തിരുവനന്തപുരം: എൻഡിഎ മൂന്നാമതും അധികാരത്തിലെത്തിയാൽ 50 രൂപയ്ക്ക് പെട്രോൾ കിട്ടുമോയെന്ന മാദ്ധ്യമപ്രവർത്തകരുടെ ചോദ്യത്തോട് നിങ്ങൾക്ക് വേറെ പണിയൊന്നുമില്ലേയെന്ന് പരിഹസിച്ച് വയനാട് മണ്ഡലത്തിലെ എൻഡിഎ സ്ഥാനാർത്ഥി കെ സുരേന്ദ്രൻ. ഇത്തരത്തിലുള്ള നിരവധി പ്രചാരണങ്ങൾ സമൂഹമാദ്ധ്യമങ്ങളിൽ തനിക്കെതിരെ നടക്കുന്നുണ്ടെന്നും എകെജി സെന്ററിൽ നിന്നുള്ള ഇതുപോലത്തെ ക്യാപ്‌സൂളുകൾ മാദ്ധ്യമങ്ങൾ ഏറ്റെടുക്കരുതെന്നും അദ്ദേഹം പറഞ്ഞു.
ഇത് എ.കെ.ജി സെന്ററിൽ നിന്നല്ല താങ്കൾ തന്നെ ഒരു ചാനൽ ചർച്ചയിൽ പറഞ്ഞതാണെന്ന് ചൂണ്ടിക്കാട്ടിയപ്പോൾ അതിനെക്കാൾ ഗൗരവമുള്ള എത്ര വിഷയങ്ങളുണ്ട് ചർച്ച ചെയ്യാനെന്നായിരുന്നു സുരേന്ദ്രന്റെ മറുപടി. രാഹുൽ ഗാന്ധിക്കെതിരെ മത്സരിക്കുമെന്ന് പ്രഖ്യാപിച്ചപ്പോൾ കോൺഗ്രസുകാരും തനിക്കെതിരെ ക്യാപസ്യൂൾ പ്രചരിപ്പിക്കാൻ തുടങ്ങിയിട്ടുണ്ട്. വയനാടിന്റെ പ്രശ്നങ്ങൾ പൂർണമായും പഠിച്ച് കൃത്യമായ മാസ്റ്റർ പ്ലാൻ തയ്യാറാക്കിയാണ് അങ്ങോട്ട് പോകുന്നതെന്നും അദ്ദേഹം പറഞ്ഞു.
