ജേക്കബ് ഡയമണ്ട് അടക്കമുള്ള അമൂല്യ ആഭരണങ്ങൾ… നിസാമുകളുടെ അപൂർവ ആഭരണശേഖരം ആർബിഐയുടെ അതിസുരക്ഷാ കസ്റ്റഡിയിൽ
ന്യൂഡൽഹി: ഹൈദരാബാദ് നിസാമുമാരുടെ കൈവശമുണ്ടായിരുന്ന വിശ്വപ്രസിദ്ധമായ അപൂർവ ആഭരണശേഖരം റിസർവ് ബാങ്ക് ഓഫ് ഇന്ത്യയുടെ (RBI) അതിസുരക്ഷാ കസ്റ്റഡിയിലാണെന്ന് കേന്ദ്ര സർക്കാർ രാജ്യസഭയെ അറിയിച്ചു.
ആഭരണങ്ങളുടെ ചരിത്രപരവും സാംസ്കാരികവുമായ പ്രാധാന്യം സർക്കാർ തിരിച്ചറിയുന്നുണ്ടെന്നും കേന്ദ്ര സാംസ്കാരിക മന്ത്രി ഗജേന്ദ്ര സിംഗ് ഷെഖാവത്ത് വ്യക്തമാക്കി.
ഇൻഷുറൻസ്, സുരക്ഷ, സംരക്ഷണം എന്നിവ ഉറപ്പാക്കുന്നതിനായി ആർബിഐയുമായി ഒപ്പിട്ട കരാർ പ്രകാരമാണ് ഈ ശേഖരം സൂക്ഷിച്ചിരിക്കുന്നത്.
1995 മുതൽ ആർബിഐയുടെ രഹസ്യ അറകളിൽ ഈ ആഭരണങ്ങൾ സുരക്ഷിതമായി നിലനിർത്തുന്നുണ്ടെന്നാണ് മന്ത്രി രേഖാമൂലം നൽകിയ മറുപടിയിൽ വ്യക്തമാക്കുന്നത്.
അതേസമയം, ആഭരണങ്ങൾ ഹൈദരാബാദിലേക്ക് തിരികെ കൊണ്ടുവന്ന് സ്ഥിരം പ്രദർശനം ഒരുക്കണമെന്ന പൊതുജനങ്ങളുടെയും വിവിധ സംഘടനകളുടെയും ആവശ്യത്തിന്മേൽ നിലവിൽ തീരുമാനമൊന്നും എടുത്തിട്ടില്ലെന്നും മന്ത്രി അറിയിച്ചു.
ലോകത്തിലെ തന്നെ ഏറ്റവും വിലപിടിപ്പുള്ള രത്നങ്ങൾ, വജ്രങ്ങൾ, സ്വർണ്ണാഭരണങ്ങൾ എന്നിവ അടങ്ങിയ അപൂർവ ശേഖരമാണിത്. ലോകത്തിലെ ഏറ്റവും വലിയ വജ്രങ്ങളിൽ ഒന്നായ ജേക്കബ് ഡയമണ്ട് അടക്കമുള്ള അമൂല്യ ആഭരണങ്ങൾ ഈ ശേഖരത്തിലുണ്ട്.
വജ്രങ്ങൾ, മരതകം, മുത്തുകൾ എന്നിവ ഉൾപ്പെടെ 173 വിലമതിക്കാനാവാത്ത ആഭരണങ്ങളാണ് ശേഖരത്തിലുള്ളത്. നൂറിലധികം വർഷം പഴക്കമുള്ള ഈ ആഭരണങ്ങൾ ഹൈദരാബാദിന്റെ പഴയ പ്രതാപത്തിന്റെ ചരിത്രസാക്ഷ്യങ്ങളായാണ് വിലയിരുത്തപ്പെടുന്നത്.
സ്വതന്ത്ര ഇന്ത്യയിലേക്ക് ലയിക്കുന്നതിന് മുൻപ് ഹൈദരാബാദ് നാട്ടുരാജ്യം ഭരിച്ചിരുന്ന നിസാമുമാരുടെ സ്വകാര്യ ശേഖരമായിരുന്നു ഇവ.
സ്വാതന്ത്ര്യാനന്തരം നിസാമിന്റെ ട്രസ്റ്റുകളിൽ നിന്ന് ആഭരണങ്ങൾ വിദേശത്തേക്ക് കടത്താൻ ശ്രമം നടന്നിരുന്നുവെങ്കിലും, നീണ്ട നിയമപോരാട്ടത്തിനൊടുവിൽ 1995-ൽ ഏകദേശം 218 കോടി രൂപയ്ക്ക് ഇന്ത്യാ സർക്കാർ ഈ ശേഖരം സ്വന്തമാക്കിയിരുന്നു.
നിലവിൽ ഈ ആഭരണങ്ങളുടെ വിപണി മൂല്യം പതിനായിരം കോടി രൂപയിലധികം വരുമെന്നാണ് കണക്കാക്കുന്നത്.
ഹൈദരാബാദിന്റെ വികാരവും പൈതൃകവും പരിഗണിച്ച് ആഭരണങ്ങൾ നഗരത്തിൽ തന്നെ സ്ഥിരമായി പ്രദർശിപ്പിക്കണമെന്ന ആവശ്യം കാലങ്ങളായി ഉയരുന്നുണ്ടെങ്കിലും, സുരക്ഷാ കാരണങ്ങൾ മുൻനിർത്തി നിലവിലെ ക്രമീകരണങ്ങളിൽ മാറ്റം വരുത്താൻ സർക്കാർ തയ്യാറല്ലെന്ന സൂചനയാണ് മന്ത്രിയുടെ വിശദീകരണം നൽകുന്നത്.
ENGLISH SUMMARY
The Union Government informed the Rajya Sabha that the world-famous jewellery collection of the Hyderabad Nizams is kept under high-security custody of the Reserve Bank of India since 1995.
hyderabad-nizam-jewellery-rbi-high-security-custody
Hyderabad Nizams, Nizam jewellery, RBI custody, rare jewels, Jacob Diamond, Rajya Sabha, Gajendra Singh Shekhawat, cultural heritage, India government, Hyderabad heritage
