പത്തനംതിട്ട: പത്തനംതിട്ടയിലെ പ്ലസ് ടു വിദ്യാർഥിനിയുടെ മരണത്തിന്റെ കൂടുതൽ വിവരങ്ങൾ പുറത്ത്. പെൺകുട്ടി ആത്മഹത്യയ്ക്ക് ശ്രമിച്ചിരുന്നതായി കണ്ടെത്തി. വിദ്യാർത്ഥിനി എഴുതിയ ആത്മഹത്യാ കുറിപ്പ് പോലീസ് കണ്ടെത്തി.(Death of Plus Two student in Pathanamthitta)

അച്ഛനും അമ്മയും എന്നോട് ക്ഷമിക്കണമെന്ന് എഴുതിയ കുറിപ്പാണ് കുട്ടിയുടെ ബാഗിൽ നിന്ന് പോലീസ് കണ്ടെത്തിയത്. ഭാവിയിൽ അധ്യാപികയായി കാണണമെന്ന അമ്മയുടെ ആഗ്രഹത്തെ കുറിച്ചും കുറിപ്പിൽ പരാമർശിച്ചിട്ടുണ്ട്. പോസ്റ്റ്മോർട്ടത്തിൽ പെൺകുട്ടി അമിത അളവിൽ മരുന്നു കഴിച്ചിരുന്നതായി കണ്ടെത്തിയിരുന്നു.

അതേസമയം കേസിൽ പെൺകുട്ടിയുടെ സഹപാഠിയെ ചോദ്യം ചെയ്ത പോലീസ്, ഡിഎൻഎ പരിശോധനയ്ക്ക് സാമ്പിൾ ശേഖരിച്ചു. നേരത്തെ ഗർഭസ്ഥശിശുവിന്റെ സാമ്പിളും ശേഖരിച്ചിരുന്നു. പരിശോധനാഫലം വന്ന ശേഷമേ കൂടുതൽ നടപടികളിലേക്ക് പോലീസ് കടക്കുകയുള്ളു.

ഈ മാസം 22 ആം തീയതിയാണ് പനിയെ തുടർന്നുള്ള അണുബാധയ്ക്ക് പ്ലസ് ടു വിദ്യാർഥിനി ആശുപത്രിയിൽ ചികിത്സ തേടിയത്. തുടർന്ന് ആലപ്പുഴ വണ്ടാനം മെഡിക്കൽ കോളേജ് ആശുപത്രിയിൽ പ്രവേശിപ്പിച്ച പെൺകുട്ടിയുടെ മരണം തിങ്കളാഴ്ച പുലർച്ചെ സംഭവിക്കുകയായിരുന്നു. എന്നാൽ സംശയം തോന്നി നടത്തിയ പോസ്റ്റ്മോർട്ടത്തിലാണ് അഞ്ചുമാസം ഗർഭിണിയാണെന്ന് കണ്ടെത്തിയത്.