യാങ്കൂണ്‍: മ്യാന്‍മറില്‍ പട്ടാളം പുറത്താക്കിയ മുന്‍ഭരണാധികാരി ഓങ് സാന്‍ സൂചിയ്ക്ക് മാപ്പു നല്‍കുന്നുവെന്ന് മ്യാന്‍മര്‍ ഭരണകൂടം. ബുദ്ധമത ആഘോഷങ്ങളുടെ ഭാഗമായി 7000 തടവുകാര്‍ക്ക് പൊതുമാപ്പു നല്‍കുന്നതിന്റെ ഭാഗമായാണ് സൂ ചിയ്ക്കും മാപ്പു നല്‍കുന്നതെന്നാണ് മ്യാന്‍മര്‍ മാധ്യമങ്ങള്‍ അറിയിച്ചത്.
സൂചിയുടെ കൂട്ടാളിയും സൂ ചിയുടെ ഭരണ സമയത്ത് രാജ്യത്തിന്റെ പ്രസിഡന്റായി സേവനമനുഷ്ഠിച്ച വിന്‍ മിന്റിനും മാപ്പു നല്‍കുമെന്നും പട്ടാള ഭരണകൂടം അറിയിച്ചു. 33 വര്‍ഷം വരെ തടവു ലഭിക്കാവുന്ന 19 കുറ്റകൃത്യങ്ങളില്‍ അഞ്ചൈണ്ണത്തിനാണ് മാപ്പ് നല്‍കിയിരിക്കുന്നതെന്നാണ് മ്യാന്‍മര്‍ മാധ്യമങ്ങള്‍ റിപ്പോര്‍ട്ട് ചെയ്തത്. എന്നാല്‍ 14 ക്രിമിനില്‍ കേസുകള്‍ സൂചിക്കെതിരെ നിലനില്‍ക്കുമെന്നാണ് റിപ്പോര്‍ട്ട്. മാപ്പ് നല്‍കുന്നതിലൂടെ സൂ ചിയുടെ ശിക്ഷ കാലാവധിയില്‍ ആറു വര്‍ഷം കുറയും. മാപ്പ് നല്‍കിയെങ്കിലും സൂചി നിലവിലുള്ള വീട്ടു തടങ്കലില്‍ തുടരുമെന്നാണ് സൂ ചിയുടെ അടുത്ത വൃത്തങ്ങളെ ഉദ്ധരിച്ച് വാര്‍ത്ത ഏജന്‍സിയായ റോയിട്ടേഴ്‌സ് റിപ്പോര്‍ട്ട് ചെയ്യുന്നത്.
2021 ഫെബ്രുവരി 1നു പട്ടാളഅട്ടിമറി നടന്ന ദിവസം മുതല്‍ സൂചി ഏകാന്തതടവിലാണ്. കഴിഞ്ഞ ആഴ്ച ജയിലില്‍ നിന്ന് പട്ടാള ഭരണകൂടത്തിന്റെ നിയന്ത്രണത്തിലുള്ള വീട്ടിലേക്ക് മാറ്റിയിരുന്നു. അവിടെ വീട്ടു തടങ്കലില്‍ തുടരുന്നതിനിടെയാണ് ഇപ്പോള്‍ മാപ്പു നല്‍കിയതായി അറിയിച്ചത്. 1991ലെ നൊബേല്‍ ജേതാവായ സൂചിക്കെതിരെ അഴിമതി,രാജ്യദ്രോഹം അടക്കം 18 കേസുകളാണ് പട്ടാളഭരണകൂടം ചുമത്തിയിട്ടുള്ളത്. 48 വര്‍ഷം വരെ ശിക്ഷ വിധിക്കാവുന്ന കേസുകളാണ് ഇവര്‍ക്കു മേല്‍ ചുമത്തിയിട്ടുള്ളത്.
