ശ്രീനഗര്‍: ജമ്മു കശ്മീരിലെ ഉധംപൂര്‍ ജില്ലയില്‍ ഭീകരരുമായുണ്ടായ ഏറ്റുമുട്ടലില്‍ ഒരു സിആര്‍പിഎഫ് ഉദ്യോഗസ്ഥന് വീരമൃത്യു. സൈനിക പോസ്റ്റിന്റെ നിര്‍മാണ പുരോഗതി വിലയിരുത്താന്‍ എത്തിയ സിആര്‍പിഎഫ് ടീമിന് നേരെ ഭീകരര്‍ വെടി ഉതിർക്കുകയായിരുന്നു. തുടര്‍ന്നുണ്ടായ ഏറ്റുമുട്ടലിലാണ് ഉദ്യോഗസ്ഥന്‍ വീരമൃത്യു വരിച്ചത്.(CRPF Officer Killed In Encounter With Terrorists In J&K’s Udhampur)

ഉധംപൂരിലെ ഡുഡു ഏരിയയിലെ പോലീസ് പോസ്റ്റില്‍ നിന്ന് എട്ട് കിലോമീറ്റര്‍ അകലെയാണ് സൈനിക പോസ്റ്റ് സ്ഥിതി ചെയ്യുന്നത്. ജമ്മുവിലെ മലയോര മേഖലകളില്‍ പുതിയ ഭീകരവിരുദ്ധ നടപടികളുടെ ഭാഗമായാണ് ഈ പോസ്റ്റ് സ്ഥാപിക്കുന്നത്.കഴിഞ്ഞ മാസങ്ങളില്‍ ജമ്മു മേഖലയില്‍ തീവ്രവാദ പ്രവര്‍ത്തനങ്ങള്‍ വര്‍ധിച്ചുവരികയാണ്. ജൂലൈയില്‍, ദോഡ ജില്ലയില്‍ ആയുധധാരികളായ ഭീകരരുമായുണ്ടായ ഏറ്റുമുട്ടലില്‍ ഒരു ഉദ്യോഗസ്ഥന്‍ ഉള്‍പ്പെടെ നാല് സൈനികരും ഒരു പോലീസ് ഉദ്യോഗസ്ഥനും കൊല്ലപ്പെട്ടിരുന്നു.