സംസ്ഥാന സർക്കാർ ഇന്ന് 3500 കോടി രൂപ സമാഹരിക്കും. റിസർവ് ബാങ്ക് വഴി കടപ്പത്രം ഇറക്കിയാണ് ധനസമാഹരണം. ഈ മാസത്തെ ക്ഷേമപെൻഷൻ നൽകാനും ഈ മാസം വിരമിക്കുന്നവർക്ക് ആനുകൂല്യങ്ങൾ നൽകാനും വേണ്ടിയാണ് കടമെടുപ്പ്. ഈ മാസവും അടുത്തമാസവുമായി വിരമിക്കുന്നവർക്ക് ആനുകൂല്യങ്ങൾ നൽകാൻ 7500 കോടി രൂപയാണ് സർക്കാരിന് ആവശ്യമുള്ളത്. ഇതിനു പുറമെ ബുധനാഴ്ച ആരംഭിക്കുന്ന ക്ഷേമ പെൻഷൻ വിതരണത്തിന് 800 കോടി രൂപയോളം ആവശ്യമുണ്ട്. ഇതിനാലാണ് അടിയന്തരമായി ധനസമാഹരണം നടത്തുന്നത്.
ജീവനക്കാർക്ക് ആനുകൂല്യങ്ങൾ നൽകുന്നതിനായി അടുത്തമാസം ആദ്യം വീണ്ടും കടമെടുക്കും. വിരമിക്കുന്നതിൽ ഒരു വിഭാഗം ആനുകൂല്യങ്ങൾ ട്രഷറിയിൽ തന്നെ നിക്ഷേപിക്കുന്നതിനാൽ സർക്കാരിന് ആ ബാധ്യത ഒഴിവാകും. 5 സ്പെഷ്യൽ സെക്രട്ടറിമാർ അടക്കം സെക്രട്ടറിയേറ്റിൽ മാത്രം 150 ആളുകളാണ് വരുന്ന മാസങ്ങളിൽ വിരമിക്കുന്നത്. ഇതാണ് സർക്കാരിനു ബാധ്യതയാകുന്നത്.
