യു.കെ.യിൽ സ്‌കൂളുകളിൽ കുട്ടികൾക്ക് മാംസം വിളമ്പണമെന്നുള്ള നിർദേശങ്ങൾ പരിഷ്‌കരിക്കണമെന്ന് ചാരിറ്റി സംഘടനകൾ. കുട്ടികളുടെ ആരോഗ്യം മെച്ചപ്പെടുത്താൻ പച്ചക്കറികളും പയർവർഗ്ഗങ്ങളും കൂടുതലായി കഴിക്കുന്നത് വർധിപ്പിക്കണമെന്നാണ് ആവശ്യം.
ഫുഡ് ഫൗണ്ടേഷൻ പ്രസിദ്ധീകരിച്ച ഒരു റിപ്പോർട്ട് പ്രകാരം കുട്ടികൾ മുതിർന്നവരേക്കാൾ ആനുപാതികമായി കൂടുതൽ സംസ്‌കരിച്ച മാംസം കഴിക്കുന്നുണ്ട്. കുട്ടികൾ കഴിക്കുന്ന മാംസത്തിന്റെ മൂന്നിലൊന്ന് ബേക്കൺ, ഹാം, സോസേജുകൾ തുടങ്ങിയ സംസ്‌കരിച്ച മാംസത്തിൽ നിന്നാണ് വരുന്നത്.
സ്‌കൂളുകളിലും വിദ്യാഭ്യാസ സ്ഥാപനങ്ങളിലും സാധാരണയായി കഴിക്കുന്ന മാംസ വിഭവങ്ങളിൽ 80 ശതമാനം സംസ്‌കരിച്ചതോ ചുവന്ന മാംസമോ ആണെന്നും പഠനങ്ങളിൽ തെളിഞ്ഞിട്ടുണ്ട്.
നിലവിലെ സർക്കാർ മാർഗ്ഗനിർദ്ദേശം അനുസരിച്ച്, സ്‌കൂളുകൾ സ്‌കൂൾ ഭക്ഷണത്തിൽ ആഴ്ചയിൽ കുറഞ്ഞത് മൂന്ന് ദിവസമെങ്കിലും മാംസത്തിന്റെയോ കോഴിയിറച്ചിയുടെയോ ഒരു ഭാഗം നൽകണം, ഇത് കുട്ടികൾക്ക് സമീകൃതാഹാരം ഉറപ്പാക്കാൻ രൂപകൽപ്പന ചെയ്തിട്ടുള്ള സ്‌കൂൾ ഭക്ഷണ മാനദണ്ഡങ്ങളുടെ ഭാഗമാണ്.
ഈ ഭക്ഷണ ക്രമത്തിൽ ഇളവ് വരുത്തി പഴങ്ങൾ, പച്ചക്കറികൾ, പയർവർഗ്ഗങ്ങൾ എന്നിവയുടെ ഉപഭോഗം വർദ്ധിപ്പിക്കണമെന്നും ഫുഡ് ഫൗണ്ടേഷൻ ആവശ്യപ്പെടുന്നു. സർക്കാർ മാർഗ്ഗനിർദ്ദേശങ്ങൾ അവലോകനം ചെയ്തുകൊണ്ട് സ്‌കൂളുകളിലും ഭക്ഷണം വിളമ്പുന്ന മറ്റ് പൊതു ഇടങ്ങളിലും സർക്കാർ സംഭരണ നിയമങ്ങൾ ശക്തിപ്പെടുത്തണമെന്നും ചാരിറ്റി സംഘടനകളുടെ ആവശ്യത്തിലുണ്ട്.
ഫുഡ് ഫൗണ്ടേഷനിലെ റെബേക്ക ടോബി എന്ന പ്രവർത്തകയുടെ അഭിപ്രായപ്രകാരം ”കുട്ടികൾ വളരെയധികം സംസ്‌കരിച്ച മാംസം കഴിക്കുന്നത് ആശങ്കാജനകമാണ്, പ്രത്യേകിച്ച് സ്‌കൂളുകളിൽ, ഇവിടെ ഭക്ഷണം പോഷക സമൃദ്ധമായിരിക്കണമെന്ന് നിർബന്ധമുണ്ട്.”
പദ്ധതി കുട്ടികളുടെ ആരോഗ്യം മെച്ചപ്പെടുത്തുകയും ചെലവ് കുറയ്ക്കുകയും ചെയ്യും.
ഉപ്പും പൂരിത കൊഴുപ്പും കൂടുതലായി അടങ്ങിയേക്കാവുന്ന സംസ്‌കരിച്ച മാംസങ്ങളെ ലോകാരോഗ്യ സംഘടന (WHO) അർബുദകാരികളായി തരംതിരിച്ചിട്ടുണ്ട്. യുകെയിൽ എല്ലാ വർഷവും ഉണ്ടാകുന്ന 42,000 പുതിയ കുടൽ അർബുദ കേസുകളിൽ 13 ശതമാനവും അമിതമായി സംസ്‌കരിച്ച മാംസം കഴിക്കുന്നതിലൂടെ ഉണ്ടാകുന്നതാണെന്ന് യു.കെ.കാൻസർ റിസർച്ചും പറയുന്നു.
