പിഷാരടി, ആസിഫ്, ഉണ്ണി മുകുന്ദൻ…‘സെലിബ്രിറ്റി’ സ്ഥാനാർഥികളെ തേടി മുന്നണികൾ
മുൻ മുഖ്യമന്ത്രിമാരായ ഉമ്മൻ ചാണ്ടിയുടെയും വി.എസ്. അച്യുതാനന്ദന്റെയും രാഷ്ട്രീയ പാരമ്പര്യം നിയമസഭാ തിരഞ്ഞെടുപ്പിൽ വീണ്ടും സജീവമാകുമോ എന്നതാണ് സംസ്ഥാന രാഷ്ട്രീയത്തിലെ പുതിയ ചർച്ച.
ഉമ്മൻ ചാണ്ടിയുടെ മകൾ അച്ചു ഉമ്മനും വി.എസ്. അച്യുതാനന്ദന്റെ മകൻ വി.എ. അരുൺകുമാറും യഥാക്രമം കോൺഗ്രസിന്റെയും സിപിഎമ്മിന്റെയും ‘വജ്രായുധ’ സ്ഥാനാർഥികളായി മാറുമോ എന്ന ആകാംക്ഷ ശക്തമാണ്.
ഇതോടൊപ്പം, ചലച്ചിത്ര ലോകത്തുനിന്നും കായികരംഗത്തുനിന്നും അപ്രതീക്ഷിത സ്ഥാനാർഥികൾ കളത്തിലിറങ്ങുമോയെന്നതും രാഷ്ട്രീയ വൃത്തങ്ങളിൽ ചർച്ചയാകുന്നു. നടന്മാരായ രമേശ് പിഷാരടി, ആസിഫ് അലി, ഉണ്ണി മുകുന്ദൻ എന്നിവർ സ്ഥാനാർഥികളാകുമോ?
അതുപോലെ ഇതിഹാസ അത്ലറ്റ് പി.ടി. ഉഷയും മുൻ ഫുട്ബോൾ താരങ്ങളായ ഐ.എം. വിജയനും യു. ഷറഫലിയും ജനവിധി തേടി രംഗത്തിറങ്ങുമോയെന്നതും സംശയമാണ്.
ജെൻ സീ കാലഘട്ടത്തിലെ തിരഞ്ഞെടുപ്പിൽ ‘സർപ്രൈസ്’ സ്ഥാനാർഥികളെ തേടുകയാണ് പ്രധാന രാഷ്ട്രീയ കക്ഷികൾ. അന്തരിച്ച നേതാക്കളുടെ മക്കൾ മുതൽ മുൻ ബ്യൂറോക്രാറ്റുകൾ വരെയുള്ളവരാണ് സാധ്യതാപട്ടികയിൽ.
കായംകുളത്ത് വി.എ. അരുൺകുമാർ മത്സരിച്ചാൽ, മുൻ മന്ത്രി തച്ചടി പ്രഭാകരന്റെ മകനും മുൻ ഐഎഎസ് ഉദ്യോഗസ്ഥനുമായ ബിജു പ്രഭാകറിനെ രംഗത്തിറക്കി പ്രതിരോധം തീർക്കാനാണ് കോൺഗ്രസിന്റെ ആലോചന.
എന്നാൽ ബിജു പ്രഭാകർ ഇതുവരെ നിലപാട് വ്യക്തമാക്കിയിട്ടില്ല. സിവിൽ സർവീസിൽനിന്ന് രാജിവച്ച കണ്ണൻ ഗോപിനാഥനും കോൺഗ്രസിന്റെ സാധ്യതാപട്ടികയിലുണ്ട്.
തൃപ്പൂണിത്തുറയിൽ കെ. ബാബു മത്സരിക്കാനില്ലെങ്കിൽ രമേശ് പിഷാരടിയുടെ പേരാണ് കോൺഗ്രസ് നേതൃത്വം പരിഗണിക്കുന്നത്. പാലക്കാട്ടും പിഷാരടിയുടെ പേര് കേൾക്കുന്നു. ബിജെപിയുടെ ‘സർപ്രൈസ് ലിസ്റ്റിൽ’ ഉണ്ണി മുകുന്ദന്റെ പേരുമുണ്ട്.
തൊടുപുഴയിൽ സിപിഎം കേന്ദ്രങ്ങളിൽ ആസിഫ് അലിയുടെ പേരുയരുന്നുണ്ടെങ്കിലും, സിനിമ വിട്ടിറങ്ങാൻ താരം തയ്യാറാകുമോയെന്നത് വ്യക്തമല്ല.
പത്തനംതിട്ട ജില്ലയിലെ ഒരു മണ്ഡലത്തിൽ സാഹിത്യകാരൻ ബെന്യാമിന്റെ പേരും സിപിഎം ക്യാംപിൽ ചർച്ചയിലുണ്ട്.
വടക്കൻ കേരളത്തിലെ ബിജെപിക്ക് സാധ്യതയുള്ള ഒരു മണ്ഡലത്തിൽ രാജ്യസഭാംഗവും ഇന്ത്യൻ ഒളിംപിക് അസോസിയേഷൻ പ്രസിഡന്റുമായ പി.ടി. ഉഷയെ പരിഗണിച്ചേക്കുമെന്ന അഭ്യൂഹങ്ങളും ശക്തമാണ്.
വണ്ടൂരിൽ കോൺഗ്രസിലെ എ.പി. അനിൽകുമാറിനെതിരെ ഐ.എം. വിജയനെ ഇറക്കുന്നതും സിപിഎം ആലോചിക്കുന്നുണ്ട്. ഏറനാട് മണ്ഡലത്തിൽ എൽഡിഎഫ് സ്വതന്ത്ര സ്ഥാനാർഥിയായി ഷറഫലിയുടെ പേരും സജീവമായി കേൾക്കുന്നു.
English Summary
Political parties in Kerala are exploring surprise candidates ahead of the Assembly elections, including children of former chief ministers, film actors, sportspersons, writers, and former bureaucrats. Names such as Achu Oommen, V.A. Arun Kumar, Ramesh Pisharody, Unni Mukundan, P.T. Usha, and I.M. Vijayan are being discussed across party camps.
kerala-assembly-election-surprise-candidates-achu-oommen-arun-kumar-actors-sportspersons
Kerala Assembly Election, Surprise Candidates, Achu Oommen, V A Arun Kumar, CPM, Congress, BJP, Malayalam Cinema, Sports Personalities, Kerala Politics
