എൽപിജി ബുക്കിംഗിന്റെ മറവിൽ സോഷ്യൽ മീഡിയയിൽ ‘എമർജൻസി സിലിണ്ടർ’ തട്ടിപ്പ്;
എൽപിജി വിതരണത്തിലെ തടസ്സങ്ങളും സിലിണ്ടറുകൾ ലഭിക്കാനുള്ള കാലതാമസവും മുതലെടുത്ത് സൈബർ ലോകത്ത് പുതിയ തട്ടിപ്പ് രീതികൾ സജീവമാകുന്നു.
പാചകവാതക ക്ഷാമം പരിഹരിക്കാമെന്നും ഉടൻ സിലിണ്ടറുകൾ എത്തിച്ചുനൽകാമെന്നും വാഗ്ദാനം ചെയ്താണ് തട്ടിപ്പുകാർ രംഗത്തിറങ്ങിയിരിക്കുന്നത്.
ഹൈദരാബാദ് പോലുള്ള നഗരങ്ങളിൽ വ്യാപകമായി റിപ്പോർട്ട് ചെയ്യപ്പെട്ട ഈ തട്ടിപ്പ് രീതി ഇപ്പോൾ കേരളം അടക്കമുള്ള സംസ്ഥാനങ്ങളിലേക്കും വ്യാപിക്കുന്നതായി പൊലീസ് മുന്നറിയിപ്പ് നൽകുന്നു.
സിലിണ്ടർ ബുക്ക് ചെയ്യാൻ ബുദ്ധിമുട്ടുന്ന സാധാരണക്കാരെയാണ് പ്രധാനമായും ഇവർ കെണിയിൽ വീഴ്ത്തുന്നത്.
സമൂഹമാധ്യമങ്ങളായ ഫേസ്ബുക്ക്, ഇൻസ്റ്റഗ്രാം എന്നിവയിലൂടെയാണ് തട്ടിപ്പുകാർ പ്രധാനമായും പ്രചാരണം നടത്തുന്നത്.
‘ഇമ്മീഡിയറ്റ് ഗ്യാസ് സിലിണ്ടർ ഡെലിവറി’, ‘എമർജൻസി എക്സ്ട്രാ സിലിണ്ടർ സപ്ലൈ’ തുടങ്ങിയ ആകർഷകമായ തലക്കെട്ടുകൾ നൽകിയാണ് ഇവർ പോസ്റ്റുകൾ പങ്കുവെക്കുന്നത്.
സിലിണ്ടറുകൾക്ക് മുൻഗണന നൽകുമെന്നും അധിക സിലിണ്ടറുകൾ നിയമവിരുദ്ധമായി എത്തിച്ചുനൽകാമെന്നുമുള്ള വാഗ്ദാനങ്ങൾ കണ്ടു വിശ്വസിക്കുന്നവർ ഇവരുടെ ചതിക്കുഴിയിൽ വീഴുന്നു.
വാട്സാപ്പിലൂടെയും എസ്എംഎസ് വഴിയും സമാനമായ രീതിയിൽ വ്യാജ സന്ദേശങ്ങൾ പ്രചരിക്കുന്നുണ്ട്.
തട്ടിപ്പുകാരുടെ സന്ദേശങ്ങളോട് താൽപ്പര്യമുണ്ടെന്ന് അറിയിക്കുന്നവർക്ക് ഉടൻ തന്നെ പണമടയ്ക്കാനുള്ള ലിങ്കുകൾ ഇവർ അയച്ചുനൽകും.
മുൻകൂറായി പണമടച്ചാൽ മാത്രമേ സിലിണ്ടർ വീട്ടിലെത്തിക്കുകയുള്ളൂ എന്നാണ് ഇവർ ആവശ്യപ്പെടുന്നത്.
ഈ ലിങ്കുകളിൽ ക്ലിക്ക് ചെയ്യുന്നതോടെ ഉപയോക്താക്കളുടെ ഫോണിലേക്ക് ഒരു എപികെ ഫയൽ തനിയെ ഇൻസ്റ്റാൾ ആകാൻ സാധ്യതയുണ്ട്.
