ഹരിപ്പാട് താലൂക്ക് ആശുപത്രിയിൽ ഡയാലിസിസിനിടെ രണ്ട് മരണം; അണുബാധയെന്ന് ബന്ധുക്കൾ
ആലപ്പുഴ: ഹരിപ്പാട് താലൂക്ക് ആശുപത്രിയിൽ ഡയാലിസിസ് ചെയ്യുന്നതിനിടെ വിറയലും ഛർദിയും അനുഭവപ്പെട്ടതിനെ തുടർന്ന് രണ്ട് പേർ മരിച്ച സംഭവത്തിൽ ആശുപത്രിക്കെതിരെ ഗുരുതര ആരോപണങ്ങൾ.
അണുബാധ മൂലമാണ് മരണങ്ങളുണ്ടായതെന്നാണ് മരിച്ചവരുടെ കുടുംബങ്ങളുടെ ആരോപണം.
29ന് രാവിലെ ഡയാലിസിസ് നടത്തുന്നതിനിടെയാണ് നാല് രോഗികൾക്ക് വിറയലും ഛർദിയും അനുഭവപ്പെട്ടത്. ഇവരിൽ രണ്ട് പേർ പിന്നീട് മരിച്ചു.
കായംകുളം പുതുക്കാട് വടക്കതിൽ മജീദ് (53), ഹരിപ്പാട് പട്ടണത്തിലെ പച്ചക്കറി വ്യാപാരി വെട്ടുവേനി ചാക്കനാട്ട് രാമചന്ദ്രൻ (60) എന്നിവരാണ് മരിച്ചത്.
അന്നേ ദിവസം ആശുപത്രിയിൽ 26 പേരാണ് ഡയാലിസിസ് നടത്തിയിരുന്നത്. ഇതിൽ ആറ് പേർക്ക് അസ്വസ്ഥത അനുഭവപ്പെട്ടതായാണ് വിവരം. സംഭവത്തെ തുടർന്ന് ആരോഗ്യവകുപ്പ് അടിയന്തര അന്വേഷണം ആരംഭിച്ചു. ആരോഗ്യ മന്ത്രി സംഭവത്തിൽ റിപ്പോർട്ട് തേടുകയും ചെയ്തു.
അണുബാധ ഉണ്ടായിട്ടുണ്ടോ എന്ന സംശയം സ്ഥിരീകരിക്കുന്നതിനായി ഡയാലിസിസ് യൂണിറ്റിലെ ഉപകരണങ്ങളും ഉപയോഗിച്ച വെള്ളവും ഉൾപ്പെടെ പരിശോധിച്ചതായി ആശുപത്രി അധികൃതർ അറിയിച്ചു.
എന്നാൽ പരിശോധനയിൽ അവ അണുവിമുക്തമാണെന്നാണ് ആശുപത്രി സൂപ്രണ്ട് ഡോ. അരുൺ ജേക്കബ് വ്യക്തമാക്കിയത്. എന്നിരുന്നാലും കൂടുതൽ വിദഗ്ധ പരിശോധനകൾ വീണ്ടും നടത്തുമെന്ന് അദ്ദേഹം അറിയിച്ചു.
ജില്ലാ മെഡിക്കൽ ഓഫിസർ ഡോ. ജമുന വർഗീസ് ആശുപത്രിയിലെത്തി പരിശോധനകൾക്ക് നേതൃത്വം നൽകി. സംഭവത്തിൽ രണ്ട് ഡപ്യൂട്ടി ഡിഎംഒമാർ ഉൾപ്പെടുന്ന നാലംഗ സംഘമാണ് അടിയന്തര അന്വേഷണം നടത്തുന്നത്.
അന്വേഷണ റിപ്പോർട്ട് ലഭിച്ച ശേഷം മാത്രമേ സംഭവത്തിൽ വ്യക്തത വരുകയുള്ളുവെന്ന് ആരോഗ്യവകുപ്പ് അറിയിച്ചു.
English Summary
Two patients died after experiencing shivering and vomiting during dialysis at Haripad Taluk Hospital in Alappuzha district. Families allege the deaths were caused by infection, while hospital authorities deny contamination. The health department has launched an investigation, with samples of dialysis equipment and water tested and further expert analysis underway.Two patients died after experiencing shivering and vomiting during dialysis at Haripad Taluk Hospital in Alappuzha district. Families allege the deaths were caused by infection, while hospital authorities deny contamination. The health department has launched an investigation, with samples of dialysis equipment and water tested and further expert analysis underway.
haripad-taluk-hospital-dialysis-deaths-infection-allegation
Alappuzha, Haripad, dialysis deaths, government hospital, health department probe, hospital negligence, infection allegation, Kerala health news
