ആകാശത്ത് ഉരുക്കുകോട്ട; ഇന്ത്യൻ സുദർശന ചക്രം
ന്യൂഡൽഹി: ശത്രുരാജ്യങ്ങളുടെ വിമാനങ്ങളും ക്രൂയിസ് മിസൈലുകളും ഡ്രോണുകളും നിമിഷങ്ങൾക്കുള്ളിൽ വെടിവെച്ചിടാൻ ശേഷിയുള്ള വ്യോമപ്രതിരോധ സംവിധാനം സ്വയം വികസിപ്പിക്കാനൊരുങ്ങി ഇന്ത്യ.
‘മിഷൻ സുദർശന ചക്ര’യുടെ ഭാഗമായി, ഡിഫൻസ് റിസർച്ച് ആൻഡ് ഡെവലപ്മെന്റ് ഓർഗനൈസേഷന്റെ (ഡിആർഡിഒ) നടപ്പാക്കുന്ന ‘പ്രോജക്റ്റ് കുശ’ എന്ന പദ്ധതി, രാജ്യത്തിന്റെ പ്രതിരോധ മേഖലയിൽ നിർണ്ണായക ചുവടുവയ്പ്പാണ്.
ഇന്ത്യയ്ക്ക് തന്ത്രപരമായ മേൽക്കൈ
350 കിലോമീറ്റർ വരെ ദൂരത്തിൽ നിന്നും ആക്രമണം തടയാനാകുന്ന സംവിധാനമാണ് ലക്ഷ്യമിടുന്നത്.
അതായത്, ഇന്ത്യൻ അതിർത്തി കടക്കുന്നതിനുമുമ്പ് തന്നെ പാകിസ്ഥാനും ചൈനയും ഉൾപ്പെടെയുള്ള രാജ്യങ്ങളുടെ വിമാനങ്ങളും മിസൈലുകളും നിലംപരിശാക്കാനാകും.
ഇത് അയൽരാജ്യങ്ങളുടെ സൈനിക സമവാക്യങ്ങൾ തന്നെ മാറ്റിമറിക്കുന്ന മുന്നേറ്റമാണ്.
വിദേശ സാങ്കേതികവിദ്യകളിൽ നിന്ന് ആശ്രയം കുറച്ച് തദ്ദേശീയ പ്രതിരോധ ശേഷി വർദ്ധിപ്പിക്കുകയെന്നതാണ് പദ്ധതിയുടെ പ്രധാന നേട്ടം.
തന്ത്രപ്രധാനമായ വിന്യാസം
ചൈനയുമായി തർക്കം തുടരുന്ന ലഡാക്ക്, അരുണാചൽ പ്രദേശ് മേഖലകൾക്കും പാകിസ്ഥാൻ അതിർത്തികൾക്കും ഏറ്റവും വലിയ സുരക്ഷാ കവചമാകുകയാണ് ലക്ഷ്യം. 2035-ഓടെ ഇന്ത്യയിലെ എല്ലാ തന്ത്രപ്രധാന സൈനിക-സിവിലിയൻ കേന്ദ്രങ്ങൾക്കും സംരക്ഷണം നൽകുക എന്നതാണ് ‘മിഷൻ സുദർശന ചക്ര’യുടെ ദീർഘകാല ദൗത്യം.
എസ്-400 നെ മറികടന്ന്
ഇപ്പോൾ റഷ്യയിൽ നിന്ന് ഇന്ത്യക്ക് ലഭിച്ച എസ്-400 ട്രയംഫ് വ്യോമപ്രതിരോധ സംവിധാനം ലോകോത്തര നിലവാരം പുലർത്തുന്നതാണ്. എന്നാൽ പ്രോജക്റ്റ് കുശ പൂർത്തിയായാൽ, അതിനേക്കാളും സ്വയംപര്യാപ്തമായ ഓട്ടോമേറ്റഡ് സംവിധാനത്തെയാണ് ഇന്ത്യ സ്വന്തമാക്കുക. ഇതിലൂടെ പ്രതിരോധ മേഖലയിൽ ആഗോള തലത്തിൽ ഇന്ത്യക്ക് മുന്നേറ്റം ഉറപ്പാക്കാം.
മൂന്ന് ഘട്ട മിസൈൽ പരീക്ഷണങ്ങൾ
#എം1 (150 km): 2026-ൽ പരീക്ഷണം ആരംഭിക്കും.
#എം2 (250 km): 2027-ൽ പരീക്ഷണത്തിന്.
#എം3 (350 km): 2028-ൽ പരീക്ഷണം നടത്തും.
#2030 മുതൽ ഇവയെ സൈന്യത്തിന്റെ ഭാഗമാക്കാനാണ് പദ്ധതി.
സർവ്വതല സുരക്ഷ
‘പ്രോജക്റ്റ് കുശ’യുടെ പ്രധാന കഴിവുകൾ:
#യുദ്ധവിമാനങ്ങൾ, സ്റ്റെൽത്ത് ഫൈറ്റേഴ്സ്
#ക്രൂയിസ് മിസൈലുകൾ, ബാലിസ്റ്റിക് മിസൈലുകൾ
#ഡ്രോണുകൾ, കൃത്യതയാർന്ന ആയുധങ്ങൾ
#എല്ലാ വിധമായ വ്യോമാക്രമണങ്ങളെയും തടയാനുള്ള മൾട്ടി-ലെയേർഡ് എയർ ഡിഫൻസ് സിസ്റ്റമാണ് ലക്ഷ്യമിടുന്നത്.
ഭാവിയിലെ ആയുധ സാങ്കേതികവിദ്യ
ഇന്റഗ്രേറ്റഡ് എയർ ഡിഫൻസ് വെപ്പൺ സിസ്റ്റത്തിന്റെ (IADWS) വിജയകരമായ പരീക്ഷണം ഇതിനകം തന്നെ ഇന്ത്യ നടത്തിയിരുന്നു. അതിനൊപ്പം, ലേസർ അധിഷ്ഠിത ഡയറക്റ്റഡ് എനർജി വെപ്പണുകളും (DEWs) ഭാവിയിലെ പ്രതിരോധ കവചത്തിന്റെ ഭാഗമാക്കും. ഇതോടെ ഇന്ത്യയുടെ പ്രതിരോധ സംവിധാനത്തിന് സാങ്കേതികവിദ്യയിലെ ഏറ്റവും പുതിയ തലങ്ങളിൽ പ്രവേശനം ലഭിക്കും.
‘മിഷൻ സുദർശന ചക്ര’യും ‘പ്രോജക്റ്റ് കുശ’യും ഇന്ത്യയുടെ ആത്മനിർഭർ പ്രതിരോധ തന്ത്രത്തിന്റെ പുതിയ മുഖമാണ്. 2030-കളോടെ ഇന്ത്യയ്ക്ക് സ്വന്തം ദേശീയ വ്യോമ പ്രതിരോധ കവചം ലഭിക്കും. ഇതോടെ അയൽരാജ്യങ്ങളുടെ ഭീഷണികൾ ഗണ്യമായി കുറയുകയും ഇന്ത്യയ്ക്ക് തന്ത്രപരമായ മേൽക്കൈ ഉറപ്പിക്കുകയും ചെയ്യും.
ENGLISH SUMMARY:
India is developing its own advanced air defense system under “Mission Sudarshan Chakra” with DRDO’s “Project Kusha,” capable of neutralizing enemy aircraft, missiles, and drones within 350 km, reducing dependency on foreign defense systems.
