കൊച്ചി: നാലു വയസുകാരിയെ പുഴയിലെറിഞ്ഞ് കൊലപ്പെടുത്തിയ സംഭവത്തില് പ്രതിയായ അമ്മയുടെ മൊഴി പുറത്ത്. മകളുടെ പീഡന വിവരം തനിക്ക് അറിയില്ലായിരുന്നുവെന്നാണ് അമ്മ മൊഴി നല്കിയത്.
ഭര്ത്താവിന്റെ സഹോദരന് കുട്ടിയെ പീഡിപ്പിച്ചതിനെ കുറിച്ച് അറിയില്ലെന്ന് അമ്മ പൊലീസിന് മൊഴി നൽകി. ഭര്ത്താവും വീട്ടുകാരും ചേര്ന്ന് തന്നെ ഒറ്റപ്പെടുത്തിയിരുന്നുവെന്നും അമ്മ പറയുന്നു.
ഭർത്താവിനെ കൂടാതെ കുട്ടികളും തന്നെ ഒഴിവാക്കാന് ശ്രമിച്ചിരുന്നുവെന്നും അതില് താന് വേദന അനുഭവിച്ചിരുന്നുവെന്നും അമ്മ പറഞ്ഞു. അതിന്റെ പ്രതികാരമായാണ് മകളെ കൊലപ്പെടുത്തിയത്. ഭര്ത്താവിന്റെ വീട്ടില് നിന്ന് മോശം അനുഭവം നേരിട്ടിരുന്നതായും അമ്മ മൊഴി നല്കിയിട്ടുണ്ട്.
റിമാൻഡിലായ പ്രതിയെ കസ്റ്റഡിയിൽ വാങ്ങിയുള്ള ചോദ്യം ചെയ്യലിനിടെയാണ് കുട്ടി നിരന്തരം പീഡനത്തിന് ഇരയായിരുന്നുവെന്ന വിവരം പൊലീസ് അറിയിച്ചത്. എന്നാൽ നിസംഗതയോടെയാണ് ഇക്കാര്യം അമ്മ കേട്ടത്.
അതേസമയം നാലു വയസുകാരിയെ പീഡിപ്പിച്ച പിതൃസഹോദരന് വേണ്ടി പൊലീസ് ഇന്ന് കസ്റ്റഡി അപേക്ഷ നൽകും. കുട്ടിയെ നിരന്തരം പീഡിപ്പിച്ചിരുന്നതായി ഇയാള് കുറ്റം സമ്മതം നടത്തിയിരുന്നു. കൊലപാതകത്തിന് പിന്നാലെ നടത്തിയ പോസ്റ്റ്മോര്ട്ടത്തിലായിരുന്നു നാല് വയസുകാരി ലൈംഗിക ചൂഷണത്തിനിരയായെന്നുള്ള സൂചനകള് ഡോക്ടര് പൊലീസിന് നൽകിയത്.
കുഞ്ഞിന്റെ ശരീരത്തിൽ സംശയകരമായ ചില മുറിവുകളും പാടുകളും ഉണ്ടായിരുന്നതായി ഡോക്ടര്മാര് പൊലീസിനോട് പറഞ്ഞു. ഇതിന്റെ അടിസ്ഥാനത്തിലാണ് പൊലീസ് അന്വേഷണം നടത്തുകയും ഇയാളെ കസ്റ്റഡിയില് എടുക്കുകയും ചെയ്തത്.
മെയ് 19 നാണ് നാലു വയസ്സുകാരിയെ അമ്മ പുഴയിലെറിഞ്ഞു കൊലപ്പെടുത്തിയത്. അംഗണ്വാടിയിൽ നിന്ന് കൂട്ടിവരുമ്പോൾ കുട്ടിയെ ബസിൽ നിന്ന് കാണാതായി എന്നായിരുന്നു അമ്മ ആദ്യം അറിയിച്ചത്.
എന്നാൽ വിശദമായ ചോദ്യം ചെയ്യലിലാണ് പുഴയിലെറിഞ്ഞ് കൊന്നുവെന്ന് സമ്മതിച്ചത്. തുടർന്ന് അമ്മയെ പൊലീസ് അറസ്റ്റ് ചെയ്യുകയായിരുന്നു.
