കോട്ടയം: ഇടനിലക്കാരുടെ ചൂഷണത്തിൽ നിന്നും കർഷകരെ രക്ഷിക്കാനായി സംസ്ഥാന കൃഷിവകുപ്പ് രൂപികരിച്ച വി.എഫ്.പി.സി.കെയും പ്രതിസന്ധിയിൽ.
സംസ്ഥാനത്തൊട്ടാകെയുള്ള പച്ചക്കറി കർഷകർക്ക് അഞ്ചു കോടിയിലേറെ രൂപയാണ് വി.എഫ്.പി.സി.കെ നൽകാനുള്ളതെന്നാണ് റിപ്പോർട്ട്.
പദ്ധതി നടത്തിപ്പിനും സബ്സിഡിക്കും പണമില്ലാതെ ആകെ വലയുകയാണ് വി.എഫ്.പി.സി.കെ. 2023 മുതൽ കൃത്യമായി പൊതുവിപണിക്ക് സബ്സിഡി ആനുകൂല്യത്തിന് അടക്കം സർക്കാർ ഫണ്ടനുവദിക്കാത്തതാണ് പ്രതിസന്ധിക്ക് കാരണം. ഇത് വി.എഫ്.പി.സി.കെ പ്രവർത്തനങ്ങളെ താളംതെറ്റിക്കുകയാണ്.
വർഷങ്ങൾക്ക് മുമ്പ് കൃഷിവകുപ്പിന് കീഴിൽ വിഎഫ്‍പിസികെ ആരംഭിച്ചത് കർഷകർക്ക് സബ്സിഡി ആനൂകൂല്യങ്ങളോടെ വ്യാവസായികാടിസ്ഥാനത്തിൽ പഴം- പച്ചക്കറി കൃഷി, ഇടനിലക്കാരുടെ ചൂഷണമില്ലാതെ വിപണി കണ്ടെത്താൻ മെച്ചപ്പെട്ട മാർഗ്ഗം, പച്ചക്കറി മിച്ച സംസ്ഥാനമെന്ന ആശയത്തിന് കരുത്ത് തുടങ്ങിയ ലക്ഷ്യങ്ങളുമായിട്ടാണ്.
എന്നാൽ, കഴിഞ്ഞ ഒരു വ‍ർഷത്തെ പ്രവർത്തനങ്ങൾ മാത്രം പരിശോധിച്ചാൽ വിഎഫ്‍പിസികെയിലെ താളപ്പിഴകളെക്കുറിച്ച് മാത്രമായിരിക്കും കർഷകർക്ക് പറയാനുണ്ടാകുക.
ഇടുക്കിയിൽ മാത്രം വിഎഫ്‍പിസികെയുടെ 19 സ്വാശ്രയ വിപണികളുണ്ട്. കർഷകർക്കുളള ഇൻസെൻറീവും സബ്സിഡിയുമായി ഇവിടെ മാത്രം നൽകാനുളളത് 15 ലക്ഷത്തോളം രൂപയാണ്. എന്നുകിട്ടുമെന്ന് ഉറപ്പില്ലെങ്കിലും മെച്ചപ്പെട്ട വിപണി സാധ്യത മാത്രം കണ്ടാണ് ഇന്നും കർഷകർ ഇവിടങ്ങളിൽ തന്നെ പച്ചക്കറികൾ എത്തിക്കുന്നത്.
ആവശ്യമുളള ഉദ്യോഗസ്ഥരെപ്പോലും നിയമിക്കാതെ, വിഎഫ്പിസികെയെ നശിപ്പിക്കുകയാണെന്നും കർഷകർക്ക് പരാതിയുണ്ട്. കുടിശ്ശിക പെരുകിയതോടെ, വിഎഫ് പിസികെ കൂട്ടായ്മയുടെ നേതൃത്വത്തിൽ സംസ്ഥാന വ്യാപക സമരത്തിനൊരുങ്ങുകയാണ് കർഷകർ.
ഒരുവർഷത്തെ കുടിശ്ശികയെങ്കിലും തന്നുതീർക്കണമെന്നാവശ്യപ്പെട്ട് ഈ മാസം 26നാണ് വിഎഫ്‍പിസികെ കർഷക കൂട്ടായ്മയുടെ നേതൃത്വത്തിൽ ആദ്യഘട്ട സമരം തുടങ്ങുന്നത്.
