റോം: മൂന്ന് പതിറ്റാണ്ടിലേക്ക് നീണ്ട തിളക്കമാര്‍ന്ന കരിയര്‍ അവസാനിപ്പിക്കാനൊരുങ്ങി ഇറ്റാലിയന്‍ ഇതിഹാസം ജിയാന്‍ലൂയിജി ബഫണ്‍. 45 കാരനായ ബഫണ്‍ വിരമിക്കുന്ന റിപ്പോര്‍ട്ട് സ്പോര്‍ട്സ് ജേണലിസ്റ്റായ ഫാബ്രിസിയോ റൊമാനോയാണ് പുറത്തുവിട്ടത്. ഏതാനും ദിവസങ്ങള്‍ക്കുള്ളില്‍ താരം വിരമിക്കല്‍ ഔദ്യോഗികമായി പ്രഖ്യാപിക്കുമെന്നാണ് റിപ്പോര്‍ട്ട്. നിലവില്‍ ഇറ്റാലിയന്‍ സീരി ബിയില്‍ പാര്‍മയ്ക്കുവേണ്ടിയാണ് ബഫണ്‍ കളിക്കുന്നത്. സീസണ്‍ അവസാനിക്കുന്നതോടെ ബഫണിന്റെ കരിയറിനും അവസാനമാകും.
1995 ല്‍ പാര്‍മയ്ക്കുവേണ്ടിയാണ് ജിയാന്‍ ബഫണ്‍ അരങ്ങേറിയത്. രണ്ട് വര്‍ഷത്തിനുള്ളില്‍ ഇറ്റലിയുടെ ദേശീയ ടിമിലെത്തി. 2018 വരെ 21 വര്‍ഷക്കാലമാണ് ബഫണ്‍ ഇറ്റലിയുടെ ?ഗോള്‍പോസ്റ്റിന് മുന്നില്‍ ഉണ്ടായിരുന്നത്. 1998, 2002, 2006, 2010, 2014 ലോകകപ്പുകളില്‍ കളിച്ചു. 2006 ലോകചാമ്പ്യന്മാരായ ഇറ്റാലിയന്‍ ടീമില്‍ അം?ഗമായിരുന്നു. 2006 ലോകകപ്പില്‍ ഏഴ് മത്സരങ്ങളില്‍ രണ്ട് ഗോളുകള്‍ മാത്രമാണ് ബഫണ്‍ വഴങ്ങിയത്. അഞ്ച് മത്സരങ്ങളില്‍ ക്ലീന്‍ ഷീറ്റ് വിജയങ്ങള്‍. ദേശീയ ടീമില്‍176 മത്സരങ്ങള്‍ കളിച്ച ബഫണ്‍ 80 മത്സരങ്ങളില്‍ ഇറ്റലിയുടെ നായകനായിരുന്നു.
ഇറ്റാലിയന്‍ ക്ലബുകളായ പാര്‍മയ്ക്കും ജുവന്റസിനും വേണ്ടിയാണ് ബഫണ്‍ ഏറെ കാലവും കളിച്ചത്. 1995 മുതല്‍ 2001 വരെ പാര്‍മയ്ക്ക് വേണ്ടി കളിച്ചു. 17-ാം വയസില്‍ എസി മിലാനെതിരെ ആയിരുന്നു അരങ്ങേറ്റം. ആദ്യ മത്സരത്തില്‍ തന്നെ ക്ലീന്‍ ഷീറ്റ് നേടി വരവറിയിച്ചു. 2001 ല്‍ 52 മില്യണ്‍ യൂറോയ്ക്ക് (471 കോടി രൂപ) യുവന്റസിലേക്ക് എത്തി. 509 മത്സരങ്ങളില്‍ യുവന്റസിനായി ബഫണ്‍ വലകാത്തു. 2018-19 സീസണില്‍ പിഎസ്ജിക്കു വേണ്ടി കളിച്ചു. എങ്കിലും അടുത്ത സീസണില്‍ യുവന്റസില്‍ മടങ്ങിയെത്തി. 2021 ബഫണ്‍ ആദ്യ ടീമായ പാര്‍മയിലേക്ക് വീണ്ടും എത്തുകയായിരുന്നു.
