ഓൺലൈൻ ജോലി വാഗ്ദാനം നൽകി യുവാവിനെ കബളിപ്പിച്ച് 45 ലക്ഷം തട്ടിയതായി പരാതി. പട്ടം ഗൗരീശപട്ടം സ്വദേശിയാണ് പതിനഞ്ചോളംപേർക്കെതിരെ തിരുവനന്തപുരം സൈബർ സിറ്റി പൊലീസിൽ പരാതി നൽകിയത്. യുവാവ് ഓൺലൈൻ ജോലി അന്വേഷിക്കുകയാണെന്നു മനസ്സിലാക്കിയ പ്രതികൾ ആൾമാറാട്ടം നടത്തി തട്ടിപ്പിനിരയാക്കുകയായിരുന്നു എന്ന് പരാതിയിൽ പറയുന്നു. ഫെബ്രുവരി 13 ന് വില്യം സോനോമ എന്ന വെബ് സൈറ്റ് വാട്ട്സ് ആപ്പ് നമ്പർ വഴി ഓൺലൈൻ ജോബ് നൽകാമെന്ന് പറഞ്ഞ് വിശ്വസിപ്പിച്ച് പണം തട്ടുകയായിരുന്നു.
പല തവണകളായി വിവിധ ബാങ്ക് അക്കൗണ്ട് വഴിയും പേ ടിഎം അടക്കമുള്ള യു.പി.ഐ ഐ.ഡി വഴിയും തുക അയച്ചു നൽകിയെന്നും, പതിനഞ്ചോളം പേരുടെ വിവിധ അക്കൗണ്ടുകളിലേക്കാണ് പണം അയച്ചു നൽകിയതെന്നും യുവാവ് പറഞ്ഞു.
ഫെബ്രുവരി 18 വരെ പ്രതികൾ ആവശ്യപ്പെട്ട തുക വിവിധ അക്കൗണ്ടുകളിലേയ്ക്കായി നൽകി. ഇങ്ങനെ ആകെ 44,90,890 രൂപയാണ് അയച്ചു നൽകിയത്. തുടർന്ന് തട്ടിപ്പ് മനസിലാക്കിയ യുവാവ് പണം തിരികെ ആവശ്യപ്പെട്ടപ്പോൾ പ്രതികൾ കൂടുതൽ തുക അങ്ങോട്ട് ആവശ്യപ്പെടുകയായിരുന്നു.
