തൃശൂര്: ഗുരുവായൂര് ക്ഷേത്രത്തില് ദര്ശന സമയം നീട്ടാൻ ദേവസ്വം ഭരണസമിതി യോഗത്തിൽ തീരുമാനം. കൂടുതല് ഭക്തര്ക്ക് ദര്ശന സൗകര്യം ഒരുക്കാന് ഒരു മണിക്കൂര് സമയം നീട്ടാനാണ് തീരുമാനിച്ചിരിക്കുന്നത്. വേനലവധിയും വൈശാഖ മാസ തിരക്കും കണക്കിലെത്താണ് നടപടി.
ഏപ്രില് ഒന്നു മുതല് മേയ് 31 വരെ ഗുരുവായൂർ ക്ഷേത്രനട ഉച്ചതിരിഞ്ഞ് 3.30 ന് തുറക്കും. ക്ഷേത്രനട തുറന്ന് ശീവേലി കഴിയുന്നതോടെ ഭക്തര്ക്ക് ദര്ശനം നടത്താം. നേരത്തെ വൈകീട്ട് നാലരയ്ക്കാണ് ക്ഷേത്രനട തുറന്നിരുന്നത്.
ശബരിമലയിൽ ഇനി ഉത്സവ നാളുകൾ; ക്ഷേത്ര നട നാളെ തുറക്കും, കൊടിയേറ്റ് ഏപ്രിൽ രണ്ടിന്
ശബരിമല: ശബരിമല ഉത്സവത്തിന് ഏപ്രിൽ രണ്ടിന് കൊടിയേറും. ഉത്സവത്തിനും വിഷുപൂജകള്ക്കുമായി ക്ഷേത്ര നട ചൊവ്വാഴ്ച വൈകീട്ട് അഞ്ചിന് തുറക്കും. ഉത്സവം തീരുമ്പോള് വിഷു ആഘോഷം തുടങ്ങുന്നതിനാല് ഏപ്രിലില് 18 ദിവസം നട വീണ്ടും തുറക്കും.
ബുധനാഴ്ച രാവിലെ 9.45-നും 10.45-നും മധ്യേ തന്ത്രി കണ്ഠര് രാജീവരുടെയും കണ്ഠര് ബ്രഹ്മദത്തന്റെയും കാര്മികത്വത്തിലാണ് കൊടിയേറ്റ് നടക്കുക. ഏപ്രില് മൂന്നിന് ഉത്സവബലി തുടങ്ങും. 10-ന് രാത്രി ഒന്പതോടെ ശരംകുത്തിയിലേക്ക് പള്ളിവേട്ട എഴുന്നള്ളത്ത് നടക്കും. തുടർന്ന് തിരികെയെത്തി പഴുക്കാമണ്ഡപത്തില് വിശ്രമം.
11-ന് പുലര്ച്ചെ ശ്രീകോവിലിലേക്ക് മടങ്ങി പൂജകള് നടക്കും.11-ന് രാവിലെ ഒന്പതോടെയാണ് പമ്പയിലേക്ക് അറാട്ട് എഴുന്നള്ളത്ത് നടക്കുക. ആറാട്ടുകഴിഞ്ഞ് തിരിച്ചുവരുംവരെ ദര്ശനമില്ല. 11 മണിക്കാണ് ആറാട്ട്.
