ഞാൻ നോക്കുന്നില്ലല്ലോ, പിന്നെന്തിനാ അമ്മ നോക്കുന്നത്? മൊബൈൽ നോക്കുന്ന മാതാപിതാക്കൾക്ക് കിട്ടിയ വമ്പൻ തിരിച്ചടി; എല്ലത്തിനും കാരണം കൂത്തുപറമ്പ് സ്കൂളിലെ അമൃത ടീച്ചറാണ്
ഡിജിറ്റൽ യുഗത്തിൽ കുട്ടികൾ സ്ക്രീനുകൾക്ക് മുന്നിൽ കൂടുതൽ സമയം ചെലവഴിക്കുന്ന സാഹചര്യത്തിൽ, സ്നേഹപൂർവ്വം ‘നോ’ പറഞ്ഞ് മാതൃകയാകുകയാണ് കൂത്തുപറമ്പ് ഗവൺമെന്റ് ഹയർസെക്കൻഡറി സ്കൂൾയിലെ കൊച്ചു മിടുക്കർ. ഒരു അധ്യാപികയുടെ നിശ്ചയദാർഢ്യവും കുട്ടികളുടെ സഹകരണവും ചേർന്നപ്പോൾ, സ്കൂൾ മുഴുവൻ മാറ്റത്തിന്റെ പാതയിലേക്കാണ് നീങ്ങുന്നത്.
ഈ വേറിട്ട ആശയത്തിന് പിന്നിൽ അധ്യാപികയായ കെ.പി. അമൃതയാണ്. കുട്ടികളിൽ വർധിച്ചുവരുന്ന മൊബൈൽ ഉപയോഗം അവരുടെ പഠനത്തെയും പെരുമാറ്റത്തെയും ബാധിക്കുന്നതായി തിരിച്ചറിഞ്ഞതോടെയാണ് ഒന്നാം ക്ലാസിലെ കുട്ടികൾക്കായി “ഒരാഴ്ച മൊബൈൽ തൊടില്ല” എന്ന ചലഞ്ച് അവർ മുന്നോട്ടുവച്ചത്.
ചലഞ്ച് വിജയിക്കുന്നവർക്ക് സമ്മാനവും പ്രഖ്യാപിച്ചു. പ്രതീക്ഷിച്ചതിലേറെ ആവേശകരമായ പ്രതികരണമാണ് കുട്ടികളിൽ നിന്ന് ലഭിച്ചത്.
എൽ.കെ.ജി മുതൽ മൂന്നാം ക്ലാസ് വരെയുള്ള കുട്ടികൾ ഗെയിമുകളും വീഡിയോകളും പൂർണമായി ഉപേക്ഷിച്ചു.
നാലാം ക്ലാസ് മുതൽ ഏഴാം ക്ലാസ് വരെയുള്ള കുട്ടികൾ പഠനാവശ്യങ്ങൾക്ക് മാത്രമായി ഫോൺ ഉപയോഗം പരിമിതപ്പെടുത്തി.
നിലവിൽ ഇരുന്നൂറോളം കുട്ടികളാണ് ഈ മാറ്റത്തിന്റെ ഭാഗമായിരിക്കുന്നത്.
മൊബൈൽ ഫോൺ മാറ്റിവെച്ചതോടെ കുട്ടികളുടെ ദിനചര്യയിൽ ഗുണപരമായ മാറ്റങ്ങൾ വ്യക്തമായി കാണാൻ തുടങ്ങി എന്നാണ് അധ്യാപകരുടെ വിലയിരുത്തൽ.
ശ്രദ്ധ കേന്ദ്രീകരിക്കാനുള്ള കഴിവ് വർധിച്ചതോടെ പഠനത്തിൽ കൂടുതൽ താൽപ്പര്യം പ്രകടമാക്കുന്നു. സ്ക്രീൻ സമയം കുറഞ്ഞതോടെ കുട്ടികൾ നേരത്തെ ഉറങ്ങാനും രാവിലെ ഉന്മേഷത്തോടെ എഴുന്നേൽക്കാനും തുടങ്ങി.
ഫോണിന് പിന്നാലെ സമയം ചെലവഴിച്ചിരുന്ന കുട്ടികൾ വീടിനുള്ളിലെ നാടൻ കളികളിലേക്കും വായനയിലേക്കും മടങ്ങിയെത്തിയതും ശ്രദ്ധേയമാണ്.
കുട്ടികൾ ചലഞ്ച് ഏറ്റെടുത്തതോടെ, അനാവശ്യമായി ഫോൺ ഉപയോഗിക്കുന്ന മാതാപിതാക്കളെ പോലും തിരുത്താൻ അവർ ശ്രമിക്കുന്നുണ്ടെന്ന് അധ്യാപകർ പറയുന്നു.
രക്ഷിതാക്കളുടെ പൂർണ സഹകരണമാണ് ഈ പദ്ധതി വേഗത്തിൽ വിജയത്തിലേക്കെത്താൻ കാരണമായത്. കുട്ടികളോടൊപ്പം കൂടുതൽ സമയം ചെലവഴിക്കാനും അവരോടൊപ്പം കളിക്കാനും മാതാപിതാക്കൾ തയ്യാറാകുന്നുണ്ട്.
കുട്ടികൾ തന്നെ മുൻകൈ എടുത്ത് മാതാപിതാക്കളെയും ചലഞ്ചിൽ ഉൾപ്പെടുത്തണമെന്ന് ആവശ്യപ്പെട്ടത് അധ്യാപികയെ പോലും അത്ഭുതപ്പെടുത്തി.
കൂത്തുപറമ്പ് സ്കൂളിലെ ഈ കൊച്ചു മിടുക്കർ സമൂഹത്തിന് നൽകുന്ന സന്ദേശം വ്യക്തമാണ് – സാങ്കേതികവിദ്യ ആവശ്യമാണ്, എന്നാൽ അത് നമ്മുടെ കുട്ടിക്കാലത്തെ കവർന്നെടുക്കാൻ പാടില്ല. മൂന്നാഴ്ച പിന്നിടുന്ന ഈ വിജയഗാഥ ആഘോഷമാക്കാൻ സ്കൂൾ അധികൃതർ ഒരുങ്ങുകയാണ്.
English Summary
Students of Government Higher Secondary School, Kuthuparamba, have launched a screen-free challenge under the guidance of teacher KP Amritha to reduce excessive mobile phone usage among children. Around 200 students from LKG to Class 7 are now limiting or completely avoiding mobile use, leading to visible improvements in focus, sleep habits and interest in studies. The initiative, supported strongly by parents, is being hailed as a model for responsible technology use.
kuthuparamba-school-children-screen-free-mobile-challenge-kp-amritha
Kuthuparamba school, KP Amritha, children and mobile phones, screen free challenge, digital addiction, parent support, school initiative, Kerala education news, student wellbeing
