ആലുവയിൽ നിന്ന് മാള പൊലീസാണ് ഇവരെ പിടികൂടിയത്
തൃശ്ശൂർ: കാലിക്കറ്റ് യൂണിവേഴ്സിറ്റി ഡിസോൺ കലോത്സവത്തിനിടെ നടന്ന എസ്എഫ്ഐ- കെഎസ്യു സംഘർഷത്തിൽ മൂന്ന് കെഎസ്യു നേതാക്കളെ അറസ്റ്റ് ചെയ്ത് പോലീസ്. കെഎസ്യു ജില്ലാ അധ്യക്ഷൻ ഗോകുൽ ഗുരുവായൂർ, സംസ്ഥാന എക്സിക്യൂട്ടീവ് അംഗം സുദേവ്, സംസ്ഥാന ട്രഷറർ സച്ചിൻ എന്നിവരെയാണ് അറസ്റ്റ് ചെയ്തത്. ആലുവയിൽ നിന്ന് മാള പൊലീസാണ് ഇവരെ പിടികൂടിയത്.(d zone festival conflict; three ksu workers arrested)
സംഘർഷത്തെ തുടർന്ന് എസ്എഫ്ഐ നേതാക്കളുടെ പരാതിയിൽ ഇന്നലെ ഇവരുൾപ്പെടെ കണ്ടാലറിയാവുന്ന 14 പ്രതികൾക്കെതിരെ വധശ്രമത്തിന് കേസെടുത്തിരുന്നു. സംഘർഷത്തിൽ ഗുരുതരമായി പരിക്കേറ്റ എസ്എഫ്ഐ കേരള വർമ്മ കോളേജ് യൂണിറ്റ് സെക്രട്ടറി ആശിഷിൻ്റെ മൊഴിയുടെ അടിസ്ഥാനത്തിലാണ് നടപടി.
പരിക്കേറ്റവരെ ആശുപത്രിയിലേക്ക് കൊണ്ടുവരും വഴി ആംബുലൻസ് തടഞ്ഞ സംഭവത്തിലും കൊരട്ടി പൊലീസ് കേസെടുത്തിട്ടുണ്ട്. ആംബുലൻസ് ഡ്രൈവർ വൈഭവവിന്റെ പരാതിയിൽ കണ്ടാലറിയാവുന്ന നാല് എസ്എഫ്ഐ പ്രവർത്തകർക്കെതിരെയാണ് കേസെടുത്തത്.
മാളയിൽ നടന്ന കാലിക്കറ്റ് സർവകലാശാല ഡി സോൺ കലോത്സവത്തിനിടെയാണ് സംഘർഷം നടന്നത്. കെഎസ്യു ജില്ലാ അധ്യക്ഷൻ ഗോകുൽ ഗുരുവായൂരിൻ്റെ നേതൃത്വത്തിലുള്ള സംഘം അതിക്രമം അഴിച്ചുവിട്ടെന്നാണ് എസ്എഫ്ഐയുടെ ആരോപണം.
