കൊച്ചി: സംസ്ഥാനത്ത് സ്വര്ണവില വീണ്ടും റെക്കോർഡ് ഉയരത്തിൽ. പവന് ഒറ്റയടിക്ക് 680 രൂപയാണ് വർധിച്ചത്. ഇതോടെ ഒരു പവൻ സ്വർണത്തിന്റെ വില 68,080 രൂപയായി ഉയർന്നു.
ഗ്രാമിന് 85 രൂപയാണ് വര്ധിച്ചത്. ഇതോടെ ഒരു ഗ്രാം സ്വര്ണത്തിന്റെ വില 8510 രൂപയിലെത്തി. ഈ മാസത്തിന്റെ തുടക്കത്തില് 63,520 രൂപയായിരുന്നു സ്വര്ണവില. ഒരു മാസത്തിനിടെ ഏകദേശം 4000 രൂപയാണ് കൂടിയത്.
മാർച്ച് 20ന് 66,480 രൂപയായി ഉയര്ന്ന് സര്വകാല റെക്കോര്ഡ് ഇട്ടതിന് പിന്നാലെ അടുത്ത ദിവസങ്ങളില് സ്വര്ണവില ഇടിഞ്ഞിരുന്നു. പവന് ആയിരം കുറഞ്ഞ ശേഷം കഴിഞ്ഞ കഴിഞ്ഞ ബുധനാഴ്ച മുതലാണ് സ്വര്ണവില തിരിച്ചുകയറാന് തുടങ്ങിയത്.
ഓരോ ദിവസം കഴിയുന്തോറും റെക്കോര്ഡ് ഭേദിച്ച് സ്വര്ണവില മുന്നേറുകയാണ്. ഓഹരി വിപണിയിലെ ചലനങ്ങളും രാജ്യാന്തര വിപണിയിലെ മാറ്റങ്ങളുമാണ് വിപണിയില് പ്രതിഫലിക്കുന്നത്. സംസ്ഥാനത്ത് മാർച്ച് 18നാണ് സ്വര്ണവില ആദ്യമായി 66,000 തൊട്ടത്.
