കോഴിക്കോട്: കോഴിക്കോട് മെഡിക്കല്‍ കോളേജ് ആശുപത്രിയില്‍ ഇനി മുതൽ ഒപി ടിക്കറ്റിന് പണം നൽകണം. ഡിസംബര്‍ ഒന്ന് മുതലാണ് പത്ത് രൂപ ഫീസ് ഈടാക്കാൻ തീരുമാനിച്ചിരിക്കുന്നത്. കോഴിക്കോട് ജില്ലാ കളക്ടര്‍ സ്‌നേഹികുമാര്‍ സിംഗിന്റെ അധ്യക്ഷതയില്‍ ചേര്‍ന്ന ആശുപത്രി വികസന സമിതി യോഗമാണ് തീരുമാനമെടുത്തത്.(Kozhikode Medical College charges Rs 10 for OP ticket from December 1)
ആശുപത്രിയുടെ പ്രവര്‍ത്തനങ്ങള്‍ക്കും വികസന പ്രവൃത്തികള്‍ക്കും ചെലവ് വലിയ തോതില്‍ കൂടിയ സാഹചര്യമാണ്. ആയതിനാൽ അതിനുള്ള പണം കണ്ടെത്താനാണ് ഒപി ടിക്കറ്റിന് ഏര്‍പ്പെടുത്തുന്നതെന്നാണ് വികസന സമിതിയുടെ വിശദീകരണം. ഒപി ടിക്കറ്റ് വഴി ലഭിക്കുന്ന തുക ഉപയോഗിച്ച് രോഗികള്‍ക്കും കൂട്ടിരിപ്പുകാർക്കും മികച്ച രീതിയിലുള്ള ചികിത്സയും സൗകര്യങ്ങളും ഒരുക്കാനാകും എന്നതിനാല്‍ നിലവിലെ തീരുമാനത്തിന്റെ പ്രയോജനം അവര്‍ക്കാണ് കിട്ടുകയെന്ന് ജില്ലാ കലക്ടര്‍ വിശദീകരിച്ചു.
നിലവില്‍ കോഴിക്കോട് മെഡിക്കല്‍ കോളേജില്‍ ഒപി ടിക്കറ്റ് സൗജന്യമായാണ് നൽകുന്നത്. മെഡിക്കല്‍ കോളേജ് ആശുപത്രി, ഐഎംസിഎച്ച്, ഡെന്റല്‍ കോളേജ്, ഇന്‍സ്റ്റിറ്റ്യൂട്ട് ഓഫ് ചെസ്റ്റ് ഡിസീസസ് എന്നിവിടങ്ങളിലും ഒ പി ടിക്കറ്റ് നിരക്ക് ബാധകമാണ്.
