തിരുവനന്തപുരം: ദന്ത ഡോക്ടറെ കഴുത്തറുത്ത് മരിച്ച നിലയിൽ കണ്ടെത്തി. തിരുവനന്തപുരം കൊറ്റാമത്ത് ആണ് സംഭവം. കൊറ്റാമറ്റം സ്വദേശി സൗമ്യയാണ് (31) മരിച്ചത്. ആത്മഹത്യയെന്നാണ് പോലീസിന്റെ പ്രാഥമിക നിഗമനം.
ഇന്നലെ പുലര്ച്ചെ രണ്ട് മണിയോടെയാണ് സംഭവം. സൗമ്യയെ വീട്ടിലെ മുകള് നിലയിലെ ബാത്ത്റൂമിലാണ് മരിച്ച നിലയില് കണ്ടെത്തിയത്. സംഭവ സമയത്ത് സൗമ്യയുടെ ഭര്ത്താവ് ആദര്ശും ഇയാളുടെ അമ്മയും മാത്രമാണ് വീട്ടില് ഉണ്ടായിരുന്നത്. ആദര്ശിന്റെ അമ്മ കാലൊടിഞ്ഞ് കിടപ്പിലാണ്. ഇവര്ക്ക് കൂട്ടുകിടക്കുകയായിരുന്നു സൗമ്യ.
ഇന്ന് രണ്ട് മണിയോടെ സൗമ്യയെ കാണാതായതിനെ തുടര്ന്ന് ആദര്ശിനെ ഫോണില് വിളിച്ച് അറിയിക്കുകയായിരുന്നു. പിന്നാലെ നടത്തിയ പരിശോധനയിലാണ് മുകള് നിലയില് രക്തം വാര്ന്ന നിലയില് സൗമ്യയെ കണ്ടെത്തിയത്. ഉടന് നെയ്യാറ്റിന്കര മിംസ് ആശുപത്രിയിലെത്തിച്ചെങ്കിലും മരണം സംഭവിച്ചിരുന്നു.
മൃതദേഹം തിരുവനന്തപുരം മെഡിക്കല് കോളജിലേക്ക് മാറ്റിയിരിക്കുകയാണ്. ഇവിടെ വെച്ച് ഇന്ക്വസ്റ്റ്, പോസ്റ്റ്മോര്ട്ടം നടപടികള് നടക്കും. നാല് വര്ഷം മുന്പാണ് സൗമ്യയും ആദര്ശും വിവാഹിതരായത്. സൗമ്യയ്ക്ക് ചില മാനസിക പ്രശ്നങ്ങള് ഉണ്ടായിരുന്നതായി പൊലീസ് പറഞ്ഞു.
