുന്ന അപ്പാർട്ട്മെന്റിൽ 40 നിലകളുള്ള കെട്ടിടത്തിലെ 32 മുതൽ 35 വരെ നിലകളാണ് ഉള്ളത്. 22,572 ചതുരശ്ര അടിയാണ് ആകെ വലുപ്പം. ചതുരശ്ര അടിക്ക് 2.83 ലക്ഷം രൂപയാണ് വിലയായി ലീന നൽകിയത്.
വിലയ്ക്ക് പുറമേ സ്റ്റാമ്പ് ഡ്യൂട്ടി, നികുതി ഇനത്തിൽ ലീന ഗാന്ധി 63.9 കോടി രൂപ അധികമായി നൽകിയിട്ടുണ്ട് എന്നാണ് റിപ്പോർട്ട്. അതായത് ആകെ വില്പന മൂല്യം 703 കോടി രൂപയാണ്. മാർക്കറ്റ് വൃത്തങ്ങളിൽ നിന്നുള്ള വിവരങ്ങൾ പ്രകാരം മെയ് 28നാണ് കരാർ രജിസ്റ്റർ ചെയ്തത്.
ഫോർബ്സിന്റെ റിപ്പോർട്ടുകൾ പ്രകാരം 32,500 കോടി രൂപയാണ് ലീന ഗാന്ധി തിവാരിയുടെ മൊത്തം ആസ്തി. നിലവിൽ ഇന്ത്യയിലെ ഏറ്റവും ധനികയായ സ്ത്രീകളിൽ മുൻനിരയിലാണ് ലീന ഗാന്ധിയും.
നിരവധി ആകർഷണങ്ങളുള്ള അപ്പാർട്ട്മെന്റിലിരുന്ന് അറബി കടലിന്റെയും ഗോൾഡൻ ഗേറ്റ് ബ്രിഡ്ജിൻ്റെയും അതിമനോഹരമായ കാഴ്ചകൾ ആസ്വദിക്കാം. ആഡംബരവും പ്രവർത്തനക്ഷമതയും ഒരുപോലെ സമന്വയിപ്പിച്ചുകൊണ്ടാണ് നമൻ സാനയിലെ അപ്പാർട്ട്മെന്റുകളുടെ നിർമ്മാണം പൂർത്തിയായിരിക്കുന്നത്.
6500 ചതുരശ്ര അടി വിസ്തീർണ്ണമുള്ള തുറന്ന ലേഔട്ടുകളുള്ള 22 എക്സ്ക്ലൂസീവ് ഫ്ലാറ്റുകൾ ഉൾപ്പെടുന്നുണ്ട്. മുംബൈയിലെ അൾട്രാ പ്രീമിയം പ്രോപ്പർട്ടി സെഗ്‌മെന്റിന്റെ ഭാഗം കൂടിയാണ് ഈ ടവർ.