ഇത്തരത്തിൽ ആപ്പുകൾ ഫോണിൽ പ്രവേശിക്കുന്നതോടെ ഫോണിന്റെ പൂർണ്ണ നിയന്ത്രണം തട്ടിപ്പുകാരുടെ കൈകളിലാകും.
ഇതിലൂടെ ബാങ്ക് വിവരങ്ങളും മറ്റ് രഹസ്യവിവരങ്ങളും ചോർത്താൻ ഇവർക്ക് സാധിക്കും.
പലപ്പോഴും ഔദ്യോഗിക ബുക്കിംഗ് സംവിധാനങ്ങളോട് സാമ്യമുള്ള രീതിയിലാണ് ഇത്തരം ലിങ്കുകൾ രൂപകൽപ്പന ചെയ്തിരിക്കുന്നത്. പണമടച്ചു കഴിഞ്ഞാൽ ഉടൻ തന്നെ ഈ തട്ടിപ്പുകാർ അപ്രത്യക്ഷരാകും.
അവർ നൽകിയ നമ്പറുകളോ ലിങ്കുകളോ പിന്നീട് പ്രവർത്തിക്കില്ല. സാധാരണക്കാർക്ക് തങ്ങളുടെ പണം നഷ്ടപ്പെടുമെന്ന് മാത്രമല്ല, വ്യക്തിഗത വിവരങ്ങൾ അപകടത്തിലാകുകയും ചെയ്യുന്നു.
ഫോണിലെ ഒടിപികൾ വായിക്കാനും സന്ദേശങ്ങൾ അയക്കാനും തട്ടിപ്പുകാർക്ക് ഇതിലൂടെ സാധിക്കുമെന്നതാണ് ഏറ്റവും വലിയ ഭീഷണി.
ഗ്യാസ് കമ്പനികളുടെയോ അംഗീകൃത ഏജൻസികളുടെയോ ഔദ്യോഗിക വെബ്സൈറ്റുകൾ, മൊബൈൽ ആപ്പുകൾ എന്നിവയിലൂടെ മാത്രം ബുക്കിംഗ് നടത്തണമെന്ന് പൊലീസ് കർശന നിർദ്ദേശം നൽകുന്നു.
ഐവിആർഎസ് സംവിധാനമോ വാട്സാപ്പിലെ ഔദ്യോഗിക നമ്പറുകളോ മാത്രം ഇതിനായി ഉപയോഗിക്കുക.
അജ്ഞാത സന്ദേശങ്ങളിലെ ലിങ്കുകളിൽ ക്ലിക്ക് ചെയ്യുകയോ ബാങ്ക് അക്കൗണ്ട് വിവരങ്ങളും യുപിഐ ഐഡികളും പങ്കുവെക്കുകയോ ചെയ്യരുത്.
പണം ആവശ്യപ്പെട്ടുകൊണ്ടുള്ള അപരിചിതമായ കോളുകളോട് പ്രതികരിക്കാതിരിക്കുക എന്നതാണ് ഏറ്റവും സുരക്ഷിതമായ മാർഗം.
ഒടിപി വിവരങ്ങൾ ആരുമായും പങ്കുവെക്കാതിരിക്കാൻ ശ്രദ്ധിക്കണം. ഗ്യാസ് ഏജൻസികൾ ഒരിക്കലും ഉപഭോക്താക്കളിൽ നിന്ന് ഇത്തരത്തിൽ ലിങ്കുകൾ അയച്ച് പണം ആവശ്യപ്പെടാറില്ല.
സിലിണ്ടർ വിതരണവുമായി ബന്ധപ്പെട്ട പരാതികൾ ഉണ്ടെങ്കിൽ അത് നേരിട്ട് ഏജൻസിയെയോ ഗ്യാസ് കമ്പനികളുടെ ടോൾ ഫ്രീ നമ്പറിലോ അറിയിക്കുക.
സൈബർ തട്ടിപ്പിന് ഇരയായാൽ ഉടൻ തന്നെ 1930 എന്ന നമ്പറിൽ വിവരം അറിയിക്കണമെന്നും കേരള പൊലീസ് ജാഗ്രതാ നിർദ്ദേശത്തിൽ വ്യക്തമാക്കുന്നു.
