കേസന്വേഷണ വിവരങ്ങൾ മാദ്ധ്യമങ്ങൾക്ക് നൽകരുത്

കേസന്വേഷണ വിവരങ്ങൾ മാദ്ധ്യമങ്ങൾക്ക് നൽകരുത്

തിരുവനന്തപുരം: കേസുകളിലെ അന്വേഷണം സംബന്ധിച്ച വിവരങ്ങൾ മാദ്ധ്യമങ്ങളുമായി പങ്കുവയ്ക്കരുതെന്ന് സംസ്ഥാന പൊലീസിനോട് ഡയറക്ടർ ജനറൽ ഓഫ് പൊലീസ് (ഡി.ജി.പി) റവാഡ ചന്ദ്രശേഖർ നിർദ്ദേശം നൽകി.

 ഇതുസംബന്ധിച്ച സർക്കുലർ പുറത്തിറക്കി.സർക്കുലറനുസരിച്ച്, അന്വേഷണ ഘട്ടത്തിലുള്ള കേസുകളിൽ പ്രതികളുടെ കുറ്റസമ്മതമോ തെളിവുകളോ സംബന്ധിച്ച വിവരങ്ങൾ മാദ്ധ്യമങ്ങളിൽ വെളിപ്പെടുത്തുന്നത് കടുത്ത നിയമലംഘനമായി കണക്കാക്കും.

നിർദ്ദേശം ലംഘിക്കുന്ന ഉദ്യോഗസ്ഥർക്കെതിരെ കർശനമായ ശാസന നടപടിയുണ്ടാകുമെന്നും സർക്കുലറിൽ വ്യക്തമാക്കിയിട്ടുണ്ട്.

സമീപകാലത്ത് ഒരു കേസിൽ അന്വേഷണ ഉദ്യോഗസ്ഥൻ “പ്രതി കുറ്റസമ്മതം നടത്തി” എന്ന് മാധ്യമങ്ങളോട് പറഞ്ഞതും അത് പ്രസിദ്ധീകരിച്ചതും ഹൈക്കോടതി ശ്രദ്ധയിൽപ്പെടുത്തിയിരുന്നു. 

കുറ്റാരോപിതൻ പറഞ്ഞ കാര്യങ്ങൾ അന്വേഷണഘട്ടത്തിൽ പുറത്തുവിടുന്നത് നീതിനടപടികൾക്ക് പ്രതിബന്ധമാകുമെന്നും വിചാരണയുടെ വിശ്വാസ്യതയെ ബാധിക്കുമെന്നും കോടതി അഭിപ്രായപ്പെട്ടിരുന്നു.

ഇക്കാര്യം ചൂണ്ടിക്കാട്ടി പ്രോസിക്യൂഷൻ ഡയറക്ടർ ജനറൽ നൽകിയ കത്തിന്റെ അടിസ്ഥാനത്തിലാണ് ഡി.ജി.പി. സർക്കുലർ പുറപ്പെടുവിച്ചത്. 

ശബരിമല സ്വർണക്കൊള്ള കേസിലും അന്വേഷണ വിവരങ്ങൾ മാധ്യമങ്ങളുമായി പങ്കുവയ്ക്കരുതെന്ന് ഹൈക്കോടതി നേരത്തേ നിർദ്ദേശം നൽകിയിരുന്നു.

ശബരിമല സ്വർണക്കൊള്ള കേസിൽ ദേവസ്വം ബോർഡിന്റെ മുൻ എക്സിക്യൂട്ടീവ് ഓഫീസർ സുധീഷ് കുമാറിനെ പ്രത്യേക അന്വേഷണ സംഘം ചോദ്യം ചെയ്യുന്നു. 

ശ്രീകോവിലിലെ സ്വർണം പൊതിഞ്ഞതുമായി ബന്ധപ്പെട്ട രേഖകളാണ് അന്വേഷണ സംഘം കണ്ടെത്തിയത്. 

തിരുവനന്തപുരം ദേവസ്വം ബോർഡ് ആസ്ഥാനത്തുനിന്ന് ലഭിച്ച ഈ രേഖകൾ 420 പേജുകളാണ് ഉള്ളത്.

അന്വേഷണ സംഘം രേഖകളുടെ അടിസ്ഥാനത്തിൽ മുൻ എക്സിക്യൂട്ടീവ് ഓഫീസറുടെ പങ്ക് വിശദമായി പരിശോധിക്കുകയാണ്.

 ശ്രീകോവിലിലെ സ്വർണ പൊതിക്കൽ സംബന്ധിച്ച ധനകാര്യ ഇടപാടുകളുടേയും രേഖകളുടേയും വിശ്വാസ്യതയും അന്വേഷണം ഉറപ്പാക്കുകയാണ് ലക്ഷ്യം.

അതേസമയം, കേസിൽ അറസ്റ്റിലായ രണ്ടാം പ്രതി മുരാരി ബാബുവിനെ നവംബർ 13 വരെ റിമാൻഡ് ചെയ്തു. 

പ്രത്യേക അന്വേഷണ സംഘം കസ്റ്റഡി ആവശ്യപ്പെട്ടിരുന്നില്ല. നാല് ദിവസത്തെ പോലീസ് കസ്റ്റഡി അവസാനിച്ചതിനെ തുടർന്ന് ഇയാളെ ഇന്ന് കോടതി ഹാജരാക്കി.

മുരാരി ബാബുവിനെ നേരത്തെ രണ്ട് ആഴ്ചത്തേക്ക് ജുഡീഷ്യൽ കസ്റ്റഡിയിൽ വിട്ടിരുന്നു. 

തുടർന്നാണ് നാല് ദിവസത്തെ പോലീസ് കസ്റ്റഡി അനുവദിച്ചത്. അതിന്റെ കാലാവധി കഴിഞ്ഞതോടെ ഇയാളെ വീണ്ടും ജയിലിലേക്ക് മാറ്റും.

ശബരിമല ക്ഷേത്രത്തിലെ സ്വർണ പൊതിക്കൽ സമയത്ത് നടന്നതായി ആരോപിക്കുന്ന സാമ്പത്തിക അഴിമതിയും സ്വർണതട്ടിപ്പും സംബന്ധിച്ച അന്വേഷണമാണ് ഇപ്പോൾ പുരോഗമിക്കുന്നത്. 

അന്വേഷണ സംഘത്തിന്റെ റിപ്പോർട്ട് അനുസരിച്ച് കൂടുതൽ ഉദ്യോഗസ്ഥരെയും അടുത്ത ഘട്ടത്തിൽ ചോദ്യം ചെയ്യാൻ സാധ്യതയുണ്ട്.

English Summary:

Kerala DGP Revad Chandrasekhar has issued a circular instructing police officers not to share investigation details with the media. The directive strictly prohibits officers from revealing information such as confessions or case evidence during the investigation stage.

The circular follows a Kerala High Court observation that a police officer’s statement — claiming an accused had confessed — was inappropriate and could affect the fairness of the trial. The court had also emphasized that disclosing investigation details could compromise ongoing cases.