കൂട്ടുകാരിക്ക് ചികിത്സാസഹായവുമായെത്തി, ആശുപത്രിയിൽ കുഴഞ്ഞുവീണ് മരിച്ചു; പിന്നാലെ രോഗിയും വിടപറഞ്ഞു
കായംകുളം: കാൻസർ ബാധിച്ച് ഗുരുതരാവസ്ഥയിൽ ചികിത്സയിലായിരുന്ന സുഹൃത്തിനെ ആശുപത്രിയിൽ സന്ദർശിച്ച ശേഷം മനോവിഷമം താങ്ങാനാകാതെ കുഴഞ്ഞുവീണ് വീട്ടമ്മ മരിച്ചു.
മണിക്കൂറുകൾക്കകം സുഹൃത്തും അന്തരിച്ചു. കായംകുളം എം.എസ്.എം കോളേജിലെ പൂർവവിദ്യാർത്ഥികളായ ഖദീജാകുട്ടി (49), ശ്യാമളകുമാരി (50) എന്നിവരാണ് മണിക്കൂറുകളുടെ വ്യത്യാസത്തിൽ മരണമടഞ്ഞത്.
ആലപ്പുഴ മെഡിക്കൽ കോളേജ് ആശുപത്രിയിൽ വെള്ളിയാഴ്ചയാണ് ദാരുണസംഭവം. കായംകുളം കൃഷ്ണപുരം കാവിന്റെ വടക്കത്തെ ഷാജഹാന്റെ ഭാര്യയും എൽ.ഐ.സി ഏജന്റുമായ ഖദീജാകുട്ടിയാണ് ആദ്യം മരിച്ചത്.
തുടർന്ന്, ഏറെ നാളായി കാൻസർ ചികിത്സയിൽ കഴിയുന്ന കണ്ടല്ലൂർ വടക്കുംഠ മഠത്തിൽ പടീറ്റതിൽ പരേതനായ ശ്രീകുമാറിന്റെ ഭാര്യ ശ്യാമളകുമാരിയും വിടവാങ്ങി.
ചികിത്സാ സഹായം സമാഹരിക്കുന്നതിന് ‘സ്നേഹതീരം’ എന്ന എം.എസ്.എം പ്രീഡിഗ്രി പൂർവവിദ്യാർത്ഥികളുടെ കൂട്ടായ്മയുടെ ഭാഗമായി ഖദീജയും കൂട്ടാളികളും ആശുപത്രിയിലെത്തി.
സാമ്പത്തികസഹായം കൈമാറി വാർഡിൽ നിന്നിറങ്ങുന്നതിനിടെ ഖദീജ ബോധരഹിതയായി വീണു.
ഐ.സി.യുവിലേക്ക് മാറ്റിയെങ്കിലും വൈകിട്ട് 4.30ഓടെ മരണം സംഭവിച്ചു. പിന്നീട് രാത്രി 8.30ന് ശ്യാമളയും അന്തരിച്ചു.
സുഹൃത്തുക്കളുടെ സമാഗമത്തിൽ ഉണ്ടായ ഈ അപ്രതീക്ഷിത ദുരന്തം ‘സ്നേഹതീരം’ അംഗങ്ങളെ വളരെയധികം ദുഃഖത്തിലാഴ്ത്തിയിരിക്കുകയാണ്. ഇരുവരുടെയും സംസ്കാരകർമ്മങ്ങൾ നടത്തി.
ഖദീജയുടെ മക്കൾ: അജ്മൽ ഷാ, അമൽ ഷാ
ശ്യാമളയുടെ മക്കൾ: സൂരജ്, സിദ്ധാർത്ഥ്
English Summary
Two former classmates from Kayamkulam MSM College died within hours of each other in a tragic incident. Khadijakutty (49), an LIC agent, collapsed and died after visiting her close friend Shyamala Kumari (50), who was undergoing cancer treatment at Alappuzha Medical College. The visit was part of a fundraising effort by their alumni group ‘Snehatheeram’. After handing over financial aid, Khadija fainted and later passed away in the ICU. A few hours later, Shyamala also succumbed to her illness. The sudden loss of both friends has deeply saddened their alumni community.
kayamkulam-friends-die-hours-apart
Kayamkulam, Alappuzha, Death, Cancer, Friends, MSM College, Snehatheeram, Kerala News
